Read Kissi Esai 19 Bible Online

Esai 19 - Kissi bible

Esai 19

¹Sɔɛi dimin o lɛŋnde Esipte len coo-e yɔŋnun hee ni: La tofa vɔ, Mɛlɛka hel o yumbuyumbu felun-felunndo coo, o co hunɔɔ o lɛŋnde Esipte len nin. Piɔmaa co o lɛŋnde Esipte len nin-nda co ɲiiyaa ndu laci, kɔlta Esiptea la fula yoomuan po.

²I co sɔngɔɔ malɔɔ Esiptea tɛɛn, mà simulan vellaa-velle, vanndo cɔlɔbanin nda puapilɛ ndɔɔ, vanndo cɔlɔbanin nda caan ndɔ, kobio cɔlɔbanin kobio, masalen le cɔlɔbanin masalen.

³Yiyan Esiptea laasiannin nda tɛɛn. I laasiaanin sɔɔn lelɛŋun ndan. A kɔanin ma kɔ sooluu piɔmnda, ma kɔ viom yavalan o mandea lo, o vanaa suukan a vanvílɛ́iya-a lo a o vanaa dimi siɔdii lacio-a lo.

⁴I malnin Esiptea vana bɛndu kɔlvesɛiyo pum o ba, masa kɔlvesɛiyo pum tosanin masalen nda coo. Maalii soo lende ni, Mɛlɛka-Nɔ-Kpaayaa-Kpow-vo pɛɛn.

⁵Mɛmma ihɛllan ma velanin o peelo, pee bɛndoo velanin mì pee kɔ́llo vesa tadi.

⁶Peela pɔmbɔlan la tumulnin, mì tɛiyun mamɛnndon Esipte n tol mì n vela. Cɔ́ɔ́cɔ́ɔ̀an a kpɛ̀ndɛ̀an ma vesanin sɛ́ɛ́n.

⁷Cɔɔcɔɔan o peo Nil demullo, cɔɔcɔɔan nɛɛ peo Nil del o mɛmma ihɛllan coo-a a ɲɛ-ɲɛ tɔlnun o pee kon demullo-o vesanin kékélé, mò saŋnun fásàn, ɲɛ-ɲɛ lonin ndon te.

⁸Mɔnɛi biinin vanaa yɔɔyaa, vanaa landaa n'dolinnda cɛɛŋunnin, vanaa bayiaa yalalan o mɛnndan nin-nda ŋɔɔciannin.

⁹Vanaa co funnden tɔndaa-a a vanaa co kolala keeselan lɔu a yɔɔsɔla humbulan-nda somisominnin.

¹⁰Vanaa bɛndua lelɛŋnda a vunin diallon ma yɔkpa, mɔnɛi luɛinin vanaa co baalaa tosaa le salaa sɔlaa-a o lakɔl.

¹¹Diɔmaa sondo vesɛiya kposon cuavaa lemasaa Soan co ni. Vanaa kɔlkalua sila masaa Esipte-a kila kunda diɔmnda. Vɛ mi la vesa hɔlla mi la dimul masaa Esipte aa: «Naa naa, poaa vanaa kɔlkalua naa n co ni, poaa masaa paandua naa n co ni»?

¹²Kuɛɛ nɛ vanaa kɔlkalua niaa kan co yɛ niko? Mɛɛ a cɔɔmuu niko dɛnnda viannanndan, a cɔm niko niaa ɲɛ Mɛlɛka-Nɔ-Kpaayaa-Kpow-vo kelu le lɛŋnde Esipte len tosallo-o.

¹³Cuaa lemasaa Soan siŋnun vanaa seemɛiya, cuavaa lemasaa Nɔf luɛi o diɔmii sondo vesɛiye. Vanaa co bolii lapangɛi-ya laasiaa lɛŋnde Esipte len.

