Read Kissi Esai 64 Bible Online

Esai 64 - Kissi bible

Esai 64

¹Maa mɛɛ yinnde yɔmii vesɛilen le bii nuaa yɛ, maa mɛɛ mɛmma co ŋolɔɔ-an ma vela yɛ, lende koni yaamɔaa nɔmnda ndáà sinanin diola nɔmndan ni, mí vanaa-mangalaa-isɔɔa ndáà ɲiiya nɔm o hɔl.

²Tuma n tosa dɛnnda vueinannda naa n ve kɔl te lan-ndo, má toal, mí pembon hiilun nɔm laci.

³Kabi bɛɛ n sina le, n tui le, kabi bɛɛ n ci mí hala celen o nɔm (Hala naa) kɔɔli, o tosal lɔ vanaa tiindan ndu-a dɛnɛ kɛndɛ vaa lende le.

⁴A va kɔlan vanaa va dɛnɛ sandaa tosaa a kɔlkɛndɔɔ-a bɔŋaa, a va vanaa va kelaa o nɛila nɔmndan coo, mà va loonɔnndo a nɔm o kɔɔ-a diomɔɔ. Kɛ tofa vɔ, a tuulu kɔl a naa, kani n cua hakio, n co lo sangaa lende háá telen naa n sɔlanin cindaa-o.

⁵Naa kpow n siŋnun maa ɲɛ nɔɔlɛi, dɛnnda naala sandaalan kpede la co ko maa volɔɔ cuɛinan lɔngɔlɛi. Naa kpow n co a ɲɔfɔlɛiya maa ipee, biondɔnnda naalan la co naa cuaa coo maa ihoei.

⁶Hali lepilɛ vana pilɛ bɛɛ co nɔm diolan piɔlɔɔ le, vana-vana co tiondɔɔ mò holnun nɔm te. Kani a vin naa hɔlaa nɔmnda mà mal naa kɔsɔɔ luɛyɔɔ le tɛɛmbuula naalan.

⁷Nduyɛ nɔm Mɛlɛka, nɔm co fuɲa naa ni, naa naa, puulu cɔavaa n'kpɛɛnɔɔ naa n co ni, nɔm co vana cɔw naa-o ni, naa kpow, vali bala nɔmndan la tosa-o naa n co ni.

⁸Lelan, yandi Mɛlɛka, dɔawnun tumbé mà hiow ba le, va yiyanndo lɔ́ɔ́-lɔ́ɔ̀ o biondɔnnda naalan coo le. Tofa vɔ niko, naa kpow vanaa nɔmnda naa n co ni.

⁹Kobila nɔmnda diandaalan la lonnun yaayon, kobio Siɔn lonnun fondo fúú, ɲɔɔ mei Yerusalɛm doŋ-doŋ.

¹⁰Cɛi-Hala diandaa naa kɛndɛ-kɛndɔɔ, nɛɛ fuɲaa naa imamaa va nɔm lisaa-a ŋɔɛ o yinnden nin, ɲɛ-ɲɛ kɛndɛ sɔvɛ náà n nɔ lenin, kon kpede cuu itambu o yinnden nin.

¹¹Éé Mɛlɛka! Vɛ̀ɛ̀ a dɛnnda palaalan ndan kpow a vowlulnin naa sondo le? Vɛ̀ɛ̀ a co naa saalan te? Bàà ma tuisi naa siɛmbulan háá mì n cuu labɛɛ?