Read Kissi Esai 25 Bible Online

Esai 25 - Kissi bible

Esai 25

¹Àá Mɛlɛka, nɔm co Hala nuu ni! I sangalanin nɔm, i lisanin diola nɔmndan. Kani a tosa dɛnnda kɔndɔfiltan, dɛnnda kɔndɔfilta n tuu le tosaa kabi sindɛ lan, a lo o lediom coo ma peelu lan sakpo.

²Kani a siinguu kobio ho bémbé bɛndu lapowvo, a mingi kobi mayoomoo ho bémbélan kposon. Fonda mayoomu vanaa súú celennda ha tambu, le fɛɛn nin o tengulun ndɛnin te.

³Lelan vanaa-mangalaa-isɔaa kpaayaa co nɔm biiloo ni, kobila kpaayala vanaa súúla celeŋaa nɔ iɲíí le-a nɔ siòòŋii nɔmnde.

⁴Kani nɔm yɔŋnun nɛɛ viannannda le vanaa nɔ mayoomu le-a ni. Nɔm yɔŋnun nɛɛ viannannda le vanaa bala fondoa va o mɔnɛi nin-nda ni. Nɔm yɔŋnun nɛɛ viannannda le hoeyii fùkù-fùkùi va hɔŋndo-e ni, nɔm yɔŋnun vunduan le hangul lepalaa vionnɔnndo ni. Bau hoeyii kɔltuvii fula vanaa kɔlvesɛiya o milin-nde, maa hoeyii fùkù-fùkùi co kundɔnndo o kpakio-e i co ni,

⁵hoeyii ndɛi ken co vɛlɛ maa hangul co o lɛŋnde veselɛile tuwlen nin-ndo. Kɛ nɔm, a kpaa vóólun-vóólunn vanaa súúla celennda ha. Mɛɛ vunduma yumbuyumbuan ma dɔɔniaa hangullo yɛ, lende koni n kpaa condun vanaa kɔlvesɛiya ha ni.

⁶Mɛlɛka-Nɔ-Kpaayaa-Kpow-vo tuisi kafo diaa le vannda súúlan kpow o pembei he coo, o toosiaanin ɲɛm dian yeelɛiyon, mɔima kálà-kálàn, visin macuɛiyon a mɔima kálà-kálàma yueinun-ndan.

⁷O sɛɛsiaanin kola vaan-vaan co o kuumbuanndo vannda súúlan kpow coo-o o pembii ken coo, kola kuumbun vanaa-mangalaa-isɔɔa kpede coo-o pɛɛn.

⁸Mɛlɛka tɛɛmbuunin piɔ́mndo le fɛɛn a fɛɛn. Maalii Hala vɔɔsuunin vannda kpow mɛmɛan o lahɔl. O faŋanin siɛmbula bɛɛtambɛila vanaa ndɔa o lɛŋnden kpow coo. Mɛlɛka soo lende ni.

⁹Vannda diminin paale len aa: «La tofa vɔ Hala naa!» O ndu coo naa n kɛsi kɔllo ni, ndu baŋa naa ni. Ndu co Mɛlɛka ni, ndu naa n handu laalan naa coo ni. Lelan, n naŋnun kɔl mì n dɔwnun ɲaale le cinda o nɔ-o.

¹⁰Kani ba Mɛlɛka-o co o pembei he coo, lɛŋnde Moab len le nɛwnunnin a labɛngu o fonda ndɔɔ, mɛɛ vana nɛw foeende o sállo coo nuaa yɛ.

¹¹Vannda Moab a siɛndinin balan mɛɛ vana siɛndi balan le saanaa nuaa yɛ. Kɛ Mɛlɛka tɛɛmbuunin yonga ndaa, o solinin bala ndalan yoomuan mì la yɔŋnun lɔngɔmɛn.

¹²Niaa Moabua, Mɛlɛka koombiaanin kpakila niaalan a fondala mayoomula niaala vana tiwba luɛyɔɔ nin te lan, o koombiaanin ndan mì la deli o cundoo nin lɛŋ.