Read Kissi Tɔŋ lasálàá 23 Bible Online

Tɔŋ lasálàá 23 - Kissi bible

Tɔŋ lasálàá 23

¹Mí Mɛlɛka soaa o Moise lo, mó dimul ndu aa:

²«Soo o Israɛlla lo ma dimul nda aa: ‹O palɛi diandɛi pum coo, la bɛnda mì la cuungiaa Israɛlla kpow nɛɛ pilɛ, mà tosa duɲɛi bɛnduei le ya Mɛlɛka biiloo. Duɲan bɛndun mun co mun ni:

³La nɔ palɛi ndii ŋɔmpum o lɔ́ɔ́ bɛngu le baalala niaalan kpow tosaa, kɛ paale ŋɔmmɛwndɔlen, paale pɛngiaalen le co ni. Paale len ya hɛli mí toosiaa le pɛngio ni. La bɛnda mì la cuungian le bɔŋan diandaa tosaa le ya biiloo. Fonda oo fonda niaa va pɛ icali, la bɛnda mì la tosa ɲinkon baala oo baala le, paale pɛngiaalen le co len le ya Mɛlɛka ni. La bɛnda mì la bii paale len.

⁴Kafola tɔ̀la niaa bɛnda le tosaa le ya Mɛlɛka biiloo lan la co lan ni, la bɛnda mì la cuungian kpow o paale diandaale hɛlin-nden coo mì la tosa kafoo:

⁵Te paangii tasei tiiya pɛ palɛi tɔ́ a ihiɔɔlu, la tosa kafo-hiavaa-coo a paale delaalen le ya Mɛlɛka biiloo.

⁶Te la tosa pɛ kafo kon icɔllo, diimandɔɔ la kandu kafo bulu toosian a lɛvɛn too tosaa le ya Mɛlɛka. Kandɔɔ paale len háá palɛi ndii ŋɔmmɛw, bulu niaa vanin dioo-o bɛnda mò toosian a lɛvɛnndo le.

⁷Te paale tasele len le tiiya pɛ, la cuungian le ya Mɛlɛka biiloo. La tósà ɲinkon baala niaa tosà paandu-o le.

⁸Lepalaa-lepala, la bɛnda mì la va sálàá lomɔɔ o yin le ya Mɛlɛka háá palɛi ndii ŋɔmmɛw. O paale ŋɔmmɛwndɔlen coo, la cuungian vɛlɛ le ya Mɛlɛka biiloo. La tósà ɲinkon baala niaa tosà paandu-o le.›»

⁹Mí Mɛlɛka soaa vɛlɛ o Moise lo, mó dimul ndu aa:

¹⁰«Soo o Israɛlla lo ma dimul nda aa: ‹Te la tiiya pɛ o lɛŋnde ya yɔngu niaa len nin, mì la kɔ va ciɛɔn niaan kovɔɔ, tumbu tase niaa co yii-o, la cua ndu, la yoo vana-solia-lasálàá.

¹¹O kon, kafo paale pɛngiaa cuu pɛ, diimandɔɔ vana-solia-lasálàá tosa falennde, o heelu tumbu kon coo ya Mɛlɛka o hɔl le ya ndu cɔmndo, haliko mi cɛl ndu.

¹²Paale pilɛle niaa heelunin tumbu kon coo ya o hɔl le ya ndu cɔmndo len, la solul-la vɛlɛ sálà loamaa a saa téndé nɔ vɔsio o pilɛ-o, saa kon bɛnda mò nɔ lenamta le.

¹³O kon kɔɔli, la soli vɛlɛ kpeyan vɔɔcan a cuɛiyan-ndo kiloo leŋɔmpum, le ndu lomɔɔ mì tuei cun kɛndɛ kumii ndɔɛi. Mì la hin vɛlɛ a mɔiyan litilio o pilɛ a tálá.

¹⁴Háá mì paale niaa co ya Mɛlɛka sálà kon solul-ten le tiiya, la bɛnda mì la de ɲɛ-ɲɛ o ɲɛm niaa koawnin-ndon nin te, o va bulu, o va yasala toaŋaa, o va kulun sɛnɛi. Fonda oo fonda niaa va pɛ icali, la bɛnda mì la bii silaa ho le fɛɛn a fɛɛn.

¹⁵Te kafo paale pɛngiaa cuu pɛ, diimandɔ niaa solulnin ya Mɛlɛka sálàá a tumbu tase niaa heelunin coo ya o hɔl-lo-o, la kandu palɛi cɔmndo. O kon, la cɔm lɔ́ɔ́lan tan ŋɔmmɛw yɛngɛsɛɛ.

