Read Kissi Tɔŋ lasálàá 15 Bible Online

Tɔŋ lasálàá 15 - Kissi bible

Tɔŋ lasálàá 15

¹Mí Mɛlɛka soaa o Moise nda Aarɔn ndo, mó dimul nda aa:

²«La soo o Israɛlla lo, mì la dimul nda aa: ‹Te nàà kɔɔsinaa bii pɛ vanapɔnɔɔ o dialii kolaninnde, mì kusuan ma va ndu fulaa o labɛnguninndo, mɛɛ vana nɔɔlɛiyo o co le kusuma co ndu man fulaa-an ni.

³Le kɔɔsina kon o siŋnun vana nɔɔlɛiyo ni. Hali kusuan ma va bɛɛ fulaa, te kon te mì ma kuuma lenin, vana nɔɔlɛiyo vana kon co telen o co vɔ a nàà vɔɔn kon-ndo ni.

⁴Lelan, kpele oo kpele vana kon hini pɛ coo, o siŋnun kpele nɔɔlɛiyo, kpɛŋɛ oo kpɛŋɛ o cal vɛlɛ pɛ coo, o siŋnun kpɛŋɛ nɔɔlɛiyo.

⁵Vana-vana pilan pɛ kpele vana kon hini coo-o, o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

⁶Vana-vana cal pɛ nɛɛ vana co kon a nàà-o cal-la, o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

⁷Vana pilan pɛ vana kusuan mà co kon fulaa o dialii kolaninnde-o, o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

⁸Te vana kɔɔsinaa bii kon-ndo tufu pɛ vana co o diandaa Mɛlɛka o hɔl-lo lɔluan coo, vana kon bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

⁹Kpɛŋɛ ɲɛ ɲaanan súú-súù vana nàà kon cal pɛ coo le kɔlan kelaa, kpɛŋɛ kon siŋnun o nɔɔlɛiyo.

¹⁰Vana-vana pilan pɛ ɲɛ vana nàà kon cal coo-o, te kon te ɲɛ o hini coo-o, vana kon lonin o nɔɔlɛiyo háá icɔllo. Vana-vana cua vɛlɛ pɛ ɲɛ vaa lende mo kɔɛ a ndu, o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

¹¹Te vana co kon a nàà-o pulu balan te, mò pilan vanndo, vana o pilan kon-ndo bɛnda mò tɔɔ volɔɔla ndɔla cuɛinanndan, mì ndu pila pulun, mò lo o nɔɔlɛiyo háá icɔllo.

¹²Te vana nàà kon pilan pɛ kpɛɛnɛi puuluei, a bɛnda mà pɛl kpɛɛnɛi ken, te hɛngɛi yɔmndo o pilan ni, a bɛnda mà tuei hɛngɛi kon a mɛnndan.

¹³Te kusuma va ndu man fulaa o labɛngunin mí ma siinguu ndu vana nɔɔlɛiyo-an ma cuu pɛ, o bɛnda mò cii vɛlɛ palɛi ndii ŋɔmmɛw malan o siŋnun vana diandaa. O kon kɔɔli, o tɔɔ volɔɔla ndɔla cuɛinanndan, o pulun cɛ́kɛ́lɛ́ a mɛmma peean, o siŋnun vana diandaa.

¹⁴O paale ŋɔmaandɔlen coo, o bii piinda nda ŋiɔn, te kon te kangboa nda ŋiɔn, o kɔɛ Mɛlɛka o hɔl o cɛi-kola-toandaa-labɔɔŋianndo sondoo, o kɔ yɔngu vana-solia-lasálàá nda.

¹⁵O kon, vana-solia-lasálàá soli yowvo o pilɛ sálà co le hakio sɔlaa malɔɔ-o, o soli o pilɔɔ sálà loamaa. O cii pɛ, o tosa faleŋii dindiannde vana kon coo Mɛlɛka o hɔl le kusuma fula ndu man-ndan.

¹⁶Te mɛmma ivanapɔnɔyan ma fula pɛ vanndo, o bɛnda mò pulun kpow, mò lo o nɔɔlɛiyo Mɛlɛka o hɔl háá icɔllo.

¹⁷Volɔɔ cuɛinan oo volɔɔ cuɛinan, te kon te yáw visi oo yáw visi mɛmma ivanapɔnɔyama man ma mal pɛ sɔŋndo coo, o bɛnda mò tɔɔnun, mò lo o nɔɔlɛiyo háá icɔllo.

