Read Kissi Tɔŋ lasálàá 1 Bible Online

Tɔŋ lasálàá 1 - Kissi bible

Tɔŋ lasálàá 1

¹Paale pilɛ, mí Mɛlɛka veelu Moise o cɛi-kola-toandaa-labɔɔŋianndo nin, mó dimul ndu aa:

²«Soo o Israɛlla lo, ma dimul nda aa ‹O niaa tɛɛn, te vanndo va pɛ Mɛlɛka sálàá solullo, o soli cɔlu ndɔ sálàá o cɔlua pɔmbɔa nin, te kon te o cɔlua bɛndua nin.

³Te sálà loamaa o yeema le solio a cɔlua bɛndua nin ni, o bii cɔlu piaandu nɔ lenamta loo, o kɔ cɔm ndu o cɛi-kola-toandaa-labɔɔŋianndo sondoo haliko mi Mɛlɛka cɛl ndu.

⁴O handu baa cɔlu kon o lebol haliko mo cɛlnun, mì Mɛlɛka vɔɔsu yɔŋnda vɔɔnnda vana kon.

⁵O kon kɔɔli, o kelu cɔlu kon bololan o cɛi-kola-toandaa-labɔɔŋianndo sondoo. Vanaa-solia-lasálàá, poaa Aarɔn-nda cɔm Mɛlɛka kooma cɔlu kon, à balu man fasaŋiaa o kpengun fonda-loamaa-lasálà co o dio cɛi-kola-toandaa-labɔɔŋianndo ikɛi-yo coo pindo.

⁶O kon o soli cɔlu kon yáwvo, o sɛŋ ndu.

⁷Vanaa-solia-lasálàá, poaa Aarɔn-nda ciŋa yinnden o fonda-loamaa-lasálàá coo, à bɛɛndiaa kilion ciiŋiaa ɲɛkɛndɛi.

⁸O kon vanaa-solia-lasálàà kan, poaa Aarɔn-nda pɛɛn, a handu visin mun, a bollen, a cuɛima cɔlu kon o kilion coo o fonda-loamaa-lasálàá coo,

⁹à tɔɔ ɲɛm co ndu nin-ndon a bɛngula ndɔlan a mɛnndan, vana-solia-lasálàá pilɛ lom visin mun kpow o fonda-loamaa-lasálàá coo. Sálà ŋɔa o yin-ndo co kon ni, o ya Mɛlɛka tuɛi cun mì ɲɔɔ hɛnan ya-o.

¹⁰Te o cɔlua pɔmbɔa nin vanndo soli cɔlu o ke Mɛlɛka-o ni, te saa téndóó te kon te cuin téndóó o yɔngu le sálà loamaa solio ni, o bɛnda mò yɔngu cɔlu piaandu nɔ lenamta loo.

¹¹Mo kelu ndu bololan o fonda-loamaa-lasálàá a maluaŋ, Mɛlɛka o hɔl. O kon, vanaa-solia-lasálàá, poaa Aarɔn-nda balu koovan fasaŋiaa o kpengun fonda-loamaa-lasálàá coo pindo.

¹²Te cɔlu kon sɛŋnun pɛ, à faŋa bollen a cuɛima ndɔan, vana-solia-lasálàá pilɛ handu visin mun o kilin biyan coo o fonda-loamaa-lasálàá coo.

¹³O tɔɔ ɲɛm co cɔlu kon o dembe-on a bɛngula ndɔlan. Vana-solia-lasálàá kon lom visin mun kpow o fonda-loamaa-lasálàá coo. Sálà loamaa co kon ni, o ya Mɛlɛka tuɛi cun mì ɲɔɔ hɛnan ya-o.

¹⁴Te yowvo o yɔngu le Mɛlɛka sálà loamaa solullo ni, o bɛnda mò yɔngu piindo, te kon te kangboo.

¹⁵Mì vana-solia-lasálàá kɔɛ a yow kon o fonda-loamaa-lasálàá hɔl-ndɔ, mò sungu ndu bollen, mò lom ndu o fonda-loamaa-lasálàá coo. O kon, o balu kooma ndɔan taaliaa o kpengun fonda-loamaa-lasálà kon coo pindo.

¹⁶O faŋa kɔcɔ yow kon a bɔɔla ndɔlan, o viow lan nɛɛ nda hulu pulta macuɛilan-nda, a kpengii paalen le can-nde pɛɛn.

¹⁷O kon, o tɛnda yow kon o kumbanndan tɛɛn, kɛ o kilu kpali le, o lom ndu o kilin fonda-loamaa-lasálàn coo. Sálà loamaa co kon ni, o ya Mɛlɛka tuɛi cun mì ɲɔɔ hɛnan ya-o.›»