Read Kissi Esai 55 Bible Online

Esai 55 - Kissi bible

Esai 55

¹Sei, niaa vanaa kolɔɔ bii-a kpow, la hun nɛɛ mɛnndan ma co-a, hali mi vana nɔ ivoli o ba le! La hun, la piɔndi mì la de! La hun, la piondu mɔiyan a nɔnɔan, o co a n'voli le niaa co piondɔɔ le, la co hunɔɔ bɔnɔ luɛyɔɔ le!

²Le yɛɛ nɛ niaa co yɛ volion pisio le ɲɛdiaa nɔ tɔnɔ loo, mì la va sangaa le ɲɛ pimi vana loo? La yaŋ ya nilan, la yaŋnun, o kon la dianin ɲɛm yeelɛiyon, ɲɔɔ hɛnannin niaa le ɲɛm dian naŋ-ndon dioo.

³La yaŋ nilan, la hun o ya lo, la yaŋnun ya mì la va yoomu. I yiinin kpema fɛɛn-fɛɛndo a niaa, mì tosal niaa dɛnnda kɛndɛla kɛ́-kɛ̀ yáà tuu le David tosallo.

⁴Tofa vɔ: i siinguu ndu seiyo le vanaa súúla celen. I kɛsi ndu maa simlacinɔ le vanaa súúla celen masalen tosaa coo.

⁵Tofa vɔ: a veelunin vanaa-mangalaa-isɔɔa n sina le-a. Vanaa-mangalaa-isɔɔa sina nɔm te-a hunnin o nɔm ndo a kiltan bilika-bilika, le Mɛlɛka, Hala nɔmndo, O-Diandaa Israɛlla pɛɛn, o co nɔm bɛɛlen yɔngoo-o.

⁶La nuwviaa Mɛlɛka telen vana saalun ndu-o, la veelu ndu o piɛilen nin telen o co vɔ kpɛɛlun-ndo.

⁷Vana kɔlvesɛiyo faŋan o nɛi ndɔ kɔlvesɛiyo coo, mì vana vɔɔndo mal vanavɔɔnyɛi ndɔɛi, mò muungu Mɛlɛka o ibuŋ, haliko mi Mɛlɛka tuinun ndu iɲíí, mò muungu Hala naa o ibuŋ, o màl haki few-few-vo pɛɛn.

⁸Mɛlɛka dimi aa: «Yiyannda nilan la co ɲɛ pilɛ a yiyannda niaalan te, nɛila niaalan la co ɲɛ pilɛ a nɛila nilan te.

⁹Kani mɛɛ halataalaa co lɛŋnden coo polon yɛ, lende koni nɛila nilan la hiow nɛila niaalan ni. Lende koni yiyannda nilan la hiow laniaalan ni.

¹⁰Piɔɔ a mɛmma n'kpungban ma cɛn pɛ coocoo mi ma tol, ma muungu fúú le fɔ mi ma pɔɔliaa lɛŋnden, mi ma yɔwviaa len, mi ma tosa mi tɔlɔɔlan la vil lecoo. Fɔ mi ma yɔngu vana saŋaa kɔmnde ɲɛ o saŋ-ndo, mi ma yɔngu vana co dioo-o ɲɛdiaa.

¹¹Lende koni sɔɛi fula ya (Mɛlɛka) o sondo-e co ni: sɔɛi nii muungu ya o ibuŋ mì i kɛɛ ɲɛ pum tosa le. Fɔ mì i tosa hɛnan nuu, mí i peelu ɲɛ ya vem ndi le tosaa-o ɲɛkɛndɛi.

¹²A toɲa, la fulanin a kɔlkɛndɔɔ taw, a yaanin niaa o kɔlɲuloo nin, pembun bɛndon a n'pɔmbɔn piɔndinin a ɲaaloo niaa o hɔl, nduyɛ yɔmii co yondoo nin-nde kpow i tiamnin balan.

¹³Yɔmii Siprɛsiei vulnin o fonda yɔmii n'yɔɛi va-o, yɔmii Mirte vulnin o fonda yɔɔn va-o, tɔ́ɔ́ bɛndoo vanin kon le Mɛlɛka ni, tɔɔmasele fɛɛn-fɛɛndo vanin kon ni, o feŋannin le fɛɛn a fɛɛn too.»