Read Kissi Esai 42 Bible Online

Esai 42 - Kissi bible

Esai 42

¹Tofa vɔ vana ni baalaa, o ya co ikɛi le ndu malaa-o. Ndu co vana ya hɛli-o ni, o ndu nin kɔl nuu dɔawnun ɲaale ni. I tuisi ndu kɔl nuu coo, o pɛɛkunin vanaa-mangalaa-isɔɔa dɛnɛ sandaa.

²O deŋinin te, o heelunin diomndo coocoo, mì vana tuei diom ndɔɔ o nɛilan coo le.

³O yimnin tinale co nin le nangan-nden ndo le, o ɲuminin salabaa fitina co nin le ɲumndo-o le. O cɔmnin vannda dɛnɛ sandaa mɛɛ toɲaa co yɛ, le vanaa co o dɛnɛ palaa nin-nda malaa.

⁴O fulanin mayoomu le, o vinin n'dial te. O lonin lende háá mò simi dɛnɛ sandaa yili o lɛŋnden coo, mì vanaa co o mɛmma ihɛllan kɔngɔ-a tiindan a kɔlkɛsiaa le tɔŋnda ndɔlan sɔlaa.

⁵O Hala dimi-o, Mɛlɛka pɛɛn, o cɔw halataala mó toandu ndu-o, o pɛngɛla lɛŋnden a ɲɛm co fulaa lenin-ndon kpow-vo, o yɔngu ɲɛ-ɲɛ yoomaa co o lɛŋnden coo yoomoo-o, o yɔngu ɲɛ-ɲɛ co kelaa lecoo hoeyii yoomuɛi-yo co hoo ni aa:

⁶«Ya Mɛlɛka, i veelu nɔm o dɛnɛ sandaa nin, i saanin nɔm baa mì kanda nɔm. I kɛsinin nɔm le kpema ya yii a vannda ha-o vaa hɔlten, le vaa ɲɛ-tengaa vanaa-mangalaa-isɔɔa,

⁷le vanaa sumɛiya hɔltan kumbio, le vanaa co o biyɔɔ nin-nda solio o kaasoo, le vanaa co a biyaa o ɲumndan nin-nda baŋaa.»

⁸«Ya co Mɛlɛka ni, diola nila kpeekpeilan la co lan ni, nduyɛ, i bɛnda mì sɔla biiloo. I yɔngunin piɔmnda bɛɛle co le ya len te.

⁹Tofa vɔ, sɔɔn tason peelun, n sɛnɛiyon ya co vɛlɛ niaa dimullo nuaa ni. Tuma pá mì dɛnnda lan la hun tiiya, i co niaa pɔɔ dimul maa la hun yɔŋnunnin.

¹⁰La solul Mɛlɛka condii sɛnɛiye. La lisa ndu a condon nɛɛ lɛŋnden le mɛɛlu-a. Niaa vanaa co kelaa o mɛmma ihɛllan coo-a, niaa co o mɛmma ihɛllan tɛɛn-nda, niaa lɛŋii co o mɛnndan tɛɛn-nde a niaa vanaa co icali o lɛŋii ken nin-nda pɛɛn!

¹¹Lɛŋnde veselɛilen a kobila co lenin-ndan la bɛnda mì la heelu diomndo coocoo. Niaa co o cieon co o tàndá Kedar-o nin-ndon nin-nda, la heelu diomndo! Vanaa co icali o kobi nɔ diolan aa Pow Kpovaa-o nin-nda bɛnda mà voolu a kɔlkɛndɛ bɛndoo!

¹²O bɛnda mì Mɛlɛka sɔla biiloo, mi vannda tiw tɔ́ɔ́ ndɔɔ a ndu lisaa o lɛŋii co o mɛnndan tɛɛn-nde nin!

¹³Mɛlɛka co fulaa maa kuubanɔ cɔw, o co diallon fulaa maa vana cɔw, o co deŋio kpélén, o co sɔɛi coo a kɔltuwvo, o cɔm yoomuma ndɔan yaamɔaa ndɔa coo.

