Read Kissi Esai 28 Bible Online

Esai 28 - Kissi bible

Esai 28

¹Dɛnɛ palaa co le mɔsil lemasa co ɲɛ kuundian vanaa kolaa mamɔiya o tàndá Efraim-ndo nin-ndo. Dɛnɛ palaa co le punga bil kɛndɛ-kɛndɔɔ, o co kon volio ŋɛlɛngi-ŋɛlɛngi o cuɛinɔn ndɔɔ coo-o, punga bil co kon o pembii dɛɛla naŋ tɔlɔɔ-o balu-e coo-o. Dɛnɛ palaa co le niaa vanaa kolaa mamɔiya!

²Kani tofa vɔ, Maalii nɔ langbanɔ mayoomu nɔ kpaayaa-o o ba, kpaaya ndɔɔ co maa piɔɔ loeon deliaa, maa hoeyii fùkù-fùkùi tɛɛmbuu ɲɔɔn-nde, maa piɔɔ hoeyii bɛndu tosa mi mɛnndan ma pɛ o peela pɔmbɔlan, mi ma va ɲindɔɔ taw-ve. O ɲindunin mɔsil lemasa kon lɛŋ dí a kɔltuwvo.

³Mɔsil lemasa kon nɛwnunnin a labɛngu, mɔsil lemasa kuundian vanaa kolaa mamɔiyaa co o tàndá cuavaa-imamaa Efraim-nda nin-ndo pɛɛn.

⁴Punga bil kɛndɛ-kɛndɛ co volio o cuɛinɔn ndɔɔ coo-o yɛ, punga bil co kon o pembii dɛɛla naŋ tɔlɔɔ-o balu-e coo-o, o vanin maa buumbun keleŋa divɔɔ-on, vana ce mun pɛ, o kɛndu mun, n tiiya dɔ́ɔ́ pɛ ndu o ba, o mɛɛnun, o mel.

⁵O palɛi ken nin, Mɛlɛka-Nɔ-Kpaayaa-Kpow-vo vanin mɔsil lemasa ŋɛlɛngi-ŋɛlɛngio le vanaa ndɔa lonin yoomu-a ni.

⁶Ndu vanin kɔl dɛnɛ sandaa le vana co yamɛi kiolɔɔ o fonda kialaa n'yamaa-o ni, ndu vanin yoomuan le vanaa co yaamɔɔa tovɔɔ háá o diola luɛyaala kobio-a ni.

⁷Kɛ nda bɛɛ laasian a mɔiyan kolɔɔ, mɔima nɛyaa-nɛyan ma co nda hɔlla hiŋndo. Kpòkóó dɛnɛ! Vanaa-solia-lasálàá a vanaa-tɛɛngaa-diom Hala-a co siɛɛliaa a mɔima kálà-kálàn o lahɔl tuŋ. Mɔiyan ma cii nda sɔɔsiaa kpede, mɔima nɛyaa-nɛyan ma cii nda mingi talaka-talaka. A co laasianndo o vunduan cɔu nin, a co kuuviaa o yaman kiolɔɔ nin.

⁸Tabalila ndalan la co lakumbaalan a ɲɛm nda kuusuu-on, a linda lan a bɛɛtambɛi nda kon kpow. Fonda oo fonda sɔvɛ co lɛ lon te.

⁹Nduyɛ a co dimio aa: «Nɛ̀ɛ́-nɛ̀ o yeema yɛ le kɔlkaloo pɛɛkoo? Nɛ̀ɛ́ o yeema yɛ le silalan yɔngoo? Mò va maa cɛlɛkpɛa nda hiwnun sɛnɛi labɛngu-a baa? Mò va maa cɛlɛkpɛa langa mal mɛɛlen-nda ni?

¹⁰Kani tɔŋndan tuŋ o co handɔɔ o tɔŋndan coo ni, silalan tuŋ o co handɔɔ o silalan coo ni, silà láà silà! O dimi pɛ ɲɛ-pɔmbɔ nanu, o kɔ dimi ɲɛ-pɔmbɔ o nda.»

¹¹Le hee, o diomnda lɔngɔlɛilan nin a o sɔɛi mangalɛi súú celen nin Mɛlɛka soaanin o vannda ha lo ni.

¹²Ndóò dimul vanaa kan ni aa: «Fondaa ho fonda pɛngiaa o co ni, la mal vanaa sanga-a mà pɛngi nanu, fonda vana vannun o nila ɲulu nin-ndo co hoo ni. Kɛ a cɛl le ndu nilan yaŋɔɔ le.

¹³Lelan, sɔɛi Hala-e vanin le nda tɔŋndan o tɔŋndan coo, silalan o silalan coo, silà láà silà! O dimi pɛ ɲɛ-pɔmbɔ nanu, o kɔ dimi ɲɛ-pɔmbɔ o nda.» Haliko a va pɛ kɔlan, a deli macali, a yimi vongalan pɔsu-pɔsu, haliko ma kayakayan o yalalan nin, ma haw.

