Read Kissi Esai 38 Bible Online

Esai 38 - Kissi bible

Esai 38

¹O palɛi ken nin, mí Esekia del a nàá taw-taw, mó can piɔ́mndo. Mí vana-tɛɛngaa-diom Hala-o Esai, po Amɔt-o hun o ndu lo, mó dimul ndu aa: «Mɛlɛka dimi aa nɔm congun yungu nɔmndo mà cɔm nda ɲɛ nda bɛnda mà tosa-o, kani piɔ́m nɔmndo tiiya, a co cinda a naa ho le!»

²Mí Esekia muli hɔlla kɔɔli o cìì cɛiyo, mó piɛi Mɛlɛka aa:

³«Éé Mɛlɛka! Loonun maa i kela nɔm o hɔl sakpo a kɔl nuu kpow, mí tosa ɲɛ co o kɛndɛ nɔm o hɔl-lo!» Esekia lo piɛilen lende, mó caŋ fúkpàà-fùkpàà, mí mɛmɛan ma toal ndu taw-taw.

⁴O kon kɔɔli, mí Mɛlɛka soaa o Esai lo, mó dimul ndu aa:

⁵«Kɔ ma kɔ dimul Esekia aa: Nuaa Mɛlɛka, Hala David fuɲa nɔm imamaa dimi ni aa: I tuei piɛile nɔmnden, i ce mɛmɛma nɔmndan. Lelan, i cɔɔlunin yoomu nɔmndo bɛndi le vɔsilan tɔ́ a laŋuɛɛnu.

⁶I baŋanin nɔm pila a kobio ho, mì soli niaa masaa Asiri o ba, i kandanin kobio ho.

⁷Tofa vɔ tɔɔmasele Mɛlɛka yɔngu le nɔm cɔmndo maa o tosanin sɔɛi o dimi-e o:

⁸I co vunduma lepalan mingi kɔɔli le helɔɔlan tɔ́ faŋaa nɛɛ maa tol nin o helɔɔla Ahas lan coo-a. O kon mí paalen le muungu kɔɔli le helɔɔlan tɔ́ cɔnɔnndo nɛɛ léè tol-la.»

⁹Condii Esekia va masaa Yuda-o soli o naa ndɔɔ coo a o siongɔɔ ndɔɔ coo-e yɔŋnun hee ni:

¹⁰I va dimio aa: Kpòkóó mɔnɛi! Telen yáà bɛnda le ceen nuu tɔnɔɔ dioo-o kínɛí ndóò tiiya nuaa ni, kɛ i cɛn kɔlan fɔ́! Má cè ya kɔlan o dio ciee-piɔ́mndo sondoo! Vɔsila nila tɔ̀lan la hɛlun ya.

¹¹I va dimio aa: I ci lɛnin Mɛlɛka o lɛŋnde vanaa kiyɛiya coo le! Hali vanacieo ndu pilɛ i ci lɛnin ndu o vanaa co icali o ceendo coo-a tɛɛn te!

¹²Calta nilan la faŋan mì la kɔannun ya levil polon maa cɛi-kola-toandaa vana mandaa n'cɔloo. Yoomu nuu simbulun mɛɛ vana lɔaa kolaa-o simbul kola o cii lɔ-o yɛ. I co tueyɔɔ yoole yoomu nuu kioloo, kandɔɔ ipalaa háá icɔllo, a co ya siow tɛ̀i!

¹³Tuma pá mì paalen le sɛ, i co lo koŋullo mì siŋnun ɲɛ fondoo, kandɔɔ ipalaa háá icɔllo o co cii a ya!

¹⁴I va caŋndo maa lɛɛfɛn[5] te kon te maa yamantoando, I va somisominndo a caŋndo maa poonpoon, hɔlta nilan la sanga a tofaa coocoo. Éé Maalii, i dɔwnun yɛɛvɛ a sangaa, hun mà mala ya yandi!

¹⁵Yɛɛ ya dimi yɛnin vɛlɛ? Vɛ̀ɛ̀ ya soaa yɛnin o ndu lo? Ndu co tosaa ni. I kelanin o tuisinndo nin háá mì yoomu nuu cuu. I co kon tosa le sanga kei hoo ya coo-o.

¹⁶Maalii, sɔɛi nɔmnde tosa ni mì vana de yoomoo tɔnɔ. Ndi tosa ni mí va vɔ hau yoomu. A singinin ya mà mingi ya kɛndɛa o milin.

¹⁷Tofa vɔ, hali sanga ni bɛndoo siŋnun kɔlɲuloo, kani nɔm Mɛlɛka, má kanda yoomu nuu yɔŋii ndóò del o soon piɔ́mndo nin, má viawnun hakila nilan nɔm a makɔɔ polon.

¹⁸O co ciee-piɔ́m te co nɔm lisaa le, o co piɔ́mndo le co nɔm sangalaa le. Kani vanaa tol o sɛilan nin-nda a nɔ lɛ tiindan o sakpoyɛi nɔmnde coo le.

¹⁹Kɛ fɔ vana co yoomu-o, a toɲa, fɔ vana co yoomu-o lisa nɔm ni, maa mɛɛ ya co nɔm lisaa hau nuaa yɛ. Fuɲaa pɛɛkunin cuavaa ndɔa mɛɛ nɔm Maalii co vana lo o lediom coo-o yɛ.

²⁰Maalii ciindiaa ya! Lelan, n lɔɔnun ɲɛm-caan naan o Cɛi-Mɛlɛka-o nin o ceen naa kpow nin.»

²¹Mí Esai dimi aa a hun a buumbun koaman, mà yiiliaa hindɔɔla fula masaa Esekia lan a mun, o kon Esekia siangunin.

²²Mi Esekia ɲuna aa: «Tɔɔmasele yɛɛ cɔm yɛnin maa i nɔlanin vɛlɛ mì hel o Cɛi-Mɛlɛka-o nin?»