Read Kissi Esai 63 Bible Online

Esai 63 - Kissi bible

Esai 63

¹Nɛ̀ɛ́-nɛ̀ co yɛ hoo cɔnɔnndo o lɛŋnde Edɔm-nden nin mò va hunɔɔ? O co hoo cɔnɔnndo o kobio Bɔsra nin, mì sɔŋnda siaŋalan la va o volɔɔla ndɔlan-ndo? Vana kalaa co hunɔɔ a volɔɔla sɔvɛlan lekɔɔ, o co hunɔɔ a hɔlaa heelaa, a kpaaya ndɔɔ o piaa ndu o n'dial ca. Ya Maalii co sɔɛi a sandei ni, ya nɔ kpaayaa le (niaa) ciindiaa-o ni.

²Le yɛɛ nɛ volɔɔla nɔmndan la nɔ yɛ sɔŋnda siaŋalan, mì ɲɛ cuɛinan nɔmndo va maa (ɲɛ cuɛinan) vana co rɛsɛnndon nɛwvo o doola mamɔiyo nin-ndo?»

³O co fondo le, ya pilɛ kpé va cèélen nɛwvo o doolaa nin ni, hali vanndo ndu pilɛ o fula vanaa celen tɛɛn mó sɔɔnguu ya ikɛi lon te. Mí nɛw nda o kɔl ni tuwvo nin, mí pesipesi nda o kɔl ni fulaa nin, mí kooma ndan ma vesulun o volɔɔla nilan, mí volɔɔla nila cuɛinanndan la poɲa poosoo!

⁴Kani paale mingiaa màálen le va ya o kɔl, vɔsio tiiya le vanaa nia co o cɛlen nin-nda baŋaa.

⁵I va mɛɛndianndo, kɛ vana sɔlan le ya mala le. Mí mɔnɛi bii ya, kɛ vana sɔlan le sɔɔnguuo ya ikɛi le. Le hee, mí ba nuu mala ya, mí kɔltuw nuu sɔɔnguu le ya malaa.

⁶O kon, mí nɛw vanaa súúla celennda a labɛngu o kɔl ni tuwvo nin, mí mingi nda yingo-yingo o kɔl ni fulaa nin, mí taaliaa kooma ndan lɛŋ.»

⁷I yiyalannin (vannda) kɛndɛi Mɛlɛka-e a sangala ndu Mɛlɛka bɛnda mò sɔla-o, mɛɛ kɛndɛi o tosal naa-e kpow co yɛ. I diminin vanakɛndɛyɛi ndɔɛi le cuavaa Israɛlla, dɛnɛ kɛndɛ o tosal nda, mɛɛ ɲíí ndɔɛi a dɛnnda ndɔla ikɛndɛla sɛ́lɛ́lan la co yɛ-o.

⁸Mí ndóò dimi aa: «Vanaa niaa kpeekpei nda co ni, cuavaa fulanin ya kɔɔli le-a nda co ni!» Le hee, mó yɔŋnun vana ciindiaa le nda.

⁹O sangala ndalan kpede nin, (sangala yɔŋnun maa ɲɛ kindilaa hali le ndu pila lan), mí Mɛlɛka nɔ co ndu o hɔl-lo ciindiaa nda. O kaola ndɔɔ a o ɲíí ndɔɛi nin, mí ndu pila baŋa nda, mó mala nda, mó siilun nda o palɛi hiow paandu-e kpow nin.

¹⁰Kɛ má yɔŋnun vanaa nila kalua, má del kasi a kɔl diandaa ndɔɔ, mí ndu bɛɛ siŋnun yaamɔɔ ndaa, mí ndu pila cɔlɔba nda.

¹¹O kon mí vanaa ndɔa yiyan a palɛi masindɛi, má loonun a Moise, má ɲuna aa: «Kuɛɛ nɛ vana faŋa nda o mɛmma ihɛllan kɔngɔ mó heelu a nda, a vana mandaa n'saa vanaa ndɔa-o co yɛ? Kuɛɛ nɛ vana va kɔl diandaa ndɔɔ tuisio nda tɛɛn-ndo co yɛ?

¹²Ndu hiilu ba ndɔ ivanabɛnduyaa Moise o o ba kɛndɔɔ coo ni, mó tɛnda mɛmma ihɛllan nda o hɔl, le tɔ́ɔ́ bɛndu fɛɛn a fɛɛndo sɔlaa.

¹³Mó yaa nda, má kei o limun yingilan nin, mɛɛ so ɲaananndo kei o lɛŋnde veselɛilen nin nuaa yɛ, o boŋiboŋi le, o siɛla le.

¹⁴Mɛɛ cɔlua kɔa a tolɔɔ o bóllo nin nuaa yɛ, lende koni nda va lɔ́ɔ́ Kɔl Mɛlɛka-o va nda yɔɔ o pɛngio nin-ndo ni. Lekɛ́ndɛi lende n yɛɛ vanaa nɔmnda le tɔ́ɔ́ bɛndu ivanabɛnduyaa sɔlaa ni.

¹⁵Lo o halataala lon, mà tofa. Lo o calta nɔmnda diandaala vavonndan nin, mà nuaa vɔ. Kuɛɛ nɛ paŋala nɔmndo a dialun kalan nɔmndon co yɛ? Misimisi co lɛ nɔm biyɔɔ mì kɔl nɔmndo hiilun a ɲííye le naa le.

¹⁶Nduyɛ nɔm co fuɲa naa ni. Abraham sina naa le. Israɛl bɛɛ loonun-ndɛ a naa le, kɛ nɔm Mɛlɛka, nɔm co fuɲa naa ni, kabi lɔ́ɔ́ levil, nɔm nɔ diolan ni aa vana naa baŋaa.

¹⁷Éé Mɛlɛka! Le yɛɛ nɛ n co yɛ naa malɔɔ seemiaa mì n faŋan o nɛila nɔmndan coo, mì n kɔannun polon? Le yɛɛ nɛ n kindi yɛ naa nilan mí n kɛɛ le siòòŋii nɔmnde nɔu nɛ? A yandi muungu naa ikɛi, naa vanaa baalaa nɔmnda, polama fula o kɛ́ nɔmndo nin-ndan pɛɛn.

¹⁸Le telen bingi daama lɛŋnden le va o ba naa vanaa nɔmaa diandaa bɛngu ni, mí yaamɔaa naa nɛw cɛi-kola-toandaa diandaa nɔmndo a labɛngu.

¹⁹Kabi lɔ́ɔ́ levil n co maa vanaa n co lemasa tosa coo le-a, maa vanaa co diola nɔmndan veelu le-a. Kpòkóó! Te nɔm óò sɛɛsa pɛ halataalaa, mì nɔm óò tol lɛŋ, pembon va ɲiiya nɔm o hɔl.