Read Kissi Esai 44 Bible Online

Esai 44 - Kissi bible

Esai 44

¹Niaa cuavaa-imamaa Yakɔb vana ni baalaa-a, niaa cuavaa Israɛlla, niaa ya hɛli-a, la yaŋ nilan.

²Mɛlɛka toosiaa niaa-o, vana cɔw niaa kabi o dembelan nin mó va niaa malaa-o dimi aa: «Siòòŋii bii niaa le ɲɛ-ɲɛ le, niaa cuavaa vana ni baalaa Yakɔb-a, niaa polale Yesurun-nde ya hɛli len.

³Kani i tiwnin mɛnndan o lɛŋnde co levesɛilen kpow coo. I solinin peela pɔmbɔlan o lɛŋnde kalonkalonnden nin. I cucunin kɔl nuu yungu niaa coo. I dɔawnin cuavaa fula niaa o ipulu-a duaa taw.

⁴A vulnin ma hindu maa o bil nin, maa yɔmii pɔmbɔɛi co o peelan kɔngɔ-e.

⁵Vanndo pum diminin aa: «I co le Mɛlɛka!» Mì o pilɔɔ dimi aa: «O polale Yakɔb len nin o fula ni.» O celen sɛvannin o ba aa: «O Mɛlɛka-o!» Mò de diola Israɛl-tan tɔnɔ.»

⁶Mɛlɛka, masa Israɛlla a vana nda baŋaa soo, Mɛlɛka-Nɔ-Kpaayaa-Kpow-vo dimi aa: «Ya co vana tasoo ni, ya co vɛlɛ vana mɛɛlaa ni, o ya kɔɔli, Hala celen co le!

⁷Nɛ̀ɛ́-nɛ̀ co yɛ maa ya? Vana kon sɔlɔlan niko! O dimi niko sɔɔn co hunɔɔ yɔŋnɔn siɔdii laci-on mò cɔm ya mun! O cɔm niko dɛnnda tosan paandu kandɔɔ a boondii yungoo ho-e háá telenndo ho lan! O dimi niko pɔɔ ɲɛ hun yɔŋnunnin siɔdii laci-o!

⁸Lelan, la yɔŋ isiòòn te, la ɲííyà le. Kabi lɔ́ɔ́ levil mí dimul niaa sɔɛi he, mí tɛɛsial niaa dɛnɔɔ ho lenin kpow. Seyaa niaa niaa co ni. Vɛ̀ɛ̀ Hala celen co macoaa o ya kɔɔli? Kɛì-kɛì bɛɛ! Pow kpova celen co le. I sina o kɛ́-kɛ̀ celen te few!»

⁹Vanaa cɔaw piɔmnda-a, vanaa fondoa fúú nda co ni. Ɲɛm ndan kɛndɛn hiow naŋɔɔ-on n nɛŋi kpeku oo kpeku le, ɲɛm mun pila co seilen tɛndaa kpendekele: ɲɛm nda cɔaw-von ci le, n sina ɲɛ-ɲɛ le. Siɛmbulan la tol nda pila vanaa cɔw mun-nda.

¹⁰Nɛ̀ɛ́-nɛ̀ cɔaw yɛ halaa, te kon te piɔmndo, o nɛŋi ndu kpeku oo kpeku le?

¹¹Tofa vɔ, siɛmbulan la biinin vanaa co nda sooloo-a kpow, kani vanndacieea daama vanaa cɔw nda kan-nda co ni, nda kpow a cuungian-ndɔ hau mà sim lon! Siɛmbulan la co nda biyɔɔ mà ɲiiyaa vellaa-velle kpow.

¹²Sumnɔɔ co cuei cɔvɔɔ, o co baalaa a dɛngulta isuɛɛnndan, o co ndi cɔvɔɔ a kunduvaa, o co ndi lɔɔ a ba a yoomuan taw. Kɛ te yiaan ma nɛi ndu dɔ́ɔ́ pɛ, yoomuan ma cuu, te o kol mɛnndan te, o sanga dɔ́ɔ́ yɔkɔɔ.

¹³Vana sialaa yɔmndo va pɛ baalaa, o tuu yɔmndo a yoolen, o tɛnda tindilen a pindipindio, o sɛl yɔmndo a kelio[7], o tuuliaa ɲɛlan lecoo a kɔmpaalan, o soli ndu hɔlla maa vanaciee, o toosiaa ndu o naŋ maa vanaciee, haliko mo kɛsi ndu cɛi máándo nin.

¹⁴Yɔmii sɛɛdre o kialu ni, te kon te o hɛli yɔmii siprɛsiei, yálánnde, te kon te o hɛli yɔmii o mal mì i celul-le o yɔmii co o bundɔɔ nin-nde tɛɛn, te kon te vɛlɛ o cua yɔm nɔ diolan aa Pɛn-ndo-o, ndu pila tɔl, piɔɔ pɔɔliaa ndu, o sul.

