Read Kissi Esai 33 Bible Online

Esai 33 - Kissi bible

Esai 33

¹Dɛnɛ palaa co le nɔm co caanda tɛɛmbuuo-o, vana tɛɛmbuu vɔ nɔm too. Dɛnɛ palaa co le nɔm co caanda huiyo, vana hui-yɔ nɔm too. Lɔ́ɔ́ n ciinin caanda tɛɛmbuu-o, nɔm bɛɛ vana tɛɛmbuunin nɔm! Tuma n ciinin caanda hui-yo, nɔm bɛɛ vana huinin nɔm!

²Éé Mɛlɛka! Tuinun naa iɲíí yandi, nɔm naa n tiindan ni. Va vana mala naa idii oo idii-o, va vana baŋa naa o palɛi sangɛi nin-ndo!

³Te diom nɔmndo soo pɛ maa letaŋ, vannda ɲaanun a sɔɔndian, te nɔm Mɛlɛka cɛn pɛ isisi, vanaa-mangalaa-isɔɔa piɔl pulupulu.

⁴Vannda co ɲɛm nda puu niaa o ba o cɔwvo-on cɔwviaa mɛɛ kambalaa-sóónɔa punga tɔlɔɔ o dioo nuaa yɛ, a co mun pungaa a kiltan mɛɛ sóónɔa kundaa dia tɔlɔɔ yɛ.

⁵Mɛlɛka connun coocoo pɔɔli, kani o fonda hiow helɔɔ-o nin o co icali ni. O pei Siɔn a sakpoyɛi a á dɛnɛ sandaa.

⁶Palɛi niɛi vanin o kɔlɲuloo nin, o kɔlkaloo nin a o dɛnɛ sinaa nin cindaa cɛn tum ni. Siòòŋii Mɛlɛka-e co bolofaa Siɔn-ndo ni.

⁷Tofa vɔ, kuubaa cɔwva co koŋullo o nɛilan coo, kiilaa kɔa a kɔlɲuloo-a co caŋndo fúkpàà-fùkpàà.

⁸Nɛilan la lo fondo, vana co lɛ kei o nɛila pɔmbɔlan coo le. Vana tɛɛmbua tɛɛmbuu kpemaa, o kɛɛ kobilan, o nɔ lɛ lebɛɛ a vana-vana le.

⁹Lɛŋnden le co o sanga bɛndoo nin, le co o mɔnɛi nin, lɛŋnde Liban-nden le lɔngɔlian, le luɛi kɔsɔ, dɛɛlaa Saron siŋnun maa lɛŋnde veselɛi. Yɔmnde caa mì pei cɛɛlun kpow o tàndàá Basan nin a o pembei Karmɛl coo.

¹⁰Mɛlɛka dimi aa: «Sunsun i co cɔnɔn isisi, sunsun i co bɔɔbɔɔyɛi nii cɔm, sunsun i co helnɔn tema.

¹¹La cua foli tɛwvo mí la vialu foeende. Hoeyii fula niaa pila o milin-nde co maa leyin, hoeyii ken loamnin niaa ni, kani yɛyii vana saŋnde ndi koni n koaw ni.

¹²Vanaa súúla celen ŋɔanin a yinnde pow humbulen maa mɛɛ yɔɔn nda kili-on ŋɔa o yinnden nin yɛ.»

¹³Niaa co levil-la, la yaŋ-ndɔ nilan mì la tuei ɲɛ ya tosa-o! Niaa co macɛlu-a, la sina mɛɛ kpaayaa nuu co o bɔɔ yɛ!

¹⁴Siòònde bii vanaa lahakia o kobio Siɔn nin, vanaa vo Hala le-a ɲiiya nákà-nàkà. A co dimio aa: «O naa tɛɛn, nɛ̀ɛ́ cal-lɛnin o yinnde sal-te co len kuuliaa len ikɛi? Nɛ̀ɛ́ lo yɛnin o yelenyelen fɛɛn-fɛɛndo ho ikɛi?

¹⁵Fɔ vana co kelaa o dɛnɛ sandaa coo-o, vana co sɔɛi a sandei lɔ́ɔ́-lɔ́ɔ̀-o, o kɛɛ ɲɛm sɔlan delɔɔ coo-o, o koaŋ bala ndɔlan mo kɛɛ luɛyɔɔninndo-o, o kinda nila ndɔlan yɔŋii o tuei sɔɔn diyaa n'vanndon-ndo, o kinda hɔlta ndɔlan yɔŋii o cɔ dɛnɛ vɔɔndo tosanndo-o.

¹⁶Vana súú vaa lendeo ndu calnin o fondala yesalan coo ni, powta kpovala bɛndulan la vanin calta ndɔlan ni, ɲɛdiaa yɔngunin ndu mì mɛnndan ma kennun ndu.

¹⁷Hɔlta nɔmndan la canin masaa o naŋɔɔ ndɔɔ nin, la mɛɛndannin lɛŋnden mɛɛ le nɔ buo a bandei yɛ.

¹⁸Kɔl nɔmndo loonunnin a siòòŋii bii nɔm pandu-e, o kon a ɲunannin aa: «Ɔ́ɔ̀ nɛɛ vana sɛvaa coo-a? Kuɛɛ nɛ vana mandaa bolofaa co yɛ? Ɔ́ɔ̀ vana va keiyo cɛila coocoolan mɛɛndanndo-o?»

¹⁹A ci lɛnin vanaa hɔlta vesɛiyaa kan te, vanaa sɔɛi ndɛi mangalɛi co kan yɔɔluyɔɔlu-a, a vanaa bii kan sɔɛi ndɛi mangalɛi bila le-a pɛɛn.

²⁰Kɛ mɛɛndan-ndɔ Siɔn, kobi naa naa n tosa kafolan nin-ndo! Hɔlta nɔmndan la canin Yerusalɛm, nɛɛ calaa connun kan o ba ndɔɔ coo yili-a o co ni, cɛi-kola-toandaa vana bɛɛŋuu lɛnin too, o vana sungu lɛnin pikin ndɔn too, yoei cɛi-kola-toandaa kon bɛɛ i tiimbun ndɛnin te few.

²¹Kɛ nduyɛ, lon Mɛlɛka lonin ni, mò cɔm naŋɔɔ ndɔɔ le naa. Fonda kon vanin tàndápeela bɛndoo a tàndápeela bana-banaa le naa. Kɛ dɛ̀ndɛ̀la mamɛnnda cɔwla kuenin lecoo le, dɛ̀ndɛ̀la bɛndula teŋnin o mɛmma man coo le.

²²Kani Mɛlɛka co vana kialaa n'yama naa ni, ndu co vana yɔngu naa tɔŋndan-ndo ni. Mɛlɛka co masa naa ni, ndu co vana naa ciindiaa ni.

²³Kɛ nɔm, yoei nɔmnde i yɔnyɔlan, i co lɛ yɔm heelaa lɛfɛ landaa tumndo ŋɔvɔɔ le, i co lɛ kolala vuaalan tondɔɔ mì la kindun te. O kon, vannda co ɲɛm nda poonda o cɔwvo nin taw-von piɔvanndo, hali namtaa tinda-a bɛɛ co ɲɔɔn poondiaa.

²⁴O vanaa co icali lon-nda nin, vana-vana dimi lɛnin aa: «I co kɛndia le» le. Vanaa co icali o kobio Yerusalɛm nin-nda sɔlanin hakio malɔɔ le hakila ndalan.