¹⁴Mɛlɛka cucu kɔl yulan-yulanndo nda tɛɛn haliko ma tosa mì Esiptea laasian o dɛnnda ndalan nin mɛɛ vana kolaa mamɔiyo siɛla mò del, mò lɔngɔlian o ɲɛ o kuusuu-o nin nuaa yɛ.

¹⁵O kon, kandɔɔ o bollen háá o tumndo, vana-vana nɔlanin ɲɛ-ɲɛ tosa le Esipte le, hali siɔ̀ɔ́ vawvo a kpɛ̀ndɛ̀len le nɔlanin ɲɛ tosa le!

¹⁶O palɛi ken nin, Esiptea vanin maa vanlaandua nɔ mayoomu le-a, telen Esiptea canin Mɛlɛka-Nɔ-Kpaayaa-Kpow-vo baa heeloo le nda lɔɔ-o, a ɲiiyanin a siòònde ma vow.

¹⁷Tanda Yuda-o vanin ɲɛ vueeinanndo le Esiptea ni, lɔ́ɔ́-lɔ́ɔ̀ vana dimi pɛ diola ndɔlan nda o hɔl, siòònde bii nda, a yɔŋnun yoloma-yoloma, kon tosannin le dɛnɛ palaa Mɛlɛka-Nɔ-Kpaayaa-Kpow-vo kelu le Esiptea kan tuisio coo-o.

¹⁸O palɛi ken nin, kobilan tan ŋuɛɛnu la vanin Esipte, vanaa vanin lenin-nda diminin sɔɛi mangalɛi Hebreea, a mɛnannin o diola Mɛlɛka-Nɔ-Kpaayaa-Kpow-vo lan. Kobila lan, o pilɛ nɔnin diolan aa: Kobi ɲɛ tambɛiyo.

¹⁹O telen pilɛ kon nin, a cownin Mɛlɛka fonda-loamaa-lasálàá o lɛŋnde Esipte len tɛɛn, a tɔalnin pow sálàá o lɛŋnde Esipte len pɛɛngulan, le bɛɛle Mɛlɛka len cɔmndo.

²⁰Ɲɛm mun vanin tɔɔmaseloo a seilen le Mɛlɛka-Nɔ-Kpaayaa-Kpow-vo o lɛŋnde Esipte len nin ni. Lɔ́ɔ́ Esiptea koŋulnin o Mɛlɛka lo a vanaa co nda saangiaa-a o sondo-o, Mɛlɛka vimnin nda vana baŋaa a vana soaa le nda-o le nda ciindiaa.

²¹Mɛlɛka cɔmnunnin Esiptea ma sina ndu o palɛi ken nin, a solulnin ndu sálàla n'cɔlulan a sálàla kpeyanndan, a baanin yoolen o Mɛlɛka lo, ma timbi len a sɔɛi ken peeloo.

²²O kon, Mɛlɛka soaŋnin Esiptea, a toɲa, o soaŋnin nda, kɛ o singinin nda, o kon a mangalannin ma muli hɔlla o Mɛlɛka lo. Mɛlɛka mulinin piɛile ndalen mo singi nda.

²³O palɛi ken nin, nɛi bɛndoo cannin Esipte mo kɔ tiiya háá Asiri dí, Asiriia kɔanin o lɛŋnde Esipte len nin, Esiptea bɛɛ kɔanin o lɛŋnde Asiri len nin. Esiptea nda Asiriia a tosalnin (Mɛlɛka) baalaa latulu.

²⁴O telen pilɛ kon nin, Israɛlla vanin kunda yàándɔɔ ni, a handunnin Esiptea a Asiriia coo, mì lɛŋii sala yaai ken siŋnun duaa le lɛŋnden kpow.

²⁵Mɛlɛka-Nɔ-Kpaayaa-Kpow-vo dɔawnin nda duaa mò dimi aa: «Duaa co le Esiptea, yungu nuu nda co ni, duaa co le Asiriia, vali bala nilan la tosa-o nda co ni, duaa co le Israɛlla, nda co kɛ́ nuu ni!»