¹⁵Nduyɛ, yɔmii ken vanacieo pila tingu vɛlɛ le lemɔɔ ni, ndi o cua i tiŋ le hangɔɔ ni, a ndi o ciŋa yinnden le buloo lomɔɔ ni. Yɔmii ken koni vaanaciee pilɛ kon cua vɛlɛ ni, mò sɛl hala a ndi, mò sooluu hala kon. A ndi o cɔaw piɔmndo ni, mò baŋ vulan piɔm kon o labɛngunin.

¹⁶Vanacieo cua pɛ yɔmii ken i tiŋ, o dɔw o yin, o yaw vision a ndi, o tuɛi vision pum a ndi. O cii pɛ pum ca, o cal hangɔɔ o yinndekɔɔ, o dimi aa: ‹Ha-ha-ha! Hangɔɔ ndu yeela bɔɔ mbɔ̀! Yinnde vulɛi-vulɛilen le naŋ bɔɔ mɛɛndanndo!›

¹⁷Yɔmii tɔ̀ɛi lo ndu pɛ o ba, o cua ken o sɛl piɔmndo, o siinguu piɔm kon hala ndɔɔ, o baŋ vulan piɔm kon o labɛngunin, o sooluu ndu, o piɛi ndu aa: «Baŋa ya, kani nɔm co hala nuu kpeekpei ni!»

¹⁸Vanaa kan a sina ɲɛ-ɲɛ le, a bii ɲɛ-ɲɛ bila le, a kinda nda hɔltan yɔŋii nda cɔ, a laasiaa nda kɔltan yɔŋii nda bii ɲɛ bila.

¹⁹Vana-vana co yiyan te, vana-vana nɔ kɔlkalu, te kon te sinapɛngu le dimio le aa: «I lom yɔmndo ho o tiŋ o yin te. I lom bulu nuu o dɛngulta yɔmndo ho coo, mí tuɛi vision, mí dia mun a yɔmnde he, mí tosa dɛnɛ nɔɔlɛiyo a yɔmii tɔ̀ɛi lo ya o ba-e, mí baŋ vulan yɔm ibungaa o labɛngunin.»

²⁰Pultan vanaciee kon kɛsi kɔllo coo ni, kani kɔl ndɔ ba hivaa laasiaa ndu. Nduyɛ o ciindiaanin yoomu ndɔɔ le, o diminin vɛlɛ aa: «Còòlan lekɛ́ndɛi ya nɔ o ba nuaa ni le!»

²¹Niaa cuavaa-imamaa Yakɔb-a sei, la loonun a sɔɔn mun. Niaa polale Israɛl-ten, la loonun! Kani vanaa niaa baalaa niaa co ni, niaa cuavaa Israɛlla, i pɔɛɛnunnin niaa le.

²²I vɔɔsuu hakila niaalan maa mɔ́m. I ɲumi yɔŋnda vɔɔnnda niaalan maa yumbuyumbu. Lelan la muungu ya o ibuŋ, kani ya baŋa niaa ni.

²³Niaa co o halataala-a, la dɔwnun ɲaale, kani Mɛlɛka tosa isɔɔ! Niaa co o lɛŋnden bɛngu di-di-a, la deŋi a kɔlkɛndɔɔ! Niaa pembon, la piɔndi a yoondiaala kɔlkɛndɛlan! Niaa bundɛlan bɛɛ, la dɔwnun ɲaale a yɔmii niɛi kpow! Kani Mɛlɛka baŋa polale Yakɔb len. O cɔm biilu ndɔɔ o cuavaa Israɛlla nin.

²⁴Nuaa Mɛlɛka, o co vana baŋaa niaa-o, o toosiaa niaa kabi o volɔn niaa-o dimi ni aa: «Ya Mɛlɛka, i tosa ɲɔɔn kpow. Ya pilɛ kpé tondu halataalaa ni. Ya pilɛ kpé pɛngɛla lɛŋnden ni.

²⁵I tɛɛmbuu tɔɔmaselela vanaa-tɛɛngaa-diom halaa lacòòvaa. I hiŋ vanaa dimi siɔdii lacio-a bolle. I ɲindu vanaa kɔlkalua aa makɔɔ, mí siinguu kɔlkalu ndaa diɔmnde.

²⁶Kɛ mí peelu sɔɛi vana ni baalaa. Mí peelu sɔɔn kiila niaa dimi le yɔŋnɔnndo-on. I dimi a Yerusalɛm o kɔɔ ma vannda vanin icali lenin taw, mí dimi a kobilan o tàndá Yuda-o nin o kɔɔ maa la tangulunnin vɛlɛ. I minginin kpakila kobilan isisi.»

²⁷I dimul soon bɛndu co o lɛŋnden bɛngu-o aa: ‹Vesa kékélé! I veeliaanin peela nɔmndan!›

²⁸Mí dimi a Siris o kɔɔ aa: ‹Vana mandaa n'cɔlu nuu o co ni, nduyɛ o peelunin hɛnan nuu kpow›. Ndu Siris diminin aa: ‹A muungu mà tangul Yerusalɛm›. O diminin aa: ‹Cɛi-Hala-o baŋnun vɛlɛ›.