Read Kissi Esai 18 Bible Online

Esai 18 - Kissi bible

Esai 18

¹«Dɛnɛ palaa co le lɛŋnde ɲaa labɔɔa hiw kuiyo nin-nden, o peela bɛndulan Etiopii leeloo pɛɛn!

²Niaa co kiilaa niaa vomɔɔ ni ma va keiyo o mɛmma ihɛllan coo, o dɛ̀ndɛ̀la toosian a cɔ́ɔ́cɔ́ɔ̀an-ndan nin. Kiilaa keleŋa taw-va, la kɔ! La kɔ o vanaa-mangalaa-isɔaa bandu kan taw, mà nɔ kɔɔle ningilaalen-nda lo, vanaa co kan kpúlúnkùmaa kandɔɔ paandu háá hau-va pɛɛn, vanaa-mangalaa-isɔaa nɔ kan kpaaya bɛndoo-a, a co kan vannda bɛpɛlaa-a, a lɛŋnde ndalen le co kan lekilikiliaalen a peelan-nden.

³Niaa vanaa co o ceendo coo-a kpow, niaa co icali o lɛŋnden coo-a kpow, la tofa vɔ lɛfɛ nda co heeloo o pembon coo-o. La yaŋ-ndɔ nilan mì la tuei bulu co hɔŋnɔnndo-o!

⁴Kani nuaa Mɛlɛka dimul-la ni aa: ‹I connun o calta nilan nin yili mi va tofaa maa a telen hangul tuw-tuw paale kala ŋama-ŋamaa, maa a telen yumbuyumboo tenga nuaa, mí hangullo va boondii koavaa n'malle-o.

⁵Telen pá tuma kiandaa n'rɛsɛnndo tiiya, te rɛsɛnndon cuu pɛ yandɔɔ, mí yandɔɔ kon siŋnun rɛsɛŋun kullon, mí n diw, o kon vannda kili lɛvun rɛsɛn tum kon a lɛɛndo. A kili pɛ lende, a faaŋiaa lɛvun kum mun toon o tumndo.

⁶Kon kpede malnunnin le yovaa biyaa co o pembon coo-a, a le visia yondoa co o lɛŋnden coo-a. Yovaa biyaa tosanin vɔɔlen lecoo, mì visia yondoa tosa sialten lecoo.

⁷O telen kon nin, vanaa-mangalaa-isɔɔa nɔ kan dialun kalan a yoomuan-nda cuunin Mɛlɛka-Nɔ-Kpaayaa-Kpow-vo keo, vanaa co kan kpúlúnkùmaa kandɔɔ háá hau-va, vanaa-mangalaa-isɔɔa nɔ kan kɔɔle ningilɛilen-nda, a co kan vannda bɛpɛlaa-a, a lɛŋnde ndalen le co lekilikilialen a peelan-nden pɛɛn. A hunnin a ɲɛm-kéan mun nɛɛ diola Mɛlɛka lan la co piɔlnɔnndo-a, Hala-Nɔ-Kpaayaa-Kpow-vo pɛɛn, o pembei Siɔn coo.›»