¹⁶O lɔ́ɔ́la lan nin, te kafo paale pɛngiaa co le lɔ́ɔ́ ŋɔmmɛwndɔɔ-o cuu pɛ, diimandɔɔ palɛi ciŋa beleŋuɛɛnu. O kon, la solul ya Mɛlɛka sálà sɛnɛiyo a ɲɛm vaan.

¹⁷La va pɛ cɔnɔnndo o laniaa lo, la hin a bululan latiɔn-tiɔn le ya sálà heelunnin coo ya o hɔl-lo solullo. La bɛnda mì la toosiaa buloo a kpeyanndo kiloo leyàá, mì la vow lɛvɛnndo lecoo, mì la lom. La bɛnda mì la toosial-la bulu kon a ɲɛm tasen niaa koawnin-ndon.

¹⁸O sálà niaa solinin kon a buloo-o kɔɔli, la bɛnda vɛlɛ mì la solul-la sálà loamaa a saa téndéa nɔ vɔsio pilɛ-a nda ŋɔmmɛw, a bɛnda mà nɔ lenamta le, a naw tovaa o pilɛ a á saa kóndóa nda ŋiɔn. O kon kɔɔli, mì la hin vɛlɛ a sálà kpeyanndo a á sálà mamɔi tìw a kon-ndo. Sálàla nda lum ya Mɛlɛka, mì ɲɔɔ hɛnan ya lan la co lan ni.

¹⁹O kon kɔɔli, la solul-la vɛlɛ sálà co le hakio sɔlaa malɔɔ-o a cuin toovio pilɛ, a saa téndéa nɔ nin vɔsio pilɛ-a nda ŋiɔn le sálà kɔlɲuloo solio.

²⁰Vana-solia-lasálàá cua pɛ bulu nda toosiaa kon a tumbu tasoo-o, o heelu ndu coo, o tosa falennde ya o hɔl a cɔlua kan latulu, handɔɔ niko saa téndéa ŋiɔnda lecoo. Ɲɛm dindin le Mɛlɛka mí n siŋnun teengen-ndon co mun ni. N cuu pɛ dindin lende ya Mɛlɛka o hɔl, mì n siŋnun teengen, vana-solia-lasálàá cua mun le ndu pila.

²¹Paale pilɛle len, la bɛnda mì la cuungian le kaannden, la bɛnda mì la tosa ɲinkon baala niaa tosa paandu-o le. Fonda oo fonda niaa va pɛ icali, la bɛnda mì la bii silaa ho le fɛɛn a fɛɛn.

²²Telen niaa vanin ciɛɔn niaan kovɔɔ-o, la bɛnda mì la kow mun háá o dangaltan te. Yasala vanin delio lan bɛɛ, la cɔwviaa lan te. La mel vanaa ikɔɔa a mialla ɲɛm mun. Ya co Mɛlɛka ni, Hala niaa pɛɛn.›»

²³Mí Mɛlɛka soaa o Moise lo, mó dimul ndu aa:

²⁴«Soo o Israɛlla lo ma dimul nda aa: ‹Paale taselen o paangii ŋɔmmɛwndɔɛi nin, la bɛnda mì la ce len maa paale pɛngiaalen le co ni. La cɔ vɛlɛ paale len maa paale loonannden le co le niaa ni. La bɛnda mì la cuungian ɲinkon, mì la lisa ya taw-taw a bululan hɔŋndo.

²⁵La tósà ɲinkon baala niaa tosà paandu-o le, kɛ mì la solul-la sálàlan, mì la lom ndan o yin.›»

²⁶Mí Mɛlɛka soaa o Moise lo, mó dimul ndu aa:

²⁷«Paale bɛndule co le hakilan sɔlaa malɔɔ len[19] le co paale tɔ́ndɔlen o paangii ŋɔmmɛwndɔɛi nin ni. Paale len, la bɛnda mì la cuungian le ya Mɛlɛka biiloo, mì la bii sumndo, mì la solul-la sálàlan, mì la lom ndan o yin.

²⁸Paale len, la tosa baala oo baala le, kani paale bɛndule malaa lahakilen le co len ni. Ɲinkon, à bɛnda mà tosa faleŋii malaa lahakiei niaa Israɛlla coo ya Mɛlɛka o hɔl, ya Hala niaa pɛɛn.

²⁹Vana-vana kɛɛ pɛ ɲinkon le sumndo biyɔɔ, à bɛnda mà faŋa ndu Israɛlla tɛɛn few-few.

