Read Kissi Tɔŋ lasálàá 21 Bible Online

Tɔŋ lasálàá 21 - Kissi bible

Tɔŋ lasálàá 21

¹Mí Mɛlɛka dimul Moise aa: «Dimul vanaa-solia-lasálàá, poaa Aarɔn-nda sɔɔn mun aa: ‹Vana-solia-lasálàá bɛnda mò siŋnun vana nɔɔlɛiyo Mɛlɛka o hɔl a dɛnɛ vana vílɛ́i co vanayɛi ndɔɛi-yo o kɔɔ le.

²Fɔ mì vana vílɛ́i kon va vanayɛi ndɔɛi kɛsɛ-kɛsɛi maa kala ndɔ, fuɲa ndɔ, po ndɔɔ, cua ndɔɔ, bɛ ndɔ, te kon te pɔmbɔ ndɔ.

³Te o nɔ vɛlɛ pɛ yema ndɔ laandu hiw-vɔ vanapɔnɔ kɔɔli loo, o nɔla mo siŋnun vana nɔɔlɛiyo le dɛnɛ ndɔɔ. Kani yema ndɔ kon ndóò luei-yɔ o yungu vanapɔnɔ celen nin te, o va vɔ o yungu ndɔɔ nin, nɛɛ nda velu ndu-a.

⁴Vana bɛndoo vana-solia-lasálàá co vanaa ndɔa tɛɛn ni, lelan o bɛnda mò nɔɔlian Mɛlɛka o hɔl te, yɔŋii o del kasi mò laasian.

⁵Vanaa-solia-lasálàá bɛnda mà sendin kàŋndan o lebol te, a bɛnda mà sendi kangbala ndalan te, a bɛnda vɛlɛ ma keŋnun vaasan lekɔɔ le.

⁶Vanaa-solia-lasálàá bɛnda mà va vanaa diandaa siŋnun teengen le ya Mɛlɛka baalaa tosallo-a, yɔŋii nda nɔɔliaa diola nilan. Kani nda hɛlin le ya sálàlan solullo mì la ŋɔɛ o yinnden nin ni, ɲɛdiaa nuu co yɛ kon ni. Lelan a bɛnda mà va vanaa diandaa siŋnun teengen le ya Mɛlɛka-a.

⁷Vana-solia-lasálàá bɛnda mò cua vanalanɔ suundɛiyo, te kon te vanalanɔ vanapɔnɔ celen laasiaa nin-ndo o nɔ̀u nin te. Ò cua vɛlɛ vanalanɔ pɔnɔ ndɔ kɛɛ-o o nɔ̀u nin te. Kani vana-solia-lasálàá bɛnda mò va vana diandaa siŋnun teengen le vali Mɛlɛka-o-o.

⁸Israɛlla kpow, la bɛnda mì la ce vanaa-solia-lasálàá maa vanaa diandaa nda co ya Mɛlɛka o hɔl ni. Kani nda co ya ɲɛdiaa niaa co ya yɔngoo-o tiiyallo ni. La cɔ nda maa vanaa diandaa nda co ni. Kani o diandaa ya Mɛlɛka co ni, ya hɛli Israɛlla le siŋnɔnndo yungu diandaa ni.

⁹Te cua vana-solia-lasálàá laasian pɛ o suundaa nin, mɛɛ fuɲa ndɔ o ke diola vɔɔnndan lende ni. Lelan, a bɛnda mà lom ndu a yinnden mò ŋɔɛ.

¹⁰Vana-solia-lasálà sɔla hɛlio le vaa bolle vanaa-solia-lasálàá kpow-vo, o nda tala cuɛima diandan o lebol o paale kafo kandaa baalalen coo le ndu pɔlaa-o, ó cuɛinun volɔɔla diandaalan le baala Mɛlɛka-o-o, o bɛnda mò puusian yiinde o lebol te. O bɛnda mò sɛɛsian volɔɔla cuɛinanndan lekɔɔ le biisio le.

¹¹O bɛnda mò sɔɔnguu vana vílɛ́iyo ikɛi le. Hali fuɲa ndɔ, te kon te kala ndɔ vu bɛɛ, o bɛnda mò siŋnun vana nɔɔlɛiyo Mɛlɛka o hɔl le nda le.

¹²O bɛnda mò faŋan o Fonda-Diandaa nin mò fula o bɛ́ɛ̀ le, yɔŋii o nɔɔliaa cɛi ni diandaa. Kani o sɔla pɔlaa le baala nuu tosaa. Ya co Mɛlɛka ni.

¹³Bolle vanaa-solia-lasálàá va pɛ lanɔɔ yilɔɔ, o bɛnda mò yil vanalanɔ hiw vɔ vanapɔnɔ kɔɔli loo.

¹⁴O bɛnda mò cua vanlaandua ha o pilɛ o nɔ̀u nin te: vanalanɔ pɔnɔ ndɔ vi-o, vanalanɔ pɔnɔ ndɔ kɛɛ-o, vanalanɔ suunda nin-ndo. Kɛ o bɛnda mò yil vanalanɔ hiw vɔ vanapɔnɔ kɔɔli loo o nɔ̀u nin o vanayan ndɔn tɛɛn,

¹⁵yɔŋii o luei polale laasiɛilen o yungule ndɔlen nin. Ya co Mɛlɛka ni. Ya hɛli ndu ni mí dindi ndu le baala nuu.›»

¹⁶Mí Mɛlɛka soaa o Moise lo, mó dimul ndu aa:

¹⁷«Soo o Aarɔn-ndo mà dimul ndu aa: ‹Kandɔɔ hau háá le fɛɛn a fɛɛn, vana-vana va pɛ namtanɔɔ o polale ndu Aarɔn-nden coo, vana kon bɛnda mò tiiyal Mɛlɛka ɲɛdiaa sálàá le.

¹⁸Namtaa kan co haa ni, á bɛnda mà sɔɔnguu lon te-a pɛɛn: vana sumɛiyo, vana bɛngu tambɛiyo, vana falei pilɛ hiow bandei a i pilɛi-yo,

¹⁹vana bɛngu yomɛiyo, te kon te vana congú yomɛiyo,

²⁰vana ibuuvo, tungoo, vana itɛɛngɔɔ, vana ihuindo, vana lakàváá, vana nda tɛnda bosio-o.

²¹Vana-vana va pɛ namtanɔɔ o polale Aarɔn-nden coo, le fɛɛn a fɛɛn, o bɛnda mò sɔɔnguu o fonda-loamaa-lasálàá ikɛi le ya sálàá lumndo le. Le tùú o co namtanɔɔ-o, o bɛnda mò sɔɔnguu a ɲɛdiaa le Mɛlɛka ndu lumndo le.

²²O tiwba mò de ɲɛm solin sálà le ya Mɛlɛka-on, o va ɲɛm dian diandaa-diandan, o va ɲɛm dian diandan.

²³Kɛ le tùú o co namtanɔɔ-o, o bɛnda mò sɔɔnguu o kola-landaa co o Cɛi-Diandaa nin-ndo ikɛi le. O bɛnda vɛlɛ mo sɔɔnguu o fonda-loamaa-lasálàá ikɛi le, yɔŋii o nɔɔliaa fonda ni diandaa. Kani ya co Mɛlɛka ni, ya hɛli vanaa-solia-lasálàá ni mí dindi nda le baala nuu.›»

²⁴Mí Moise tɛɛngul Aarɔn, poaa ndɔa a Israɛlla kpow sɔɔn mun.