Read Kissi Esai 43 Bible Online

Esai 43 - Kissi bible

Esai 43

¹Kɛ sunsun, nuaa Mɛlɛka o cɔw niaa cuavaa-imamaa Yakɔb-a-o, o toosiaa niaa polale Israɛl-ten-ndo dimi ni aa: «La yɔŋ isiòòn te, kani i cii niaa baŋa, i co niaa veeloo a diola niaalan, le ya niaa co ni.

²Te la va pɛ mɛnndan taŋɔɔ, i co va niaa ikɛi, mɛmma peela bɛnduan bɛɛ, la koelinin mì la lo lenin te. Hali la va bɛɛ kelaa o yinnden nin, le lumnin niaa le. Yelenyelen leyinndo bɛɛ lumnin niaa le.

³Kani ya co Mɛlɛka ni, Hala niaa pɛɛn, O-Diandaa-Israɛlla, vana ciindiaa niaa. I vɔngul lɛŋnde Esipte len haliko mi baŋa niaa. I yɔngu lɛŋnde Etiopii len a Seba o fonda niaa.

⁴Kani niaa, la kendu vɔngoo ya o hɔl, vanaa sɔvɛa niaa co ni, i kaola niaa taw. I co vanndacieea yoomaa yɔngu o fonda niaa, i co vanaa súúla celen yɔngoo le yoomu niaa baŋaa.

⁵Lelan la yɔŋ isiòòn te, kani i co niaa ikɛi, i cuanin vanaa niaa co a ba paalen le can-ndo a, mì mingi nda o niaa lo nanu. I cuanin niaa nɛɛ paalen le del-la, mì cuungiaa niaa nanu.

⁶I dimulnin lɛŋnde luaŋ-nden aa: «Mingi nda o nda lo!» I dimulnin vɛlɛ lɛŋnde too len aa: «Kungulan nda coo le!» Faŋa poaa niaa nɛɛ nda co o lɛŋnde nin kɔɔli-kɔɔli-a mà mingi nda o nda lo. Faŋa cuavaa niaa laandua lɛŋnde mɛɛlu ma mingi nda nanu,

⁷a diola nilan la co coo-a pɛɛn. A ya cɔw kan le biilu nuu-a, a ya toosiaa mí bɛɛndiaa nda-a.

⁸La soli vanaa sumɛyaa nɔ kan hɔltan-nda, mì la soli vanaa nɔ vɛlɛ kan nilan kɛ a tui a lan te-a.

⁹Vanaa-mangalaa-isɔɔa yɛ́-yɛ́a cuungian nɛɛ pilɛ, mì vanaa súúla celennda bɔɔŋian! O nda tɛɛn, nɛ̀ɛ́-nɛ̀ ndóò dimi yɛ maa sɔɔn mun hun tosannin? Nɛ̀ɛ́-nɛ̀ ndóò dimul lɛ naa dɛnnda taselan? A cɔm niko naa seyaa ndaa haliko ma sɔla dí, o kon mì vannda tuei, mà dimi aa: «Toɲaa i co ni!»

¹⁰Mɛlɛka dimi aa: «Niaa co seyaa niaa ni, niaa a vana ni baala ya hɛli-o haliko mi la sina ya, o kon mì la laalan ya, mì la bii bila maa ya ni. Hala celen toosian ya laci le, o ya kɔɔli Hala celen venin vɛlɛ le.

¹¹Ya ni, ya co Mɛlɛka ni, o ya kɔɔli, vana ciindiaa celen co le.

¹²Ya yonda a ndi o kɔɔ ni, ya ciindiaa ni, ya dimi ni maa ɲɛ vaa nuaa co hunɔɔ yɔŋnɔn, o co Hala celen te tosa ken niaa tɛɛn te. Niaa co seyaa niaa ni, ya Mɛlɛka dimi lende ni, ya co Hala ni.

