Read Kissi Esai 57 Bible Online

Esai 57 - Kissi bible

Esai 57

¹Vanaa sandaa co piɔ́mndo sɔlaa, kɛ vana-vana co saalan le vu nda co kon ndo le, vanaa tosaa dɛnɛ kɛndɛa co cuuo, kɛ vana-vana co bila biyɔɔ maa le dɛnɛ vɔɔndo hiɔlɔnndo le nda co cuu kon te.

²Vana kela pɛ o nɛi sandaa coo, o luɛinin o kɔlɲuloo nin, mò pɛngi o kpele ndɔ hinia coo.

³Kɛ niaa, la sɔɔnguu nanu, niaa cuavaa kueiya, niaa vanaa suundɛiyaa co suunda leyulaa-a pɛɛn.

⁴Nɛ̀ɛ́-nɛ̀ niaa co yɛ mamɔɔ tɛɛndanndo? Nɛ̀ɛ́-nɛ̀ niaa co yɛ sondoo kumbillo panda-panda? Nɛ̀ɛ́-nɛ̀ niaa co yɛ diɛɛmulen solullo? Cuavaa lasiannda a vanaa palaa n'vannda niaa co ni.

⁵Yeemɛi bɛnduei co niaa le kɔlan sooluulan kilaa o yɔmii terebɛntiei, a o yɔmii puiyɛia kpow bɛngu. La co cuaambɔa bololan kilio o kpolonndan nin a o tɛɛngun powta kpovalan nin.

⁶O powta kpɔlɔkaalan nin, a o kpolonndo nin, o niaa Israɛlla co ni. La tofa vɔ, ɲɛ co le niaa-o kpeekpei co kon ni. Powta lan niaa co sálàla mamɔilan cuuŋullo ni, lan niaa co sálàla kpeyanndan solullo, mi la va lan lomɔɔ ni. Vɛ̀ɛ̀ ya Mɛlɛka, mì kɔl nuu hini a dɛnnda vaa nuaa kpow?

⁷O pembii bɛndui vilɛi-vilɛiye coo niaa simi kpele niaa hinia ni, lo niaa co vɛlɛ helɔɔ le sálàlan solio ni.

⁸O koŋndo a o kèédei kɔɔli niaa kɛsi ɲɛ loonan niaa ni kani la co ya vionnɔnndo mí la kɔa yunganndo polon, mí la hel o kpele niaa coo tum fondo, mí la cɔɔlu ndu kuundiaa. La co kpemaa yiiyo a vanaa niaa yeema kpelela ndalan-nda, mì la va tum fondo ndaa mɛɛndanndo.

⁹La co kɔlan o piɔmaa niaa siinguu masaa-a lo a cuɛiyan, la co lasikɔlɔma niaan kuiyo tuŋ, la co vanaa niaa viamaa vomɔɔ nɛɛ levil, la co nda tuisio háá ciee-piɔ́m.

¹⁰La lo kɔlan tei mí la sanga yɔkɔɔ, kɛ la co dimio aa ‹N mellɔnin kɔlan ndan te.› La co vɔ yoomuan sɔlaa o bala niaalan nin, la bɛpɛla vɔ le.

¹¹Nɛ̀ɛ́-nɛ̀ va yɛ niaa vueinɔnndo? A Nɛ̀ɛ́ niaa va yɛ siòònde yɔŋndo, mí la va còòlan dimio, la ve vɛlɛ loonɔn a ya o kɔɔ le. La ve yiyan o dɛnɛ nuu coo le? Vɛ̀ɛ̀ le mɛɛ ya co o meiyo nin kabi lɔ́ɔ́ levil lɛ niaa kɛɛ le siòòŋii nii nɔu ni?

¹²Mɛɛ ya, i co ɲɛ co «dɛnɛ sandaa» niaa-o cɔɔmuu, a dɛnnda niaala solinin niaa kpeku oo kpeku le lan.

¹³Telen niaa koŋulnin-ndo, la veelu niko piɔmaa sɛ́lɛ́a niaa cuungiaa kan-nda, a baŋa niaa! Hoeiye kɔandunin nda kpow, i cuanin nda kau. Kɛ vana vennun pɛ ya (Mɛlɛka) o ba bɛngu, ndu sɔlanin lɛŋnden kɛ́ɔ, mò sɔla pembii nii diandɛi maa ɲɛ ndɔ pɛ́.

¹⁴Mɛlɛka dimi aa: «La siɔ̀ɔ́ nɛiyo, la fɛɛya ndu, la toosiaa nɛiyo, la faaŋiaa ɲɛla kuuna vana hivɔɔ lan kpow o nɛi vanaa niaa coo!

¹⁵Kani Ó-Hiow-Ɲɔɔn-Kpow-vo, o calta ndɔlan la co le fɛɛn a fɛɛn-ndo, o diola ndɔlan la co ladiandaa-o soo nuaa ni mó dimi aa: «I co icali o fondala vilɛi-vilɛilan nin coocoo pɔɔli, i connun icali lon o diondɔɔ nin. Kɛ i co vɛlɛ icali naa vana co o mɔnɛi nin-ndo a vana cennun o pɔmbɔ o yiyan-ndɔɔ nin-ndo, haliko mi luei yiyannda vanaa cennun a pɔmbɔ-a yoomuan, mi nɛŋi kɔlta vanaa co o mɔnɛi nin-nda.

¹⁶Kani o co lɔ́ɔ́-lɔ́ɔ̀ le ya sɛɛngiaa le, o co le fɛɛn a fɛɛn te ya manda kɔl ni tuwvo le, yɔŋii yiyannda (vannda) la laasian, yɔŋii ɲaa yoomaa ya cɔw-va vunnun kpede.

¹⁷Le ɲɛm vannda poondiaa a kafalan-ndon mí tambu kɔl a nda, mí soaŋ nda, mí viannun o kɔl ni tambɛiyo nin, kɛ vanaa nila kalua nda co ni, a co hiovɔɔ laci a kɔlan o nɛi kɔl ndaa coo.

¹⁸I ce nɛila nda co kelaa coo lan, kɛ i singinin nda, i simnin nda laci mì ɲɔɔlu nda mà ɲulul kɔltan, nda a vanaa nda co o dɛnɛ palaa pilɛ kon nin-nda.

¹⁹I tuisinin condun lisan o cɔcɔn coo. Kɔlɲuloo co le vanaa co levil-la kɔlɲuloo co vɛlɛ le vanaa co macɛlu kpɛlun-nda! I singinin nda lekɛ́ndɛi. Ya Mɛlɛka dimi lende ni.

²⁰Kɛ vanaa kɔlvesɛiya nda nda, maa mɛmma ihɛlma co hiilɔnndo, mà nɔla simndan yili le-an nda co ni, maa mɛmma ihɛlma co yeelioo a loolio kaaliaa-an.

²¹Hala nuu dimi aa: «Kɔlɲulu co le vanaa kɔlvesɛiya le».