Read Kissi Esai 39 Bible Online

Esai 39 - Kissi bible

Esai 39

¹O telen pilɛ kon bɛngu, mí Merodak-Baladan va masaa Babilɔn-ndo, po Baladan-ndo viam kilaa o Esekia lo, mó sɛval ndu sɛbɔɔ, mó yɔŋ ndu ɲɛm kɛndɔn. Kani ndóò tuei naa ndɔɔ a siongɔɔ ndɔɔ tɔ́ɔ́.

²Mí Esekia naŋ kɔl le hunɔɔ vanaa kan, mó cɔm nda fonda ndóò kɛsi bolofaa ndɔɔ-o: volion, sianion, ɲɛm cun kɛndɔn, cuɛima sɔvɛan, volɔɔla ndɔla cɔwlan kpow, ɲɛ-sɔlaa va ndu o ba-o kpede, mó cɔm nda. Ɲɛ-ɲɛ lo o Esekia kɛɛ le nda cɔmndo o cɛi ndɔɔ a masale ndɔlen nin-ndo le.

³O kon mí vana-tɛɛngaa-diom Hala-o, Esai, kɔa o masaa Esekia lo, mó ɲuna ndu aa: «Yɛɛ nɛ vannda ha dimi yɛ? Kuɛɛ nda cɛn yɛ má hun o nɔm ndo?» Mí Esekia muli aa: «Nɛɛ levil di-di nda cɛn ni má hun o ya lo, Babilɔn pɔ́ nda cɛn ni.»

⁴Mí Esai ɲuna ndu vɛlɛ aa: «Yɛɛ nda ce yɛ o nɔm ndo cɛinin?» Mí Esekia muli aa: «Ɲɛ-ɲɛ co o ya lo cɛinin kpede a cii ndu cɔ, i vin nda ɲɛ-ɲɛ o bolofaa nuu nin te.»

⁵O kon mí Esai dimul ndu Esekia aa: «Yaŋ nilan o sɔɛi Mɛlɛka-Nɔ-Kpaayaa-Kpow-vo dimi-e!

⁶Tofa vɔ, telenndo pum co hunɔɔ tiiya, vannda kɔandunin ɲɛ-ɲɛ co o nɔm ndo cɛinin a ɲɛm fuɲaa nɔmnda cuungiaa háá paale len-ndon, mà kɔɛnnun a mun Babilɔn, ɲɛ-ɲɛ lonin nanu le. Mɛlɛka soo lende ni!

⁷Vannda biinin poaa nɔmnda, a fula nɔm o ipulu-a a n velu-a, mà siinguu nda vanaa baalaa o masaa Babilɔn-ndo cɛinin!»

⁸O kon mí Esekia mulul Esai aa: «Sɔɛi Mɛlɛka-e he, i fula hee nɔm o sondo-e, sɔɛi kɛndɛi i co ni!» Mó cɔɔlu vɛlɛ dimi aa: «Kani kɔlɲulu kpeekpeiyo va vɔnin naa coo le telen ya co vɔ hoo yoomu-o kpow.»