¹⁴Ya Mɛlɛka, o co nin lɔ́ɔ́ levil, i co o meiyo nin. I va o meiyaa, mí bii sondo nuu. Kɛ sunsun, i kuŋnin maa vanalanɔ pulei biŋin le volɔɔ-o. I hilulnin mì va yoomoo saaliaa lepilɛn-pilɛn.

¹⁵I tɛɛmbuunin pembun bɛndon a pembun pɔmbɔn, mì veesiaa yondo puiyaa co lecoo-o. I mangalanin peelan mì la siŋnun maa kɔngɔla vesɛi, mì veeliaa mɛnndan o dalalan nin.

¹⁶I yaanin vanaa sumɛiya o nɛi nda sina loo coo. I yaanin nda o pemama nda sina le-an coo. I mangalanin ɲumndan ɲɛ-tengaa nda o hɔl. I siinguunin kpolonndan dɛngbɛla tɛlɛlan. I tosanin dɛnnda lan kpow, o kɛ́-kɛ̀ i mɛinin le tosaa le.

¹⁷Siɛmbulan la biinin vanaa tiindan piɔmaa sialaa-a a vanaa co piɔmaa nda teengiaa-a dimullo-a aa: «Niaa co halaa naa ni,» mì nda kpow muungu a makɔɔ.

¹⁸Niaa vanaa nila baŋulɛiya, la tuei! Niaa vanaa sumɛiya, la tofa mì la ce!

¹⁹Nɛ̀ɛ́-nɛ̀ co yɛ o sumɛiyo, te o co vana ni baalaa le? Nɛ̀ɛ́-nɛ̀ co yɛ vana nila baŋulɛiyo maa kiilanɔ ni ya co viomɔɔ-o? Nɛ̀ɛ́ co yɛ vana sumɛiyo maa vana ni hiviaa n'sɔɔ? Nɛ̀ɛ́ co yɛ o sumɛiyo maa vana baalaa Mɛlɛka-o?

²⁰A ce sɔɔn taw, kɛ a manda mun te, vannda nɔ nilan la kumbialan, kɛ a tui le.

²¹Mɛlɛka ndóò yeema le tɔŋ bɛndu kɛndɛ-kɛndɔɔ yondaa, le dɛnɛ kɛndɛ Israɛlla.

²²Kɛ tofa vɔ, vannda cii nda ɲɔɔn poondiaa o laba, má yunga nda. A kinda nda kpow o kaasoo o soonndan nin, a co o biyɔɔ nin o kaasoo. Vannda del nda coo, má poondiaa ɲɛm ndan, vana-vana ve le nda baŋaa le. A hɛlu ɲɛm ndan, kɛ vana ve le dimio aa: «La mingi nda o ba» le.

²³O niaa tɛɛn, nɛ̀ɛ́-nɛ̀ yaŋ yɛnin nilan o sɔɔn mun? Nɛ̀ɛ́-nɛ̀ yeema yɛnin mò sim kpɛ́, mò yaŋ nilan le siɔdii lacio?

²⁴Nɛ̀ɛ́-nɛ̀ tosa yɛ ma poondiaa Yakɔb ɲɛm ndɔn o ba? Nɛ̀ɛ́-nɛ̀ mal lɛ Israɛl vanaa delaa coo-a o ba? Vɛ̀ɛ̀ o co Mɛlɛka le tosa kon te? Kani hakio naa n cua a ndu ni. Vannda cɛl le kelaa o nɛila ndɔlan coo le, a yeŋ nilan o tɔŋ ndɔɔ le.

²⁵Lean Mɛlɛka tuisi kɔl ndɔ tuw bɛndoo Israɛlla coo ni, mó tuisi nda cɔw kàlà-kálàá coo, mí cɔw kon ŋɔaw nda ba-ba fee, kɛ a bii ɲɛ-ɲɛ bila le. Mí kɔltuw ndɔɔ loam nda, kɛ a dow ɲɛ-ɲɛ taasi mà bii ndu o kɔl te.