Read Kissi Condii kɛndɛ-kɛndɛi 6 Bible Online

Condii kɛndɛ-kɛndɛi 6 - Kissi bible

Condii kɛndɛ-kɛndɛi 6

¹«Éé nɔm vanalanɔ hiow vanlaandua naŋɔɔ-o, kuɛɛ vanapɔnɔ n kaola hoo-o kɔɛ yɛ? A kpengii kuɛɛ o bii yɛ nɛiyo? N co nɔm ndu mala nuwviaa.

²Vanapɔnɔ ya kaola-o tol o nakɔ ndɔɔ nin, o kɔɛ o bungɛi nakɔɛi ɲɛm cun kɛndɔn co nin-nde nin le cɔlua ndɔa yɔɔ diólan o nakɔlan nin, a le yandɔɔ bil kɛndɛ-kɛndɔɔ kiɔndɔɔ.

³Le vanapɔnɔ ya kaola hoo-o ya co ni, le ya ndu bɛɛ co ni. O bil kɛndɛ-kɛndɔɔ nin o yaa cɔlua ndɔa diólan ni.

⁴Caan ni laandoo sei, a naŋ bɔɔ, a naŋ bɔɔ maa kobio Tirsa. A connun o kɛndɛ válán maa Yerusalɛm, kɛ a vueinun bɔɔ maa vanaa cɔw.

⁵Faŋa ya hɔlta nɔmndan kɔɔli, kani tofa nɔmndo ho mingi ya ɲamaka-ɲamaka. Vana ca ko yiiŋii nɔmnde aa cuinaa kundaa co pembei Kalaad tolɔɔ a kiltan ni.

⁶Vana ca ko ciŋun nɔmndon aa saa nda kili yiinde-a co cɔnɔnndo nɛɛ nda kɔa kolɔɔ-a ni. Mún kpow n nɔ velanndo, n'miun-miun kpede n co ni.

⁷Vana ca ko kuula nɔmndan ningilaa o kola vaan-vaan n kuumbun o lebol-lo bɛngu aakrenadeon ni.

⁸Laandaa masaa co belaŋɔmmɛw, sámáá ndɔa co belaŋɔmaa a cuaambɔa laanduasɛ́lɔ́ɔ́ taw, vana cii nda cɔm te.

⁹Kɛ ya ya, ndu pilɛ kpé co poonpoon nuu ni, ndu pilɛ kpé co o tiwnun le ya-o ni. Ndu pilɛ kpé co kala ndɔ o ba ni, kala velu ndu-o kaola ndu taw. Cuaambɔa laandua ce ndu pɛ, a dimi aa caando pɛl tɔnɔ. Laandua a sámáá masaa bɛɛ a co ndu lisaa aa:

¹⁰‹Nɛ̀ɛ́-nɛ̀ co yɛ hoo fulaa muɲɛɛ maa ɲɛ-tengaa paale siaa? Vanndo ho naŋ maa ipaangu, o dendu maa lepala, kɛ o vueinun bɔɔ maa vanaa cɔw›.

¹¹I co tolɔɔ o nakɔ yɔmii koamaa nin le peengela kɛndɛla co o bóllo nin-ndan tofaa, le tofaa te rɛsɛnndon co vulɔɔ, te krenadiee co yandɔɔ.

¹²I co lɛ ɲɛ-ɲɛ bila biyɔɔ le, a mingi ya vana tálákúláá-o, ya fula hoo o yungu latɔ́ɔ́-tɔ́ɔ́ nin-ndo[5].»