Read Kissi Esai 15 Bible Online

Esai 15 - Kissi bible

Esai 15

¹Sɔɛi dimin le tambii lɛŋnde Moab len-nde yɔŋnun hee ni: «Ɲumma ɲɛ tambɛiyo luɛi o kobio Ar-Moab nin-ndan, o ɲumma pilɛma man nin o piɔl ni vɔ́-vɔ́! Ɲumma ɲɛ tambɛiyo luɛi o kobio Kir-Moab nin-ndan, o ɲumma pilɛma man nin o piɔl ni vɔ́-vɔ́!

²Vannda co helɔɔ o cɛi máándo nin, a co kɔlan Dibɔn. A co kɔlan o fondala soolaalan le caŋndo, vannda hel Nebo a Medeba ma va somisominndo. Vannda kpede a sendi bolle, nda kpow a sendi siaiyon.

³A vownun volɔɔla yuululan ma cal o nɛilan lekɔɔ, nda kpow a co caŋndo, sominndo a mɛmian tuisio o kolokololan a o fallon kpow coo.

⁴Vannda Hɛsbɔn a haa Eleale co koŋullo coocoo, vana lo Yahas pɔ́ ma tuei nda diom, hali vanaa cɔwva Moab a co caŋndo taw. Kɔltan la co nda ɲiiyaa nin nákà-nàkà.

⁵Kɔl nuu co yondaa a mɔnɛi biyɔɔ le lɛŋnde Moab len, kani vanaa ndɔa co ɲaanɔnndo ma va kɔnndan Soar, háá Ɛklat-Sɛlisia, a co pembei Luhit helɔɔ a caŋndo, ma va kɔlan o nɛi Hɔrɔnaim-ndo coo a koŋullo kpélén.

⁶Mɛnndan Nimrim ma tambu mi ma vela sɛ́ɛ́n. Billo vesan, bil pɔmbɔ tala lɛŋ-ndo tambu, bil puiyaa bɛɛ co lɛ hali ɲɛ-pɔmbɔ le.

⁷Lelan nda co ɲɛm ndan tɔ̀un lo-on cɔwviaa ni, ma va kɔlan a ɲɛm ndan sɔlan o pee pɔmbɔ yɔmii pɔmbɔɔ leeloo.

⁸Kani koŋullo a caŋndan la tiw o lɛŋnde Moab len nin kpow. Cɛɛŋɔnnda ndalan la co kɔlan tiiyaa háá Ɛklaim, somisomin ndaa co tueinɔnndo háá Beɛr-Elim dí.

⁹Mɛnndan Dimon ma pɛ cá a koovan. I tuisinin vɛlɛ dɛnnda palaala celen o kobio Dimon coo. Yàlàá tisanin vanaa lonin yoomu Moab-a coo, o delnin vanaa lonin yoomu o lɛŋnde len nin-nda coo!»