¹³Lɔ́ɔ́ pá mí ɲɛ-ɲɛ kandun háá hau, ya co Hala ni, vana-vana nɔla mo poonda ɲɛ ya o ba le. I tosanin ɲɛ ya tuu-o, nɛ̀ɛ́-nɛ̀ kuuna yɛnin ya?

¹⁴Nuaa Mɛlɛka, vana niaa baŋaa, o co O-Diandaa Israɛlla-o dimi ni aa: «Le niaa ya vem vanaa cɔwva, le kɔlan Babilɔn delɔɔ coo a cɔwvo nuaa ni, I tuisi vanaa va ɲaanɔnndo-a kpow, a toɲa, i tuisi Kaldea va heelɔnndo o dɛ̀ndɛ̀la mamɛnndan nin-nda.

¹⁵Ya co Mɛlɛka ni, O-Diandaa niaa, ya co vana cɔw Israɛlla-o ni, masa niaa ya co ni.

¹⁶Mɛlɛka, o busa nɛiyo o mɛmma ihɛllan nin-ndo, o simi nɛiyo o mɛmma bɛnduma yongban-yongbanndan coo-o,

¹⁷o luei ɲɛla ɲaanannda soa nan-ndan a soa yondo le cɔwvo-o, o luei vanaa cɔwva a kuubaa yondo le cɔwvo-o, má hini faw, vana-vana cen ndɛ loo, má cuulu maa salabaa fitina maɲumndo. Sisa, Mɛlɛka dimi aa:

¹⁸«La yiyan ndɛ a dɛnnda tosan paandu lan te, la lúɛì lɛ sɔɔn hiow paandu-on yi le.

¹⁹La tofa vɔ, i co hunɔɔ ɲɛ sɛnɛiyo pum tosa, ɲɛ kon co nin le tosan. Vɛ̀ɛ̀ la co ɲɛ kon sina le? I co hunɔɔ nɛi bɛndoo busa o lɛŋnde veselɛilen nin, mì soli peela bɛndulan o fondala vesɛila kékélélan nin.

²⁰Visia yondoa biilunin ya, tivolla a soninkɔnɔa a biilunin ya, kani i solinin mɛnndan o lɛŋnde veselɛilen nin, I solinin peela bɛndulan o fondala vesɛila kékélélan nin le yungu nuu koesio, yungu ni ya hɛli-o.

²¹O kon, vanaa ya cownun-nda keeliaanin tɔ́ɔ́ nuu a ya lisaa.»

²²«Éé niaa cuavaa Yakɔb-a, la piɛi ya le few! Kpòkóó Israɛlla, mbɔ̀ la sanga a dɛnɛ nuu fɔ́!

²³La solul-la sálàla loamaalan a saa téndéa niaa le. La ke ya lebɛɛ a sálàla niaalan te. I hiiluu niaa kɔl le ya sálàlan solullo kangalan te. I pala niaa a kpɛlɛkpɛlɛ le ya ansan lumndo le.

²⁴La pindu ɲɛm cun kɛndɔn a n'voli le ya le, la pimi ya visin macuɛin cɔlua sálàá niaa le, kɛ mí la saangiaa kɔl nuu a hakila niaalan, mí la hiŋ ya bollen a yɔŋnda niaala vɔɔnndan.

²⁵Ya ni, ya ɲumi biondɔnnda niaalan le kaola ni ya pilaa ni, nduyɛ, i loonun ndɛnin hakila niaalan te.

²⁶Lelan, la tindi yiyan nuu mì n kɔɔsan vellaa-velle. Niaa pila soo le dí niaa nuwviaa.

²⁷Fuɲa niaa tasoo tosa hakio, mí vanaa hivia isɔɔa niaa can le sɔngɔɔ a ya.

²⁸Lelan ya cii simlacia co o Cɛi-Diandaa nin-nda labɛɛ ni, mí tɛɛmbuu polale Yakɔb len, mí tosa mí vannda yeow Israɛlla yeowlan pila.