Read Kissi Esai 2 Bible Online

Esai 2 - Kissi bible

Esai 2

¹Sɔɛi dimulun Esai po Amɔt-o le tàndá Yuda-o a le kobio Yerusalɛm o kɔɔ-e yɔŋnun hee ni:

²Ɲɔɔ yɔŋnunnin o palɛi co hunɔɔ siɔdii laci-e nin, mì pembii Cɛi-Mɛlɛka-o co coo-e sim o pembun bɛndon kpow bollen, mì i bandu háá mì i hiow pembun pɔmbɔn. O kon, vanaa-mangalaa-isɔɔa kɔanin ndon sɛ́lɛ́ bɛndoo taw.

³Vannda súúlan taw a kɔanin ndon taw-taw mà dimi aa: «La hun mì n helnun o pembii Mɛlɛka-e coo! N helnun o Cɛi-Hala Yakɔb-o nin haliko mo pɛɛku naa nɛila ndɔlan, mì n kela o nɛila o cɔmnin naa lan coo. Kani Siɔn tɔŋndo fulanin ni, Yerusalɛm sɔɛi Mɛlɛka-e fulanin ni.

⁴Ndu kialunin yamɛi vanaa-mangalaa-isɔɔa tɛɛn ni, ndu vanin vana dimi diom mɛɛlaa vanaa súúla celen tɛɛn-ndo ni. A cuanin mɔɔn ndan cɔwvon mà cɔw dɛndɛla vaalan a mun, a cɔawnin vɔlɔtɔlan a bálta ndalan. Kani vanaa-mangalaa-isɔɔ súú-súù a cue lɛnin mɔɛi cɔwve le kɔlan a celen delɔɔ coo a cɔwvo le, vana-vana pɛi lɛnin cɔwvo le.

⁵Niaa cuavaa Yakɔb-a, la hun mì n kɔɛnnun o ɲɛ-tengaa Mɛlɛka-o nin!

⁶Éé Mɛlɛka! A mal yungu nɔmndo, pulun Yakɔb-on pɛɛn. Bau a luei balan o sɔɔn lemaden fula a ba paalen le can-ndo-on nin taw-taw, a luɛi mangalaa maa Filistia, kani a co yiinanndo a cuavaa mialla taw-taw.

⁷Lɛŋnde ndalen le pɛ a volion a sianion, bolofaa ndaa nɔ lamɛɛlu le, lɛŋnden le pɛ a soa, ɲɛla ɲaanannda sofɛlɛa nan-ndan la cuu cɔm te.

⁸Lɛŋnden ndalen le pɛ a piɔmnda, a co vulan baŋɔɔ ɲɛm nda cɔw a bala ndalan-ndon o labɛngunin, ɲɛm nda toosiaa a sun ndan-ndon pɛɛn.

⁹Lelan, vanndacieea baŋnin vulan, mà tuisinnin tootoo. Mal nda haki le dɛ!

¹⁰La luɛi o powta kpovalan bɛngu, la vionnun o lɛŋnden bɛngu, yɔŋii kɔltuw Mɛlɛka-o a ɲɛ-tengaa ŋuanndi-ŋuanndi co fulaa o vanabɛnduyɛi ndɔɛi nin-ndo tol niaa coo!

¹¹Siɛmbulan la toalnin vanaa heelannda, mì vanaa kuundiannda tol tootoo mɔlɔmɔlɔ. Mɛlɛka ndu pilɛ kpé sɔlanin heeloo ɲinkon ni!

¹²Kani Mɛlɛka-Nɔ-Kpaayaa-Kpow-vo nɔ paalen le vanaa kuundiannda, vanaa heelannda a le vanaa co cuannɔnndo-a cɔlɔbaa haliko ma tuisin tootoo,

¹³Paale Mɛlɛka nɔ len-nden le co vɛlɛ le yɔmii sɛɛdree Liban kpow, i bandu mì i celul-le, le yálánnde Basan kpow,

¹⁴le pembun vilɛiyon kpow, le pembun pɔmbɔn hel taw-von kpow,

¹⁵le cɛila coocoola vilɛilan kpow, le kpakila celulaalan kpow

¹⁶le dɛ̀ndɛ̀la mamɛnndan Tarsis kpow a le ɲɛ-ɲɛ naŋ o tofaa a lehɔl cɔlɔbaa!

¹⁷Siɛmbulan la biinin vanaa heelannda mì vanaa kuundiannda tol tootoo mɔlɔmɔlɔ. Mɛlɛka ndu pilɛ kpé sɔlanin heeloo ɲinkon ni!

¹⁸Piɔmnda kpow a ve lɛnin te.

¹⁹Paale Mɛlɛka cannin le lɛŋnden vueinɔnndo len, ɲɛ-tengaa bɛndoo vanin fulaa o vanabɛnduyɛi ndɔɛi nin. Paale len, vannda luɛinin o buulula powta kpowa lan nin, mì a tiŋ luɛi o lɛŋnden bɛngu a siòònde.

²⁰Paale len, vanndacieea viwlulnin tɔngannda a cówva[1] piɔmaa nda cɔw a volion-nda, a piɔmaa nda cɔw a sianion le nda sooloo-a.

²¹Mì nda pila luɛi o tɛɛngun powta kpovalan nin a o tɛɛngun lapowvon nin, yɔŋii kɔltuw Mɛlɛka-o a ɲɛ-tengaa vanin fulaa o vanabɛnduyɛi ndɔɛi nin-ndo tol nda coo telen Mɛlɛka cannin le lɛŋnden vueinɔnndo-o!

²²Yɛɛ nɛ vanacieo co yɛ kpeekpei!» Yoomu co ndu o milin-ndo bendu le. Lelan, la pɛngi vanacieo kɔnganndo.