Read Kissi Tɔŋ lasálàá 20 Bible Online

Tɔŋ lasálàá 20 - Kissi bible

Tɔŋ lasálàá 20

¹Mí Mɛlɛka soaa o Moise lo, mó dimul ndu aa:

²«Nuaa n dimulnin Israɛlla ni aa: ‹Te cua pilacieo Israɛl, te kon te mial co icali Israɛlla o bɛngu coo-o soli pɛ hɔ́ɔ́ ndɔɔ sálà o piɔmndo Molɛk lo, vana soli kon hɔ́ɔ́ ndɔɔ sálà-o bɛnda mò sɔla piɔ́mndo. Vanaa o co icali tɛɛn-nda bɛnda mà lo ndu viiyo a powtan háá mo vi.

³Ya pila Mɛlɛka bɛɛ, i co vana kon hinul, mì faŋa ndu Israɛlla tɛɛn few-few le soli o soli hɔ́ɔ́ ndɔɔ sálà o Molɛk lo-o. Kani dɛnɛ kon nɔɔliàà Cɛi-Diandaa nuu a diola nila diandaalan ni.

⁴Te vanaa vana soli kon hɔ́ɔ́ ndɔɔ sálà o Molɛk lo-o co tɛɛn-nda cɛlan pɛ le ndu isulal kumbɔɔ, mà kɛɛ le ndu viiyo a powtan le ndu diyɔɔ,

⁵ya Mɛlɛka pila co ndu hinul a polale ndɔlen kpow ni. O kon, i faŋa nda Israɛlla tɛɛn few-few. Hali vanaa co bɛɛ laasian pilɛ kon Molɛk kɔɔli maa ndu-a, i faŋanin nda Israɛlla tɛɛn few-few.

⁶Te vanndo mulin pɛ o vanaa soaa a vanvílɛ́iya-a lo a o vanaa mangalaa lo, mò laasian nda kɔɔli, i hinulnin vana kon mì faŋa ndu Israɛlla tɛɛn le laasian ndɔ kon.

⁷La díndin mì la va vanaa diandaa siŋnun teengen le ya-a, kani ya co Mɛlɛka ni, Hala niaa pɛɛn.›»

⁸«La bíí tɔŋnda nilan a silala nilan kpow. Ya co Mɛlɛka ni, ya hɛli niaa ni mí la siŋnun yungu diandaa co teengen-ndo.

⁹Te vanndo mɛna pɛ fuɲa ndɔ, te kon te kala ndɔ, vana mɛna kon-ndo bɛnda mò sɔla piɔ́mndo. Ndu pila nuwviaa piɔ́m ndɔ kon ni, kani o mɛna vanaa velu ndu-a.

¹⁰Te vanndo suunda pɛ a lanɔ pilaa, nda ŋiɔn kpow a bɛnda mà sɔla piɔ́mndo.

¹¹Te vanndo suunda pɛ a laandaa fuɲa ndɔa o pilɛ, mɛɛ o tɛɛmbuu fuɲa ndɔ labɛɛ. Lelan, vana kon a vanalanɔ nda suunda kon-ndo, a bɛnda mà sɔla piɔ́mndo nda ŋiɔn kpow. Nda pila nuwviaa piɔ́m ndaa ni.

¹²Te vanndo suunda pɛ a lanɔɔ po ndɔɔ, nda ŋiɔn kpow a bɛnda mà sɔla piɔ́mndo, kani mààla bɛndulan pila nda tosa lan ni. Nda pila nuwviaa piɔ́m ndaa ni.

¹³Te vanapɔnɔɔ tosa pɛ kpelemɔɔsaa a vanapɔnɔɔ celen mɛɛ vana tosa kpelemɔɔsaa a vanalanɔɔ nuaa yɛ, nda ŋiɔn kpow a bɛnda mà sɔla piɔ́mndo. Kani mààla bɛndu-bɛndulan pila nda tosa lan ni. Nda pila nuwviaa piɔ́m ndaa ni.

¹⁴Te vanndo kpɔnda pɛ vanalanɔɔ a kalaa vanalanɔ kon cuaa o nɔ̀u nin, mɛɛ o tosa bɔɔ mààla bɛndu-bɛndu. Vannda bɛnda mà lom vanapɔnɔ kon a vanlaandua ŋiɔŋaa kan kpúlúká a yinnden. Yɔŋii dɛnnda vɔɔnnda vaa lende la va tosanndo niaa tɛɛn.

¹⁵Te vanapɔnɔɔ hini pɛ a cɔloo, o bɛnda mò sɔla piɔ́mndo kangalan, mà dii vɛlɛ cɔlu kon.

¹⁶Te vanalanɔɔ bɛɛ hini pɛ a cɔloo, Israɛlla bɛnda mà dii nda. A bɛnda mà sɔla piɔ́mndo, kani nda pila nuwviaa piɔ́m kon ni.