¹⁴Lelan, niaa vanaa mamaa n'vannda, la yaŋ nilan o sɔɛi Mɛlɛka-e, niaa vanaa co haa Yerusalɛmnda masalen tosaa coo-a!

¹⁵La co dimio aa: «N yii kpemaa a piɔ́mndo, n cii cɛlan diom a ciee-piɔ́m, hali kpundɛ bɛndoo del bɛɛ, o komalnin naa le. Kani nɛɛ viannaŋaa naa co vanafondoyɛi ni, yasabaa naa n yifan nin-ndo co còòlan ni.»

¹⁶Le hee, la tuei-yɔ sɔɛi Maalii Hala dimi-e: «Tofa vɔ, i tɔl powvo Siɔn le vaa pow kilaa cɛiyo, mí fula pow kalaa kɔɔli kɛ mí ca maa o nɔ isɔw le. Pow lebol kendu vɔngoo taw-vo o co ni, o co o tɔalaa ɲɛkɛndɛi, vana-vana tiindan pɛ pow kalaa, o yɔŋnun yoloma-yoloma mò sɔndan te.

¹⁷I siinguunin sakpoyɛi yoole tuvaalen, mì siinguu dɛnɛ sandaa pɛngɛi nda tuu sandii ɲɔɔn-nde. Kɛ loeon delian kɔandunin vanafondoyɛi niaa venun nin-nde, mì mɛnndan ma tiw o yasabaa lacòòvaa niaa cal nin-ndo nin.

¹⁸Kpema co piɔ́mndo tɛɛn a niaa-o tambunin, cɛlan co niaa tɛɛn a ciee-piɔ́m-ndo lonin te. Te kpundɛ bɛndu kon del pɛ, o nɛwnin niaa, mò pesipesi niaa.

¹⁹Telen oo telen kpundɛ kon del pɛ, o komalnin niaa, kani o vanin tosanndo idii oo idii, o vanin tosanndo paalen a ɲumndan. O vanin dɛnɛ isiòòn bɛndu-bɛndoo le yoongu kpundɛ kon nɔ-o biyɔɔ bila.

²⁰Kpele hinia vanin o bingi kucɛ le siɛndinndo lecoo, kola kuumbanndo bɛɛ vanin o pɔmbɔ pioondon le simbulɔnndo lenin.

²¹Kani Mɛlɛka cannin maa mɛɛ o tosa o pembei Perasim yɛ, o tuulunin kɔl mɛɛ o tuulu kɔl o dɛɛlaa Kabaɔn nin yɛ, mò tosa baala ndɔɔ, baala ndɔ kaamaa, le vali ndɔɔ tosaa, vali ndɔ kɔndɔfillo!

²²Lelan sunsun, la pɛngi vannda mamɔɔ, yɔŋii yɔlɔn nda yii niaa-on ŋɔwnun peŋ, kani i cuu kiolɔn le lɛŋnden kpow tambei. Maalii, Mɛlɛka-Nɔ-Kpaayaa-Kpow-vo o sondo ya tuei ndi ni.

²³La yaŋ-ndɔ nilan, la yaŋnun diom nuu! La mei-yɔ kpili mì la tuei sɔɛi ya co dimi-e!

²⁴Mò va maa telen oo telen vana váà vàà cɛi ndɔɛi le kullon saŋɔɔ ni? Mò va maa lɔ́ɔ́-lɔ́ɔ̀ o tui lɛŋnden mò koŋ ɲɛ vàá ni?

²⁵Mɛɛ o tosa yɛ co hoo ni: o cii pɛ ɲɔɔ vayia mo mingi ndu tɛlɛlɛ, o sɛŋi kulun tɔlɔɔ Nisɛl, o saŋ kulun tɔlɔɔ Kimɛn, o saŋ maalon a polan, o saŋ ɔrse o fonda bɛnda-o. O kon kɔɔli, o saŋ sɔkpɔn o dangaltan.

²⁶Hala ndɔɔ pɛɛku ndu nɛi o bɛnda le kɔlan coo-o, o yɔngu ndu silalan le kelaa lecoo.

²⁷Vana nɛi tɔlɔɔ Nisɛl le kulun ndɔn cɛɛluuo a ɲɛ ɲaanan soa nan-ndo le. Vana kei ɲɛ ɲaanan soa nan-ndo o tɔlɔɔ Kimɛn coo le kulun ndɔn cɛɛluuo le, kɛ a yɔmii bingiei vana lɔaa tɔlɔɔ Nisɛl ni, a siondoei vana lɔaa tɔlɔɔ Kimɛn ni.

²⁸Vana lɔaa maalon, kɛ vana loo mun lɔ́ɔ́-lɔ́ɔ̀ le, vana ɲindu ɲɛ ɲaanan soa nan-ndo a cɔlua kan ma kei lecoo, kɛ vana pesipesi mun te.

²⁹Mɛlɛka-Nɔ-Kpaayaa-Kpow-vo o ba kon bɛɛ fula ni, sila ndɔɔ naŋ o tueyɔɔ, kɔlkalu ndɔɔ co o bɔɔ.