Read Kissi Esai 8 Bible Online

Esai 8 - Kissi bible

Esai 8

¹Mí Mɛlɛka dimul-la aa: «Cua pɛngɛi bɛnduei ma sɛva lecoo a ɲɛ sɛvaa aa: ‹N keleŋan ɲɔɔn hiɔlɔɔ, n kɔ cuannun ɲɛm naa n puu o cɔwvo-on cɔ́-cɔ́!›

²O kon, mí cua seyaa vana nɔla ma laalan-nda: vana-solia-lasálàá Uri nda Sakari po Yɛberekiahu-o.

³O kon kɔɔli, mí n mɔɔsa kpeloo naa laa nuu, vanalanɔ-tɛɛngaa-diom Hala-o pɛɛn, mó cua folio, mó vialu hɔ́ɔ́ piaandoo. Mí Mɛlɛka dimul-la aa: Ke ndu diolan aa ‹N keleŋan ɲɔɔn hiɔlɔɔ, n kɔ cuannun ɲɛm naa n puu o cɔwvo-on cɔ́-cɔ́!›

⁴Kani telen pá mì poombɔɔ ho caa veeloo aa ‹Pua›, ‹Nde›, a kɔanin masaa Asiri o hɔl a bolofaa Damas, a ɲɛm puununnin vannda Samari o ba o cɔwvo-on!»

⁵Mí Mɛlɛka soaa vɛlɛ o ya lo, mó dimul-la aa:

⁶«Le tùú vannda ha a pɛɛsa mɛnndan Siloe-o, mɛmma connun man hiovɔɔ fɛ́ɛ́-fɛ́ɛ́-an, le tùú nda dɔwnun ɲaale le Resin a le po Remalia-o-o,

⁷lelan la canin, Maalii co nda mɛmma pee bɛnduan, mɛmma kpaayama bɛnduan hulɔɔ coo. Mɛmma man ma co masaa Asiri a kpaaya ndɔɔ kpow ni. Ma fulanin o pee kɔ́llo mì ma hel o kɔngɔlan kpow coo.

⁸Ma luɛinin o tàndá Yuda-o nin, ma hunnin taw-taw mì ma sɛŋin nɛɛ-nɛɛ ka. Ma helnin mì ma bii nda háá o bololan, tindima ndɔma vanin fasaŋanndo-an ma kumbunin lɛŋnde nɔmnden kpow, nɔm Emmanuɛl!»

⁹Lelan, niaa vanaa-mangalaa-isɔɔa, la yonda bɛɛ yonda cɔwvo, la co cuvɔɔ yomiyomi. Niaa vanaa co icali levil-la, la yaŋ nilan! La bɛɛndian le cɔwvo, kɛ la co cuvɔɔ yomiyomi!

¹⁰La tuu dɛnndan taw le tosaa, kɛ tuula lan la co cuvɔɔ laasian. La dimi sɔɔn, kɛ sɔɔn mun tosannin te. Kani Hala co a naa latulu.

¹¹Tuma Mɛlɛka bii ya a ba ndɔɔ, mó kanalan ya aa ya tosa dɛnndan maa vannda ha loo, mó dimul-la aa:

¹²«Ɲɛ-ɲɛ vannda ha co veeloo aa: ‹Dúmbú yiyaa› niaa la veelu kon aa: ‹Dúmbú yiyaa› le, la yɔŋ siòònde a ɲɛ nda co siòònde yɔŋndo-o le, siòòŋii bii niaa mì la ɲiiya le.

¹³Mɛlɛka-Nɔ-Kpaayaa-Kpow-vo niaa bɛnda ni mi la ce o diandaa, ndu pilɛ kpé niaa bɛnda le vou a bɛɛlen keo ni.

¹⁴Nduyɛ, o vanin cɛi-kola-toandaa diandaa le yungu ndɔɔ, kɛ o vanin vɛlɛ pow boŋaa, pow kpova nɛinun vannda-o le masɛi ŋiiŋii Israɛlla. O vanin vɛlɛ yalaa a yaŋɔɔlen le vanaa co icali Yerusalɛm ciee-a.

¹⁵Vannda taw a boŋnin ndon, mà deli, mà yɔŋulun, a kayakayannin o yalaa nin mà haw.

¹⁶Bii sɔɔn mun ma manda dɛnnda cɔɔmuanndan ndan vanaa co kaandeŋaa niaa-a tɛɛn.

¹⁷Ya ya, i co Mɛlɛka tofa, o vin cuavaa Yakɔb-a hɔlaa ndɔa-o pɛɛn. Ndu ya tiindan ni.

¹⁸Tofa vɔ, ya a cuavaa Mɛlɛka yɔngu ya-a, naa n co tɔɔmaselelan a ɲɛ cɔm siɔdii lacio-o o lɛŋnde Israɛl-ten nin fulaa Mɛlɛka-Nɔ-Kpaayaa-Kpow-vo o ba ni, o co icali o pembei Siɔn coo-o.

¹⁹Taa dimul niaa pɛ aa: ‹La kɔ ɲuna vanaa suukan a vanvílɛ́iya-a, vanaa viamaa yavaa, vanaa soaa tootoo a ciŋndon sɔsaa-a, mà dimi aa hala vannda nɔ pɛ o co hala kon te nda piɛi le, o va bɛɛ aa o vanvílɛ́iya lo nda soaa le dɛnɛ kɛndɛ vanaa co yoomu-a ni›, la mulul nda aa:

²⁰‹o bɛnda mì n mingul tɔŋndo a seilen hɔlla!› Te vana suu lende le, mɛɛ ɲɛ-tengaa paale siaa venin le ndu le.»

²¹A vanin a laasiannda o lɛŋnden nin, sanga bɛndoo a yiaan ma toalnin nda coo, nduyɛ te yiaan ma nɛi pɛ nda, a tuulu kɔl. A diminin sɔɔn vɔɔnndon a masa ndaa a á Hala ndaa, a heelunin hɔlla o halataala.

²²O kon kɔɔli, a tuisinin hɔlla lɛŋ, kɛ tofa vɔ, mɔnɛi, ɲumndan a sangaa kposon vanin ni. A ɲindunin nda o ɲumma tiŋitiŋian nin.

²³Kɛ ɲumndan ma lonin le lɔ́ɔ́-lɔ́ɔ̀ o lɛŋnde sangalan la co len sisa coo len nin te: a toɲa, o palɛi hiow paandu-e nin, mí Hala tuisi vanaa va o tàndá Sabulɔn-ndo a o tàndá Nɛftali-o nin-nda siɛmbulan, kɛ o palɛi co hunɔɔ-e nin, biiloo vanin le tàndá co o mɛmma ihɛllan ikɛi Yurdɛn leeloo-o, lɛŋnde vanaa-mangalaa-isɔaa celennda pɛɛn.