Read Kissi Esai 1 Bible Online

Esai 1 - Kissi bible

Esai 1

¹Vundule Esai, po Amɔt-o ce o dɛnɛ tàndá Yuda-o coo a o kobio Yerusalɛm coo len. Dɛnnda lan la cɔmnun ndu o palɛi masaa Osias, masaa Yotam, masaa Ahas a masaa Esekia a va masalen tosaa o tàndá Yuda-o coo-e nin.

²«Niaa co o halataalaa-a, la yaŋ nilan! Niaa co o lɛŋnden coo-a, la yaŋnun! Kani Mɛlɛka co sɔɛi. I dɔw cuawva balo, mí manda nda, mí soli nda lenin, kɛ a simul-la a nila kalulan.

³Nawvo sinà vana nɔ ndu-o, sofɛlɔɔ sinà hèé vana ndɔ bɛndoo. Kɛ Israɛlla nda sinà ɲɛ-ɲɛ le, yungu nuu bii ɲɛ-ɲɛ bila le.

⁴Lelan, dɛnɛ palaa co le niaa vanaa tosaa lahakia, dɛnɛ palaa co le niaa vanaa pɛ a hakilan-nda, le niaa vanaa kɔlvesɛiya, le niaa cuavaa laasiannda. Kani la faŋan Mɛlɛka o ibuŋ, la pɛɛsa O-Diandaa Israɛlla, la mulul ndu kɔɔ mí la muungun a makɔɔ.

⁵Mɛɛ niaa co hiovɔɔ laci a nila kalulan tosaa yɛ, sangala yɛɛ ya tuisi yɛnin vɛlɛ niaa coo kpeekpei? Kani bolle niaalen kpede le co a nàá, kɔllo bɛɛ co niaa nɛiyo.

⁶Kandɔɔ a bɛngu kɔllo háá o lebol, ɲɛ-ɲɛ co o kɛndɛ le: boolɔnndan, fungbulan a pawve kposon! Pavii ken sɔla pulɔɔ le, i sɔla holɔɔ le, vana cɛ́w ndi a makòó le, vana cɛ́w ndi a macuɛi le.

⁷Lɛŋnde niaalen le tambu, kobila niaalan la ŋɔɛ kpow a yinnden, mialla co yondola niaalan tɛɛmbuuo niaa pila o hɔl, a co lan laasiaa a lan tɛɛmbuuo a labɛɛla, maa vanaa luɛi a paa-kala le ɲɔɔn tɛɛmbuuo-a.

⁸Vannda Siɔn a ló yoomu mɛɛ pangaa lò isisi o nakɔ n'rɛsɛnndo nin nuaa yɛ. A lo yoomu mɛɛ kùùo lò o ciɛi n'heenguue nin yɛ, mɛɛ kobi nda co cumullo-o lò nuaa yɛ.

⁹Te Mɛlɛka-Nɔ-Kpaayaa-Kpow-vo ndóò mɛilul naa vanaa pum yoomu le, n va siŋnɔn maa Sodɔm, mì náà n vel vannda Komɔr.

¹⁰Niaa vanaa bɛndua Sodɔm, la yaŋ nilan o sɔɛi Mɛlɛka-e! Niaa vanaa co Komɔr-a, la yaŋ nilan o tɔŋ Hala naa!

¹¹Mɛlɛka ɲuna aa: ‹Kpeku yɛɛ nɛ ya nɔ yɛ a sálàla niaa co lan soli bɛndoo lan? Sálàla loamaala niaa co solio a saa kóndóa lan la fula ya iyeema few-few, I sanga nin a visin macuɛin navaa téndéa. I yeema lɛ kooma navaa tovaa, kooma saa téndéa a kooma cuinaa toovia le.

¹²Hunɔɔ niaa co hoo simndan ya o hɔl-lo, nɛ̀ɛ́-nɛ̀ dimul-lɛ niaa le pelei pilaa o bɛ́ɛ̀la cɛi nuu?

¹³Mbɔ̀ la n'kafɛi! La pɛngi hunɔɔ a sálàla fondolan! I yeemiaa bɔɔ lasikɔlɔ niaa. Kafola paangun sɛnɛilan, cuungiannda paale pɛngiaalan a cuungiannda niaalan kpow la nɛinun nin ya bɔɔ. Kani la co lan tosaa a kɔlvesɛiyo.

¹⁴I hini lɛ kɔl a kafola paangun sɛnɛila niaalan a á kafola niaala tɔ̀lan te. Kani la siŋnun volɔɔ lusoo le ya. I sanga nin a volɔɔ kon siilɔnndo.

