Read Kissi Esai 58 Bible Online

Esai 58 - Kissi bible

Esai 58

¹Deŋi coocoo kpélén a yoomuan, mei le dɛ! Kungula diomndo maa diom bulu, mà yondal vanaa niaa le yɔŋ vɔɔn ndaa, mà cɔɔmul cuavaa Yakɔb-a hakila ndalan!

²A co ya nuwviaa lepalaa-lepala, a yeema ma sina nɛila nilan, maa vanaa-mangalaa-isɔɔa tosa dɛnɛ sandaa-a, a mel sandii Hala nda-e le-a. A co ya ɲunaa le yaman sandan kiolɔɔ, a yeema ma va ya Hala macɛlu kpɛɛlun.

³A co ɲunaa aa: «Tɔnɔ yɛɛ naa n nɔ yɛ le sumndo biyɔɔ te nɔm (Mɛlɛka) co ndi cɔ le? Tɔnɔ yɛɛ naa n nɔ yɛ le naa pila tuisinndo tootoo te nɔm co naa saalan te?» O kon mí Mɛlɛka muli aa: «O co fondo le, paale niaa co sumndo biyɔɔ len, la co yiyannda niaalan tosaa, la co vanaa baalaa niaa saangiaa a kɔlvesɛiyo.

⁴La co sumndo biyɔɔ a sɛɛngianndan a á cɔlɔbalan tosaa, a vannda lɔɔ a bɔtáà kpoku. La co sumndo biyɔɔ mì la va tosaa mɛɛ vanndo tosa o paale sumnden coo, haliko mi piɛile ndɔlen le tueinun coocoo yɛ le.

⁵Vɛ̀ɛ̀ sum hɛnan ya Mɛlɛka-o co kon ni? Vɛ̀ɛ̀ paale vanacieo tuisin ndu pila tootoo len le co len ni? Mò va maa le bollen tundɔɔ maa lekpɛ̀ndɛ̀, le yalala yuululan vownɔnndo a le lɔngɔlianndo o pultan nin ni? Vɛ̀ɛ̀ kon niaa veelunin ni aa sumndo? Vɛ̀ɛ̀ paale hɛnan Mɛlɛka len le co len ni?

⁶La tuei-yɔ sum hini ya Mɛlɛka kɔllo-o: La kili yɔlɔn dɛnɛ sandaa lepɛŋndon, mì la kili yoei yɔm lebolle, mì la mingi vanaa co o sangaa nin-nda o nda lo o hɔ́ɔ́yɛi nin, mì vannda kpow tuisi volɔɔla súú-súù nda hɛɛnduu vannda o lebol-tan.

⁷La piɔvan ɲɛdiaa niaa vana yiaan ma co nɛiyo-o, mì la luei vanaa bala fondoa nɔ nɛɛ calaa le-a o la niaa lo cɛinin. Te la ce pɛ vanndo a fɛ́lio, la ke ndu ɲɛ cuɛinanndo, la faŋal vanayan niaan hɔlla le.

⁸O kon, ɲɛ-tengaa niaa kandunin fulaa maa ɲɛ-tengaa paale siaa, mì la sɔla siongɔɔ cɔ́-cɔ́. Dɛnɛ sandaa niaa kɔanin niaa laci, mì biilu Mɛlɛka-o va kɔlan niaa kɔɔli.

⁹O kon, telen niaa veelunin-ndo, ya Mɛlɛka mululnin niaa. Te la hun yonda pɛ, i diminin aa: «Yoo! I co nanu!» Te la pɛngi pɛ vannda volɔɔla lusulaalan handɔɔ o lebol, te la mal pɛ dɛnnda kɔngɔlanndan, a tombola tɛɛmbuu vana kɔllo-o,

¹⁰te la yɔngu pɛ vana yiaan ma co nɛiyo-o ɲɛ niaa pila yeemaa-o te la ke pɛ vana ikɔɔ ɲɛdiaa mò de, mò pim, ɲɛ-tengaa niaa teengiaanin ɲumndan, mì ɲumma niaan ma tenga maa a telen paale kálà-kálàlen.

¹¹Ya Mɛlɛka simnin niaa laci telen oo telen, i piminin niaa o fondala vesɛilan nin, mì mingi yoomuan o dialun niaan nin. La vanin maa nakɔ nda co pɔɔliaa ɲɛkɛndɛi-yo, mì la siŋnun maa pee lebol mɛnndan ma vela nin too.

¹²Vanaa niaa minginin bémbéla paandulan tangul, mà siownin baalala vanaa hiow sindɛ-a ndáà kandu lan, (vannda) veelunin niaa aa vanaa baŋulaa n'tɛɛngua, vanaa co nɛila pɔmbɔlan mingio toosiaa-a, a co lɛŋnden mingio toosiaa le vannda calle lenin-nda.»

¹³Te la bii pɛ pelun niaan, mì la kela o paale pɛngiaalen coo le, te la tosa hɛnan niaa o paale nile diandaalen coo le, te la ce pɛ paale pɛngiaalen maa paale yeelɛilen, paale diandaale Mɛlɛka len a paale sɔvɛlen le co ni. Te la ke pɛ paale len bɛɛlen, mì la kela o nɛila niaalan coo le, mì la tosa dɛnndan mɛɛ niaa hɛnan yɛ le, mì la luei sondoo o tombola fondo-fondoo nin te,

¹⁴mɛɛ la siinguu Mɛlɛka kɔlkɛndɛ niaa. O kon, i kɔanin a niaa o fondala yesala co o lɛŋnden nden nin-ndan coo. I dɔawnin niaa balo a kɛ́ Yakɔb fuɲa niaa mama-o. Kani Mɛlɛka o sondo sɔɛi he i fula ni.