Read Kissi Esai 4 Bible Online

Esai 4 - Kissi bible

Esai 4

¹Paale len, vanlaandua nda ŋɔmmɛw a biinin vanapɔnɔɔ ndu pilɛ, mà dimul ndu aa: «Ɲɛdiaa naa a ɲɛ naa cuɛinanndo vanin naa pila o congú, kɛ cɛl naa kínɛí mì n va o diola nɔmndan bɛngu! A yandi, faŋa naa siɛmbulan ndan coo!»

²O telen kon nin, yɛyii Mɛlɛka-e naŋnin mì i sɔla biiloo, kɔmnde lɛŋnden nden le vanin volio a naŋɔɔ, hee co va dɛnɛ kɛndɔɔ ni le Israɛlla hialunnin ma lo yoomu-a.

³Vanaa lonin yoomuu Siɔn-nda, vanaa lonin kan Yerusalɛm-nda a sɔlanin veeloo aa vanaa diandaa, vanaa diola ndalan la sɛvannin Yerusalɛm-nda lonin yoomu.

⁴Maalii co hoeyii dɛnɛ sandɛi a hoeyii dindiannde hɔŋ, mò tɔɔ vanlaandua Siɔn le ɲɛm nɔɔlɛin co nda tɛɛn-ndon, mò dindi Yerusalɛmnda le kooma vanaa nda diw-va.

⁵O kon, ndu Mɛlɛka pila solinin tindile ikumnden ipala a kumnde, mò soli yinnde biyaalen icɔl o pembei Siɔn kpow coo a o fondala vannda cuungian-ndan coo. Kani o ɲɛ oo ɲɛ coo, biilu Mɛlɛka-o vanin maa lekùù.

⁶Ipala, kùùlen le vanin nɛɛ yifannda o vunduan le hangullo ni, le vionnɔnndo lebɛngu le hoeyii fùkù-fùkùei a le piɔɔ.