¹⁸Te vanalanɔɔ nda vanapɔnɔɔ tosa pɛ kpelemɔɔsaa, a bɛnda mà pulun nda ŋiɔn kpow, mà lo a nɔɔlɛiya háá icɔllo.›»

¹⁹«Te vanalanɔɔ va pɛ o paangei nin, mì koovan ma va ndu fulaa, o bɛnda mò lo o nɔɔla kon nin háá palɛi ndii ŋɔmmɛw. Vana-vana pilan ndu pɛ, ndu siŋnun vana nɔɔlɛiyo háá icɔllo.

²⁰Tuma o co kon o paangei nin-ndo, kpele oo kpele o hini pɛ coo, kpele kon siŋnun o nɔɔlɛiyo Mɛlɛka o hɔl, ɲɛ-ɲɛ o cal vɛlɛ pɛ coo telen kon, ɲɛ kon siŋnun o nɔɔlɛiyo.

²¹Vana-vana pilan pɛ kpele vanalanɔ kon hini coo-o, te kon te ɲɛ o cal coo-o, o bɛnda mò tɔɔ volɔɔla ndɔla cuɛinanndan, mì ndu pila pulun, mò lo o nɔɔlɛiyo háá icɔllo.

²³Te ɲɔɔ pum va pɛ o kpele kon coo, te kon te o ɲɛ-calaa kon coo, vana pilan pɛ ɲɛ kon, ndu bɛɛ siŋnun vana nɔɔlɛiyo háá icɔllo.

²⁴Te vanapɔnɔɔ tosa pɛ kpelemɔɔsaa a vanalanɔ kon o palɛi ken nin, mì kooma ndɔma man ma fula, mì ma suinun ndu, mɛɛ vanapɔnɔ kon bɛɛ siŋnun vana nɔɔlɛiyo le palɛi ndii ŋɔmmɛw. Kpele oo kpele vanapɔnɔ kon hini pɛ coo, o siŋnun kpele nɔɔlɛiyo.

²⁵Te koovan ma va pɛ vanalanɔɔ fulaa o palɛi taw bɛngu mo ve telen o dema paangii ndɔɛi cɔ-o le, te kon te o cii pɛ paangii ndɔɛi cɔ mò va hiovɔɔ laci a koovan cɔu tuŋ, mɛɛ o co o nɔɔlɛiyo Mɛlɛka o hɔl o palɛi ken nin kpow maa telen o va paangii ndɔɛi cɔu-vo.

²⁶Kpele oo kpele o hini pɛ coo o palɛi ken nin, o siŋnun kpele nɔɔlɛiyo maa kpele o hini coo telen o va paangii ndɔɛi cɔu-vo-o. Ɲɛ-ɲɛ o cal vɛlɛ pɛ coo o palɛi ken nin, o siŋnun ɲɛ nɔɔlɛiyo maa ɲɛ o cal coo telen o va paangii ndɔɛi cɔu-vo-o.

²⁷Vana-vana pilan pɛ kpele kon, te kon te ɲɛ-calaa kon, o bɛnda mò tɔɔ volɔɔla ndɔla cuɛinanndan, mì ndu pila pulun cɛ́kɛ́lɛ́, mò lo o nɔɔlɛiyo háá icɔllo.

²⁸Kooma va ndu man fulaa-an ma pɛngi pɛ, mɛɛ mò cii vɛlɛ palɛi ndii ŋɔmmɛw malan o diandu Mɛlɛka o hɔl.

²⁹O paale ŋɔmaandɔlen coo, o bii piinda nda ŋiɔn, te kon te kangboa nda ŋiɔn, o yoo vana-solia-lasálàá nda o cɛi-kola-toandaa-labɔɔŋianndo sondoo.

³⁰O kon, vana-solia-lasálàá soli sálà co le hakio sɔlaa malɔɔ-o a yowvo o pilɛ, o soli sálà loamaa a o pilɔɔ. Lende o bɛnda ni mo tosa vanalanɔ kon faleŋii dindiannde coo Mɛlɛka o hɔl le kooma fula ndu lekɔɔ-an.

³¹La dimul Israɛlla maa a bɛnda mà caa taw, mà mandan a dɛnnda nɔɔlɛilan, yɔŋii nda nɔɔliaa fonda ni diandaa mà sɔla piɔ́mndo. Kani o fonda kon nin ya co niaa tɛɛn ni.

³²Silalan la co lan ni le vanapɔnɔ nàà kɔɔsinaa bii o dialii kolaninnde, mì kusuan ma va ndu fulaa-o, le vana mɛmma ivanapɔnɔyan ma fula, mì ma siinguu ndu vana nɔɔlɛiyo-o,

³³le vanalanɔ co paangii ndɔɛi cɔu-vo, le vana kusuan ma co fulaa o dialii kolaninnde-o a le vanapɔnɔ tosa kpelemɔɔsaa a vanalanɔɔ telen vanalanɔ kon co o nɔɔlɛiyo Mɛlɛka o hɔl-lo.»