Read Kissi Esai 34 Bible Online

Esai 34 - Kissi bible

Esai 34

¹Niaa vanaa-mangalaa-isɔɔa, la sɔɔnguu macɛlu mì la tuei! Niaa vannda súúla yɛ́-yɛ́lan, la yaŋ nilan! Lɛŋnden a ɲɛ-ɲɛ pɛ lecoo, ceendo a ɲɛm co vulɔɔ lecoo-on kpow bɛnda ma yaŋ nilan!

²Kani kɔltuw Mɛlɛka-o co hulɔn vanaa-mangalaa-isɔɔa kpede coo, kɔltuw ndɔɔ co cucɔn vanaa ndaa cɔwva kpow coo. O kelu yamɛi ndɛi le nda diwvo faw, o co hunɔɔ nda vɔm mo diw nda kpede.

³Vanvílɛ́yaa ndaa cɛɛlunnin lɛŋ ba-ba fee, vanvílɛ́yaa ndaa kan solinin cun siovɛiyo kunan-kunan. Kooma ndan ma taaliaanin o pembon coo.

⁴Ɲɛm cɔvun co o halataala-on kpow n puusiannin, halataalaa simbulunnin maa vala, ɲɛm cɔvun co lenin-ndon n delinin mɛɛ pei n'rɛsɛnnde deli nuaa yɛ, mɛɛ pei voosoei deli nuaa yɛ.

⁵Mɔɛi cɔvii nii hin yingo-yingo cɔnɔnndo o halataala, tofa vɔ, mɔɛi nii cɔvii ken i toalnin Edɔmnda coo, i toalnin vanaa ya kɛsi kan le nda diwvo-a coo, le nda yamɛi kilullo.

⁶Mɔɛi cɔvii Mɛlɛka-e co i lɔngɔlannde a koovan, i co i lindan lingili a cuɛima n'visian, i co i lindaa a kooma saa téndéa a ma cuinaa toovia, i lɔngɔlian a cuɛima vongama saa kóndóa. Kani cɔlua sálàá co Bɔsra le sálà Mɛlɛka-o solio, vannda co o lɛŋnde Edɔm-nden nin taw le nda diwvo.

⁷Cìíya cɛɛlunnin a nda latulu o telen pilɛ kon nin, navaa téndéa a navaa tovaa delinin bili-bili, lɛŋnden le lindannin a koovan mì puuloo yɔva a cuɛima n'visian.

⁸Kani paale mingiaa màálen le co len le Mɛlɛka ni, vɔsi tɛinanndo co kon ni le màá Siɔn-ndo mingio.

⁹Mɛnndan o peela pɔmbɔlan Edɔm nin ma siŋnunnin maa dukpa, cundoo o lɛŋnde len nin o siŋnunnin fungoo, lɛŋnde len le vanin maa dukpa co ŋɔu-vo.

¹⁰O ɲumnin ipala le, o ɲumnin vɛlɛ icɔl te. Kumnde vanin cɔnɔnndo lon mì i va helɔɔ coo tukpe-tukpe. Lɛŋnde len le lonin letambɛilen le fɛɛn a fɛɛn. Le fɛɛn a fɛɛn, vana kei lɛnin lenin te.

¹¹Hua a saiya kilanin caltan ndon, kpobia a basabasakoendea calnin lenin. Mɛlɛka timbinin yoole tuvaale imɔnɔlen ndon, o siɛndinin yoole tuvaale tɛɛmbualen ndon.

¹²Vana tɔ́ɔ́ ve lɛnin ndon le masaa suilio le, cuavaa lemasaa ndaa kpow, a siŋnunnin ɲɛ fondo.

¹³Yɔɔn vulnin o cɛila lemasala co o lɛŋnde len nin-ndan nin, siɛmbullon a suusiaa lakolaa vulnin o fondala mayoomulan nin, le siŋnunnin bɛ̀mɛ́lta tivolla a calta duaa.

¹⁴Ɲaiyea yondoa bɔŋannin ndon nda sulukua, cuinaa toovia veelannin vellaa-velle lon. Lon calta ɲamavulua la vanin ni, lon ɲaa vueinannda nɔnin fonda pɛngiaa ni.

¹⁵Lon kɛwva toosiaanin vɛɛŋii ndɛi ni, lon nda dɔawnin pelta ndalan ni mà kuumbun lecoo, lon nda fiasanin pelta lan o vunduma ndan bɛngu ni. Lon duàá kpow cuungiannin a ŋiɔn-ŋiɔn ni.

¹⁶La nuwviaa o sɛbɛ Mɛlɛka-o nin mì la dimi ɲɛ co o sɛvaa-o. Visia kan kpow, o pilɛ bɛɛ lonin kɔɔli le, o pilɛ bɛɛ nuwviaanin caan ndɔ mo kɛɛ ndu cɔ le. Kani Mɛlɛka dimi ndi a sondo ndɔɔ le tosaa ni, kɔl ndɔɔ cuungiaanin nda ni.

¹⁷Bau ndu pila malnin siondoei le nda ni haliko mo yɔngu o kɛ́-kɛ̀ fonda ndɔɔ, o piɔw lɛŋnden nda tɛɛn a yoolen, le vanin le nda vɔsilan o vɔsilan nin, a calnin ndon le fɛɛn a fɛɛn.