³⁰Vana-vana tosa pɛ baalaa ɲinkon, ya pila Mɛlɛka co ndu ɲumi ni.

³¹La bɛnda mì la tosa baala súú-súù ɲinkon te. Fonda oo fonda niaa va pɛ icali, la bii silaa ho le fɛɛn a fɛɛn.

³²Paale len kpow, paale pɛngiaalen le co le niaa ni, la tosa baala oo baala ɲinkon te. La bɛnda mì la bii sumndo, kandɔɔ o paale ŋɔmahiɔɔlundɔlen icɔllo, háá diimandɔɔ, la tosa baala oo baala le.»

³³Mí Mɛlɛka soaa o Moise lo, mó dimul ndu aa:

³⁴«Soo o Israɛlla lo ma dimul nda aa: ‹Paangii ŋɔmmɛwndɔɛi ciŋa pɛ palɛi tɔ́ a iŋuɛɛnu, la kandu ɲinkon kafo lakùùo tosaa le ya Mɛlɛka. Kandɔɔ paale len, háá palɛi ndii ŋɔmmɛw, kafo kon bɛnda mò va tosanndo.

³⁵Paale taselen, la bɛnda mì la bɔɔŋian le ya biiloo. La tósà ɲinkon baala niaa tosà paandu-o le.

³⁶O palɛi ŋɔmmɛvii ken nin, la bɛnda mì la va ya sálàlan solullo lepalaa-lepala, mì la va lan lomɔɔ o yin. Paale ŋɔmaandɔlen, la bɛnda mì la bɔɔŋian le ya biiloo, mì la lum ya sálàá o yin. La tósà ɲinkon baala niaa tosà paandu-o le.

³⁷Duɲan bɛndun niaa bɛnda le tosaa le ya Mɛlɛka biiloo-on co mún ni. O duɲan mún coo, la bɛnda mì la cuungian le ya biiloo, a le ya sálàla loamaalan, sálàla ɲɛm-vaalan, sálàla kɔlɲululan a sálàla mamɔilan solullo. Paalee-paale niaa va pɛ sálàá solio, la tosa mɛɛ silaa yɔngun niaa le paale len yɛ.

³⁸La bɛnda mì la solul-la sálàla lan, lan la cɔɔlun o sálàla niaa solul-la o paale pɛngiaalen coo lan, o ɲɛm ikɛndɔn, o sálàla niaa bàá yoolen o Mɛlɛka lo lan a o sálàla niaa solul Mɛlɛka a yeemɛi niɛi lan coo ni.

³⁹Te paangii ŋɔmmɛwndɔɛi ciŋa pɛ palɛi tɔ́ a iŋuɛɛnu, mì la cii nin tɔlɔɔla niaalan kiɔndɔɔ a ciɛɔn niaan kovɔɔ o lɛŋnde len kpow nin, la kandu ɲinkon kafoo tosaa le ya Mɛlɛka. Kafo kalaa tosannin háá palɛi ndii ŋɔmmɛw. La tósà baalaa o paale taselen a o paale ŋɔmaandɔlen coo le.

⁴⁰Paale tasele len le tiiya pɛ, la cua komɔɔla kɛndɛ-kɛndɛlan, la kelu siɔ̀ɔ́la vawlan, lɛvun yɔmii bɛndu-bɛnduei a yɔmii pɔmbɔɛi vul mì i tosa bɔɔlan o peelan kɔngɔ-e, la viow kponyoo ya Mɛlɛka o hɔl palɛi ndii ŋɔmmɛw.

⁴¹Vɔsi oo vɔsi, te paangii ŋɔmmɛwndɔɛi tiiya pɛ, la bɛnda mì la tosa kafoo ho háá palɛi ndii ŋɔmmɛw le ya Mɛlɛka biiloo. Kandɔɔ a niaa pila, kɔ bii a cuavaa niaa imamaa, la bii tɔŋndo ho le fɛɛn a fɛɛn.

⁴²Niaa pilacieea Israɛl, la bɛnda mì la va o kùùlan bɛngu háá mì palɛi ŋɔmmɛvii ken i cuu,

⁴³haliko mi cuavaa niaa imamaa hun sina fɛɛn maa o kùùlan bɛngu fuɲaa ndaa mamaa kei lɔan ni, telen ya Mɛlɛka soli nda o lɛŋnde Esipte len nin-ndo pɛɛn. Ya co Mɛlɛka ni, Hala niaa pɛɛn.›»

⁴⁴Mɛɛ nuaa Moise tɛɛsial Israɛlla kafola ndáà bɛnda le tosaa le Mɛlɛka biiloo lan ni.