Read Kissi Esai 48 Bible Online

Esai 48 - Kissi bible

Esai 48

¹«Niaa cuavaa Yakɔb-a, niaa co o diola Israɛl-tan bɛngu-a, niaa fula o mɛmma co o tàndá Yuda-o nin-ndan nin-nda, niaa co mɛnanndo o diola Mɛlɛka lan-nda, niaa co Hala Israɛl-lo piɛiyo o co a toɲa le, o co a isandu le-a, la yaŋ-ndɔ nila mì la tuei!

²Kani la co diolan puuvo aa: «Vanaa co o kobi diandaa nin-nda.» Mì la co Hala Israɛl-lo tiindanndo coo, Hala nɔ diolan aa Mɛlɛka-Nɔ-Kpaayaa-Kpow-vo pɛɛn.

³Kabi lɔ́ɔ́ levil, mí yonda a dɛnnda taselan o kɔɔ, mí sɔɔn mun fula ya o sondo, mí yonda a mun o kɔɔ. O lepilɔɔ kpé, mí tosa mun, mí sɔɔn kalan peelun.

⁴Kani yáà sina maa vanaa nila kalua niaa co ni, maa la kindi kɛsun niaan maa icilin, maa tendun niaan co n kala kpoke maa idaɲa.

⁵Nduyɛ, kabi paandu pa ya dimul niaa sɔɔn mun ni, telen pá mí n hun yɔŋnun, mí yáà dimul niaa mun. I tosa kon yɔŋii niáà dimi aa: «Piɔmaa naa kposon tosa dɛnndan ndan ni! Piɔmaa sialaa naa a piɔmaa teengiaa naa, nda dimi ni mi dɛnnda ndan la tosan!»

⁶Niaa pila tuei ɲɛkɛndɛi, mí la ca kpendekele. Vɛ̀ɛ̀ niaa bɛɛ la yondanin a ndi o kɔɔ le? Sunsun yɛ, i cii niaa sɔɔn sɛnɛiyon dimul, sɔɔn viannanndon, n niáà sina paandu loon.

⁷Sisa sɔɔn mun co tosanndo ni, o co sɔɔn paandu le n co le. Lɔ́ɔ́ paalen nden hau léè tiiya vɔ loo, niáà tui-yɔ ɲɛ-ɲɛ a mun o kɔɔ le, yɔŋii niaa dimi dɔ́ɔ́ aa: «Náà sina nin mun paandu!»

⁸Niáà tui-yɔ ɲɛ-ɲɛ a mun o kɔɔ le, niáà sina vɔ ɲɛ-ɲɛ a mun o kɔɔ le, sɔɔn mún, mún del-lɔ niaa o lani paandu le few. Kani yáà sina maa niáà lonin o lediom coo le, maa kabi o violɔn niaa, a va niaa veeloo aa vanaa nila kalua.

⁹Kɛ le diola nilan, kɔltuw nuu ɲulul, le biilu ni co le ya-o. I ce niaa mi mɛi niaa lon. I cɛl le niaa diwvo mì cii niaa le.

¹⁰La tofa vɔ, i vow niaa o kpɛɛnɛi teengiai nin, kɛ o co le niaa siinguu volin humbu le, I soli niaa kɔlɔ o tóndó bɛndu dɛnɛ palaa nin.

¹¹Le kaola ni ya pila nɔ le ya pila-o, le canyɛi nii ya pila-e ya tosa lende ni, bau i yeema mi diola nilan la nɔɔla le. I yɔngunin vana celen biilu nuu le.

¹²Niaa cuavaa Yakɔb-a sei, niaa cuavaa Israɛlaa ya veelu-a sei, la yaŋ-ndɔ nillan o sɔɛi nii! Ya ni, ya co vana tasoo ni, ya koni co vɛlɛ vanaa mɛɛlaa ni.

¹³Ba nuu kila lɛŋnden ni, ba ni kɛndɔɔ tondu halataalaa ni. I veelu dɔ́ɔ́ pɛ ɲɛm mun, n cɔmnun ya dɔ́ɔ́ vellaa-velle.

¹⁴Niaa kpow la cuungian mì la yaŋ nilan! O nda tɛɛn, nɛ̀ɛ́-nɛ̀ dimi yɛ paandu le sɔɔn mun yɔŋnɔnndo? Vana ya Mɛlɛka kaola-o tosanin hɛnan nuu le Babilɔn tɛɛmbuuo, ba ndɔɔ soaŋnin Kaldea soŋɔ̀ɔ́ pila.

¹⁵Ya ni, ya soo lende ni, ya veelu ndu ni, ya hin a ndu ni, nduyɛ o tiwnin vali ya vem ndu tosaa-o ba.

¹⁶La sɔɔnguu ya ikɛi mì la yaŋ nilan! Kabi o kandɔɔ, i dimi ɲɛ-ɲɛ o vionnɔn nin te, kabi nɛɛ sɔɔn mun kandun-nda, i va lon. Sisa, Maalii Hala vem ya ni mó yɔngu ya kɔl ndɔɔ!

¹⁷Nuaa Mɛlɛka, vana niaa baŋaa, O-Diandaa Israɛlla soo ni aa: «Ya Mɛlɛka, Hala niaa, i co niaa pɛɛkoo le dɛnɛ niaa kɛndɔɔ, i cii niaa yɔɔ o nɛi niáà bɛnda le kelaa coo-o coo.»

¹⁸Éé, te niáà yaŋ pɛ nilan o tɔŋnda nilan mi niáà bii lan, kɔlɲulu niaa ndóò vanin maa mɛmma pee bɛndu, dɛnɛ kɛndɛ niaa ndóò kuinin maa tindima mɛmma ihɛllan,

¹⁹cuavaa niaa ndáà kuinin maa n'sióón, mí polale fula niaa o ipulu len léè vangalan maa sióóŋun muimuiyon. Diola niaalan láà vɔɔsunnin mí láà ɲum ya o hɔl te few.

²⁰Lelan la faŋan Babilɔn mì la kɔɛnnun! La ɲaanun mì la faŋan Kaldea tɛɛn! La yonda sɔɛi he a kɔlkɛndɔɔ, la sɛŋi yoongoo ho! La cɔm vannda a ndi o kɔɔ háá nɛɛ lɛŋnden le mɛɛlu-a, la dimi aa Mɛlɛka baŋa cuavaa vana ndɔ baala Yakɔb-a!

²¹Kolɔɔ bii nda nɛɛ o kei a nda o lɛŋnde veselɛilen nin-nda le, mó soli mɛnndan o pow kpovaa le nda. Mɛɛ o tɛnda pow kpova kon, mí mɛnndan ma piɔl.

²²Kɔlɲulu co le vanaa kɔlvesɛiya le!» Mɛlɛka dimi lende ni.