Read Kissi Esai 62 Bible Online

Esai 62 - Kissi bible

Esai 62

¹Le kaola ya kaola Siɔn-ndo, i meinin te! Le Yerusalɛm, i pɛnginin sondo le, háá mì cinda ndɔɔ tenga maa ɲɛ-tengaa paale siaa, mì baŋan ndɔɔ cɔmnun maa tɛngɛ mendulaa.

²O kon, vanaa-mangalaa-isɔɔa a canin dɛnɛ nɔm sandaa, masaa kpow a canin biilu nɔmndo. A veelunin nɔm a diola sɛnɛila Mɛlɛka solinnin o sondo mò yɔngu nɔmndan.

³A vanin maa mɔsil lemasa kɛndɛ o ba Mɛlɛka-o nin, a vanin maa mɔsil ivanabɛnduya Hala nɔmndo o ba kɔllo nin.

⁴Vana ke lɛnin nɔm ladio aa: «Vana malnanndo» le. Vana veelu lɛnin lɛŋnde nɔmnden aa: «Lɛŋnde siɔŋɛilen» te. Kɛ a veelunin nɔm aa: «Kɔl Mɛlɛka-o», a veelunin lɛŋnde nɔmnden aa: «Vana co o nɔu-vo», kani Mɛlɛka naŋnin kɔl a nɔm, lɛŋnde nɔmnden le calnin o nɔu.

⁵Mɛɛ poombɔ piaandoo cua cuaambɔ laandoo o nɔ̀u nin yɛ, lende koni vanaa minginin nɔm tangul-la siŋnunnin piaandua nɔmnda ni. Mɛɛ vanalanɔ co calle o nɔu-vo nɛŋi vanapɔnɔ fula ndu kɔɔli le ndu cuaa-o kɔl-lɛ, lende koni nɔm bɛɛ nɛŋinin Hala nɔmndo kɔl ni.

⁶Nɔm Yerusalɛm, i kɛsi kpalilla o kpakila nɔmndan coo, vanaa kan bɛnda mà mei sondo le few, o va ipala, o va icɔl. Niaa vanaa co Maalii veeloo le loonɔnndo a Yerusalɛm o kɔɔ-a, pɛngi co le niaa le!

⁷La mal ndu (Mɛlɛka) mòo pɛngi le, háá fɔ mò mingi Yerusalɛm toosiaa, mò siinguu ndu ɲɛ vana lisa-o o lɛŋnden coo.

⁸Mɛlɛka mɛnan a kpaaya ndɔɔ aa: «I yɔngu lɛnin yaamɔaa nɔmnda malun nɔmndon, mà dɔwnun balo a mun te, cuavaa miallo kol-lɛnin mɔima yɛngima nɔm-ma fula o sanga nɔmndo nin-ndan te.

⁹Kɛ vanaa koawnin maalon-nda dianin mun, mà mel Mɛlɛka balika. Vanaa kiandunin rɛsɛnndon-nda bɛɛ, a kolnin mɔima ndan o bɛ́ɛ̀la cɛi ni diandaa nin.

¹⁰La fula, la fula o diola luɛyaalan nin! La bɛɛndiaa nɛiyo le vanaa niaa, la toosiaa nɛiyo, la siimian ndu, la faaŋiaa powtan o nɛi! La heelu lɛfɛ landaa le vannda nɛiyo cɔmndo!

¹¹La tuei-yɔ Mɛlɛka, o co sɔɛi he yondaa háá nɛɛ lɛŋnden le mɛɛlu-a aa: «La dimul vannda Siɔn aa ‹La tofa vɔ vana ciindiaa niaa hunɔɔ. Salaa co ndu o ba, vɔ̀ngɔ̀ ndɔɔ co ndu laci.

¹²A veelunin nda aa vanaa diandaa, vanaa Mɛlɛka baŋa-a, nɔm (Yerusalɛm) yɛ, a veelunin nɔm aa: ‹Kobi nda co nuwviaa-o. Kobi co o malnan too›».