Read Kissi Esai 13 Bible Online

Esai 13 - Kissi bible

Esai 13

¹Sɔɛi dimin le Babilɔn-nde co hee ni, i Esai po Amɔt-o tuei-ye:

²La baŋ lɛfɛ landaa o pembii nɔ bil lecoo lei coo. La heelu diomndan mì la yonda o vanaa cɔwva lo. La hiiluu balan, o kon mà kei o diola vanaa bɛndua, mà luɛi.

³I dimul niaa vanaa diandaa yɔngun ya-a le isɔɔ tosa, I veelu kuubaa cɔvaa co le kɔltuw nuu-a, vanaa dɔawnun ɲaale le bɔɔbɔɔyɛi nii-a pɛɛn.

⁴Bɔɔluu bɛndoo co tueinɔnndo o pembon coo maa vɔnga sɛ́lɛ́ bɛndu, masɛi yɛ́-yɛ́i co vɔngaa vɔkɔ-vɔkɔ, vanaa-mangalaa-sɔɔa cuungian-nda co tombolaa isɔkɔsɔkɔɛi a labɛɛla! Mɛlɛka-Nɔ-Kpaayaa-Kpow-vo co vanaa cɔvaa tosanin cɔwvo-a cɔmndo a pilɛn-pilɛn.

⁵O lɛŋnde levil vil-ten nin nda fula ni, nɛɛ halataalaa mɛɛlu-a nda cɛn ni. Mɛlɛka nda vanaa cɔ̀m kɔltuw ndɔɔ-a co tàndàá ho kpow tɛɛmbuu.

⁶Lelan la ŋɔɔcian! Kani paale Mɛlɛka len le co le tiiyaa. Paale len le co hunɔɔ maa kpundɛ. Mɛlɛka Vana-Kpaayaa-Kpow tuisinin len lende ni.

⁷Le hee, bala vannda kpow la fula yoomuan, kɔllo hiilun vanaciee oo vanaciee nin.

⁸Siòònde bii nda taw, ɲɛsuan ma kindun nda mì ɲɔɔ va nda nɛiyo mɛɛ demboo nɛi vanalanɔɔ telen vialaa nuaa yɛ. A co tofanndo vellaa-velle a kɔndɔfillo, hɔlaa ndaa diw vaŋ maa leyin.

⁹La tofa vɔ, paale Mɛlɛka len tiiyaa, paale kpundɛlen, paale kɔltuwlen a paale kɔltuw bɛndulen le co ni. Paale len, lɛŋnden le vanin a mɔnɛi bɛnduei, vanaa lahakia vunin faw.

¹⁰Kani loeon a mɔmtombolaa[3] co o halataala-o yɔngu lɛnin pangelela ndalan te. Paalen le piimiaanin telen le kandunin cɔnɔnndo-o, paangei bɛɛ, i ve lɛnin diondɔɔ le.

¹¹A toɲa, ya Mɛlɛka, I kpoosanin ceendo le kɔlvesɛi ndɔɔ. I fukpanin vanaa kɔlvesɛiya le yɔŋ vɔɔn ndaa. I ciinin yonga vanaa heelannda. I ɲuminin kuundian masaa kɔlvesɛiya.

¹²Vanndacieea cinnunnin te, a lonin mo hiow mɛɛ sianin diandan lo yɛ, a lonin mɛɛ sianin fula o lɛŋnde Ofir len nin-ndon lo nuaa yɛ.

¹³Kani i hiiluunin halataalaa a kɔl ni tuwvo, mì lɛŋnden le yɔɔlian o tumndo. Ya Maalii, ya Mɛlɛka-Nɔ-Kpaayaa-Kpow-vo pɛɛn. Kon tosannin paale ya cuiŋinin kɔl ni tuw bɛndoo len.

¹⁴Vanndacieea vanin paale len maa puwvɛa nda co tovɔɔ-a, te kon te, a vanin maa saa vana-vana co mɔɔsiaa nɛɛ pilɛ le-a. Vana-vana mulinnin o vanaa ndɔa lo, vana-vana mulinin hɔlla a kpengii lɛŋnde ndɔlen.

¹⁵Vana-vana nda komal pɛ, a cuukuu ndu, a buuluu ndu, vanaa nda biinin-nda, a diwnin kan a mɔɔn cɔwvon.

¹⁶Vannda pesipesinin cuavaa ndaa imamaa nda pila o hɔl. Vannda cuanin ɲɔɔn o cɛila ndalan nin, mà kpuwviaa laandaa ndaa ma va a nda.

¹⁷Tofa vɔ, i cuanin Mɛdea mà simul nda! Kani nda, a nɔ kpeku hɔlte n'voli le, a nɔ hɔlte n'siani le.

¹⁸A diwnin felengia a kpaasiaala ndalan, a nɔnin iɲíí le cɛlɛkpɛa lendea diwvo le. Cuaambɔ oo cuaambɔ nda del pɛ lehɔl, a tosanin iɲíí a ndu le.

¹⁹O kon, kobio Babilɔn, o cɔm salamayɛi masɛi-yo, kobi kɛndɛ Kaldea co kon sangalanndo-o siŋnunnin maa Sodɔm a Komɔr, kobila Hala tɛɛmbuu lan-ndan pɛɛn.

²⁰Vana cel-lɛnin lenin te few, le fɛɛn a fɛɛn nin o pe lɛ le. Nduyɛ hali Arabua tondu lɛnin cɛila-kolala ndalan ndon te, hali vanaa mandaa n'cɔlua a tosa lɛnin bɛ̀mɛ́ltan ndon le cɔlua ndaa le.

²¹Lon ɲaiyea yondoa kilanin bɛ̀mɛ́lta ndalan ni, hua vanin a piaa cɛilan nin ndon ca, soninkɔnɔa a kilanin calta ndalan ndon, cuinaa toovia vanin huuloo icilianciliannde lon.

²²Sulukua vanin kuuliaa o cɛila kɛndɛ-kɛndɛla ndɔlan nin, tivolla vanin busɔɔ o cɛila lemasalan nin. Tuma ndɔɔ co nin le tiiyaa, nduyɛ palɛi ndɔɛi bendunin te.