Read Kissi Esai 56 Bible Online

Esai 56 - Kissi bible

Esai 56

¹Nuaa Mɛlɛka dimi ni aa: «La kela o sakpoyɛi nin, mì la tosa dɛnɛ sandaa, kani cinda nuu co nin le tiiya, dɛnɛ ni sandaa co nin le cɔmnɔnndo kpendekele.

²Duaa co le vana co tosa lende-o, duaa co le vana co kelaa o sɔɔn mun coo-o, o co paale pɛngiaalen bɛɛlen keo yɔŋii o del kasi a len-ndo, o mandan, yɔŋii o tosa dɛnɛ vɔɔndo-o.

³Mial yiinun a Mɛlɛka-o bɛnda mò dimi le aa: «Mɛlɛka faŋanin ya lekɛ́ndɛi vanaa ndɔa coo.» Vanapɔnɔ nda tɛnda bosio-o bɛnda mò dimi le aa: «Ya ya, yɔm vesɛiyo ya co ni.»

⁴Kani nuaa Mɛlɛka dimi ni aa: «Vanpiaandua nda tɛnda bosio-a, a kenin palɛi pɛngiɛi nii bɛɛlen-nda, a hɛlinin hɛnan nuu le tosaa-a a lonin isisi yili o kpema nuu nin-nda,

⁵i yɔngunin nda pow sálàá a diolan tɔ́ɔ́lan o cɛi nuu nin, o kpakila nilan nin pɛɛn, mò hiow poaa a cuavaa laandua vaa fisa, I yɔngunin nda diola fɛɛn-fɛɛnndan, la ɲumnin lɔ́ɔ́-lɔ́ɔ̀ le lan.

⁶Mialaa holnunnin Mɛlɛka le ndu baala tosallo, le ndu bɛɛlen keo a ndu kaola, a le vaa vanaa ndɔa baalaa-a. Vanaa kenin paale pɛngiaalen bɛɛlen yɔŋii nda del kasi a len-nda kpow, vanaa lonin isisi yili o kpema nuu nin-nda,

⁷I kɔanin a nda o pembii nii diandɛi coo, I nɛŋinin nda kɔltan o cɛi ni lepiɛiyo nin, mì cɛl sálàla loamaala ndala nda solinin o fonda ni solia lasálàá coo lan. Kani Cɛi nuu veelunnin aa Cɛi lepiɛiyo le vannda súúlan kpow.

⁸Maalii Hala co Israɛlla ndáà tow-va cuungiaa-o soo, mó dimi aa: «I cuungiaanin vɛlɛ vanaa celen o vanaa ndɔa co nin a cuungiannda-a ikɛi!

⁹Niaa visia yondoa kpow, la hun le dioo. Niaa visia co o bundɔɔ nin-nda kpede la hun!

¹⁰Kpalilaa cumulaa Israɛl, vanaa sumɛiya nda kpow co ni, a bii ɲɛ-ɲɛ bila le. Tunaa boboa kposon nda kpede co ni, a nɔla busɔɔ le, yiyannda lasiɛilan tuŋ la co nda o lakɔl ni, ihini tuŋ nda connun ni, a kaola bɔɔ lɔan dɔɔfɔlɔɔ.

¹¹Tunaa lepulua nda co ni, a pim ɲɛ-ɲɛ le. Vanaa mandaa n'cɔlua bii ɲɛ-ɲɛ bila le-a nda co ni: nda kpede vana-vana co kɔlan o nɛi ndɔɔ coo, vana-vana co kiltan le tɔnɔ ndɔɔ sɔlaa kínɛí.

¹²A co dimio aa: «La hun, i nuwviaa nin mɔiyan, n kolnin mɔima nɛyaa-nɛyaan, mì ma bii naa! Lende koni naa n kolnin man vɛlɛ siɔdii ni, ma co lon taw-taw, ma lo vɔ lon ma bɔɔ dɛ!