¹⁷Te vanndo cua pɛ yema ndɔ fuɲa pilɔɔ, te kon te yema ndɔ nde pilɔɔ o nɔ̀u nin, mò tosa kpelemɔsaa a ndu, mɛɛ a tosa bɔɔ mààla bɛndu. A sɔlanin sala ndaa vannda kpow o hɔl. Vanapɔnɔ suunda kon a yema ndɔ fuɲa pilɔɔ, te kon te yema ndɔ nde pilɔɔ-o, ndu yɔŋnun sabu le mààla lan tosaa ni.

¹⁸Te vanapɔnɔɔ tosa pɛ kpelemɔɔsaa a vanalanɔ co paangii ndɔɛi cɔu-vo, nda ŋiɔn kpow a bɛnda mà faŋa nda Israɛlla tɛɛn few-few, le tùú nda cɛlan le vanalanɔɔ bɛ̀ɛ̀lan tɛɛmbuuo-o.

¹⁹A bɛnda ma tosa kpelemɔɔsaa a pɔmbɔɔ kala nɔm, te kon te bɛndoo kala nɔm te. A bɛnda vɛlɛ ma tosa kpelemɔɔsaa a yemaa fuɲa nɔm te. Kani vanayɛi nɔmnde bɛ̀ɛ̀lan tɛɛmbuuo co kon ni. Lelan vanaa tosa pɛ dɛnɛ vaa lende, mɛɛ sanga-sanga nda sɔla pɛ, nda pila nuwviaa ni.

²⁰Te vanndo tosa pɛ kpelemɔɔsaa a lanɔɔ pɔmbɔɔ fuɲa ndɔ, te kon te lanɔɔ bɛndoo fuɲa ndɔ, mɛɛ o tɛɛmbuu bɛndoo fuɲa ndɔ, te kon te pɔmbɔɔ fuɲa ndɔ kon labɛɛ. Sanga-sanga nda sɔla pɛ, mɛɛ nda pila nuwviaa ni. Nduyɛ a vu lende a vilunin hɔ́ɔ́ le.

²¹Te vanndo cua pɛ lanɔɔ pɔmbɔ ndɔ, te kon te lanɔɔ bɛ ndɔ o nɔ̀u nin, mɛɛ a tosa dɛnɛ nɔɔlɛiyo Mɛlɛka o hɔl. A vu o nɔ kon nin lende a sɔlanin hɔ́ɔ́ le, kani langbanɔ kon o ci bɛ ndɔ ɲɛ-ɲɛ le.

²²La bíí tɔŋnda nilan a silala nilan kpow mì la kela lecoo. Te la kela lecoo le, mɛɛ la kɔ lonin icali o lɛŋnde Kanaan-nden nin te.

²³La vial vanaa ya co tovɔɔ niaa laci-a a káà le, la kela maa nda le. Kani vanaa kan a lo yɔŋ vɔɔndo tosaa háá mí dɛnɛ ndaa nɛinun ya niko few-few.

²⁴O kon, mí dimul niaa Israɛlla maa niaa loonin lɛŋnde ndalen kɛ́ɔ ni. Ya yɔngu niaa len ɲɛ niaa pɛ́ ni. Lɛŋnde len cɔlua a tɔlɔɔlan la naŋ lenin taw-taw. Ya co Mɛlɛka ni, Hala niaa pɛɛn, ya sɛi niaa a vanaa súúla celen mí niaa va teengen ni.

²⁵Lelan la sina pɛngulan visia dendu-a a visia dindu le-a tɛɛn, yovaa dendu-a a yovaa dindu le-a tɛɛn. La pílàn ɲaa co a nɔɔlɛiya ya Mɛlɛka o hɔl-la le. Kandɔɔ a visia, yowva, visia pɔmpɔ-pɔmbɔa kela lɛŋ-nda, kɔ bii a ɲaa sasun lɛŋ-nda, a kɛ́-kɛ̀ co a nɔɔlɛiya, la pilan nda le, yɔŋii niaa pila bɛɛ siŋnun vanaa nɔɔlɛiya.

²⁶La vá vanaa diandaa mì la solin sálà le vali nuu. Kani o diandaa ya co ni, ya Mɛlɛka. I sɛi niaa a vanaa súúla celen haliko mi niaa siŋnun cuavaa nia.

²⁷Lelan, te vanapɔnɔɔ, te kon te vanalanɔɔ nɔ pɛ kpaaya o suukan a vanvílɛ́iya-o, te kon te vanndo va pɛ vana mangalaa le suukanndo a vanvílɛ́iya, vanaa nɔ kan kpaaya kon-nda bɛnda mà sɔla piɔ́mndo. Israɛlla bɛnda mà lo vanaa kan viiyo a powtan háá mà vi, kani nda pila nuwviaa piɔ́m kon ni.»