Read Kissi Esai 35 Bible Online

Esai 35 - Kissi bible

Esai 35

¹Lɛŋnde veselɛilen a lɛŋnde nɔ mamɛn te len le bɛnda mì le dɔwnun ɲaale, dɛɛla vesɛiyo bɛnda mò dɔwnun ɲaale, kani o puinin maa bil kɛndɛ-kɛndɔɔ.

²O kumbunnin mɔku-mɔku a punga billo, mò yɛkɛlan a kɔlkɛndɔɔ, mò viow kponyoo a condon a yoondiaala kɔlkɛndɛlan. Naŋɔɔ Liban-ndo yɔngunnin ndu, naŋɔɔ pembei Karmɛl-lo a naŋɔɔ dɛɛlaa Saron-ndo kennunnin ndu. A canin biilu Mɛlɛka-o ciŋ, a mɛɛndannin naŋɔɔ Hala naa.

³Lelan, la luei bala sanga lan yoomuan, la mala vula co ɲiiyaa lan mì la simul.

⁴La dimul vanaa kɔltan la hiilun nin-nda aa: «La lueí yoomuan, siòòŋii bii niaa le! La tofa vɔ, Hala niaa co hunɔɔ le màá mingio a le vana-vana sala dɛnnda ndɔlan keo. Ndu pila hunnin le niaa ciindiaa ni!»

⁵Paale len, hɔlta vanaa sumɛiya a nila vanaa nila baŋulɛiya la kumbinnin,

⁶vana pelii tambɛiyo huulunin maa kial seeli, diɛɛmule bobonɔɔ le timbinnin mò yonda a kɔlkɛndɔɔ. Kani mɛnndan ma bulinin o lɛŋnde veselɛilen nin, peela pɔmbɔlan la piɔlnin o dɛɛlala vesɛilan nin.

⁷Tàndà vesɛi tuw-tuwvo siŋnunnin dalaa, lɛŋnde polten le siŋnunnin peela leboltan. Kpɛ̀ndɛ̀an a cɔ́ɔ́cɔ́ɔ̀an ma vulnin o fonda tivolla ndáà kila bɛ̀mɛ́ltan-ndo.

⁸A busanin nɛiyo, nɛi bɛndoo o lɛŋnde len nin, a kenin nɛi kon diolan aa: «Nɛi diandaa.» Vana nɔɔlɛi keinin o nɛi kon coo le. Le yungu Mɛlɛka-o daama o vanin ni, vanaa vanin keiyo o nɛi kon coo-a, hali diɔmnda a luusiannin te.

⁹Yàlà kana venin o nɛi kon coo le, visi biyaa súú-súù keinin lecoo le, visi biyaa ndu pilɛ bɛɛ vana seelunnin lecoo le. Vanaa sɔla baŋaa-a keinin lecoo ni.

¹⁰A toɲa, vanaa Mɛlɛka baŋanin-nda muungunin, a kɔanin Siɔn a condon a á kponyoo, kɔlkɛndɛ fɛɛn-fɛɛndo vanin o kuumbuan nda o lebol vofu, ɲaaloo a kɔlkɛndɔɔ sɔɔnguunin nda ikɛi mo va le nda, dɛnɛ palaa a somisominndan la faŋannin nda coo.