¹⁵La siɛndi nin bɛɛ balan o ya lo, i faŋalnin niaa hɔlla. Hali la vangala bɛɛ piɛilen taw-taw, i yeŋnin niaa lani le. Kani bala niaalan la co lalɔngɔlɛilan a koovan.

¹⁶Le hee, la pulun few-few mì la dindin, la faŋa kɔlvesɛi niaa co tosaa o dɛnnda niaalan nin-ndo ya o hɔl. La pɛngi dɛnɛ vɔɔndo tosaa.

¹⁷La pɛɛku le dɛnɛ kɛndɔɔ tosaa, la kindin le dɛnɛ sandaa nuwviaa, la kanda vana nda co saangiaa-o, la tosal vííyo dɛnɛ sandaa, la lɔɔnun ibuŋ le vanalanɔ pɔnɔ ndɔ vi-o.›»

¹⁸Mɛlɛka dimi aa: «La hun mì n soonun latulu! Te hakila niaalan la va pɛ lasiaŋa vaŋ, la co muungu lahumbu maa fengbɔ, te la va pɛ lasiaŋa maa kola siaŋa sɔɔtɔtɔ, la co muungu maa kola keese humbu.

¹⁹Te la cɛl pɛ le diom nuu biyɔɔ a yiyan kɛndɔɔ, la dianin kɔmnde hiow naŋɔɔ o lɛŋnden nden nin-nden.

²⁰Kɛ te la simul-la pɛ mì la siŋnun vanaa nila kalua, mɔɛi cɔwve co niaa cii diw kpede. Ya Mɛlɛka o sondo sɔɔn mun co fulaa ni.»

²¹Kpòkóó dɛnɛ! Kobi vannun hoo sakpo-o siŋnun kobi suunda leyulaa fɔ́! Kobio ho vannun paandu o piaa cá a sandei, dɛnɛ sandaa va o tɔalaa lenin pí! Kɛ sisa, vanaa diuvaa n'vannda kposon co lenin ni.

²²Volin niaan cuu sɔva, mɔima niaan ma muulian a mɛnndan.

²³Vanaa lanila kalua simlacia niaa co ni, nda co vuiya simndan kɔɔli le vuilen tosaa ni. Nda kpow a yeema bolofaa luɛyɔɔninndo, a co kiltan ikilikiliei vɔ̀ngɔ̀lan kɔɔli tuŋ! A co isɔɔ le vííya ma tosal nda dɛnɛ sandaa le, a cɛl bɛɛ mì dɛnɛ vanalanɔ pɔnɔ ndɔ vi-o tiiya o nda lo di le yamɛi kiolɔɔ le.

²⁴Lelan, diom Mɛlɛka-Nɔ-Kpaayaa-Kpow-vo, o co Hala Kpaaya Israɛlla-o dimi-o co hoo ni: «Dɛnɛ palaa co le niaa! Kani i co mɔnɛi solin a yaamɔaa niaa! I minginin màá yaamɔaa niaa coo!

²⁵Niaa Yerusalɛmnda, i co niaa mululɔn, mì teengiaa volin niaan sɔvɛiyon mɛɛ vana dindi ɲɔɔ a sodaa nuaa yɛ. I faŋanin nɔɔ niaa kpow.

²⁶I minginin vanaa kialaa n'yamaa niaa o vali ndaa nin mɛɛ nda va paandu yɛ. I minginin vanaa silaa niaa o vali ndaa nin mɛɛ ndáà va o kandɔɔ yɛ. O kon kɔɔli niko, a veelunin kobi niaa aa kobi dɛnɛ sandaa, kobi lo o lediom coo-o.

²⁷Siɔn sɔlanin baŋaa a dɛnɛ sandaa. Vanaa vanin icali lon mà mangalan-nda sɔlanin cindaa a dɛnɛ sandaa o kɔɔ.

²⁸Kɛ vanaa nila kalua a vanaa lahakia dɔawnunnin yɛɛvɛ. Vanaa kɛɛnin Mɛlɛka-a cuunin itambu kpede.

²⁹Siɛmbulan la biinin niaa le yɔmii soolaa niaa co sooloo-e. Siɛmbulan toalnin niaa le bundɛla soolala niaa kɔngan-ndan.

³⁰Niaa, la vanin maa yɔm soolaa pei ndɔɛi ɲɔfɔliaa-o, la vanin maa nakɔ nɔ mamɛn too.

³¹Vanapɔnɔ hiow kpaayaa-o vanin maa tɛngɛla lefun, baala ndɔɔ vanin maa tɛngɛ́-tɛngɛ́la leyin le ndu lomɔɔ a ɲɛ o tosa-o latulu faw. Vana-vana venin le yinnde len ɲumio le.»