Read Kissi Tɔŋ lasálàá 25 Bible Online

Tɔŋ lasálàá 25 - Kissi bible

Tɔŋ lasálàá 25

¹Mí Mɛlɛka soaa o Moise lo o pembei Sinai coo, mó dimul ndu aa:

²«Soo o Israɛlla lo, ma dimul nda aa: ‹Te la tiiya pɛ o lɛŋnde ya yɔngu niaa len nin mì la cal, la bɛnda mì la mal yondoo mò pɛngi o telenndan lapum nin le ya Mɛlɛka bɛɛlen keo. La bɛnda mì la tosa vali lecoo o telennda lan nin te.

³Kandɔɔ vɔsio pilɛ háá vɔsilan laŋɔmpum, la nɔla mì la vàá ciɛɔn niaan, mì la bɛɛsiaa nakɔla niaala n'rɛsɛnndan, mì la kɛndu rɛsɛŋun mun.

⁴Kɛ vɔsi ŋɔmmɛwndɔɔ, vɔsi pɛngiaa co kon le yondoo ni, la bɛnda mì la ke ya Mɛlɛka bɛɛlen. Vɔsi kon kpow, yondoo bɛnda mò sɔla pɛngio. La bɛnda mì la vaa n'ciɛɛ le, la bɛ́ɛ́siàà vɛlɛ nakɔla n'rɛsɛnnda niaalan te.

⁵O vɔsi kon nin, la bɛnda mì la kow mííngúúon te, la bɛnda vɛlɛ mì la kɛndu nakɔla niaala n'rɛsɛnnda bɛɛsian te lan te. Kani vɔsi kon kpow yondoo bɛnda mò sɔla pɛngio.

⁶O vɔsi pɛngiaa kon nin, ɲɛ-ɲɛ vil pɛ a ba ndɔ mo kom, mɛɛ ɲɛdiaa niaa co kon ni: kandɔɔ a niaa pila kɔ bii a cɛa niaa piaandua, cɛa niaa laandua, vanaa co vallo niaa o ba le salaa sɔlaa-a a mialaa co niaa o bɛngu coo-a.

⁷Ɲɛm mun koni vanin vɛlɛ ɲɛdiaa le cɔlua niaa a le visia yondoa o lɛŋnde len nin ni.›»

⁸«La bɛnda mì la cɔm telenndan laŋɔmmɛw, telen oo telen vɔsilan laŋɔmmɛw, mɛɛ telennda ŋɔmmɛwla lan la bɛnda vɔsilan belehiɔɔlu a laŋɔmahiɔɔlu.

⁹O kon, te paangii ŋɔmmɛwndɔɛi ciŋa pɛ palɛi tɔ́, la hɔŋ bululan o lɛŋnden kpow nin, la sangala ya taw-taw. Kani paale bɛndule baŋannden le co len le hakila niaalan ni. Lelan, bululan la bɛnda mì la hɔŋnun taw-taw paale len.

¹⁰Nuaa niaa bɛnda ni mi la tosa, le cɔmndo maa vɔsi diandaa vɔsi beleŋuɛɛnundɔɔ co ya Mɛlɛka o hɔl ni. Le hee, la bɛnda mì la yonda mì vanaa co icali o lɛŋnden nin-nda kpow a sɔla hɔ́ɔ́yɛi ndɛi. Vɔsi kɔlkɛndɛ bɛndoo vɔsi kon co le niaa ni. Vanaa yondola ndalan la hɛlun-nda bɛnda mà sɔla lan, mì cɛa muungu o yungula ndalan nin.

¹¹Lelan, Vɔsi Kɔlkɛndɛ Bɛndoo vɔsi beleŋuɛɛnundɔɔ vanin le niaa ni. La bɛnda mì la vàá n'ciɛɛ le, te kon te mì la kow n'miinguu le. La bɛnda vɛlɛ mì la kɛndu kɔmnde tɔlɔɔla niaala bɛɛsian te lan te.

¹²Kani Vɔsi Kɔlkɛndɛ Bɛndoo vɔsi kon vanin le niaa ni. La sína vɛlɛ maa vɔsi diandaa o vanin le niaa ni. Ɲɛm vaninvu lɔɔ o ciɛɔn nin-ndon niaa vanin dioo ni.

¹³O Vɔsi Kɔlkɛndɛ Bɛndu kon nin, o niaa tɛɛn vana-vana bɛnda mò mingin yondola ndɔlan o ba.

¹⁴Te la pendu pɛ, te kon te la pisi pɛ pilaciee niaa lɛŋnden o ba, la bɛnda mi la hiŋ ndu hɔlla le.

¹⁵O len piondɔɔ nin, te kon te o len pisio nin, la kiolu vɔngoo mɛɛ vɔsilan la hiow nin cɔnɔnndo a Vɔsi Kɔlkɛndɛ Bɛndu hiow-vo yɛ a vɔsila lo le kovɔɔ lecoo malan Vɔsi Kɔlkɛndɛ Bɛndu celen tiiyaa yɛ.

¹⁶Te vɔsilan la lo vɔ pɛ taw, a heelu vɔngoo, te vɔsilan la lo lɛ taw le, a tuisi vɔngoo. Kani mɛɛ kpɛ́ɛ́ kovɔɔ koawnunnin lecoo yɛ co pisin kon, te kon te piondɔn kon te.

¹⁷La hiŋ pilacieaa niaa hɔlla le, la nɔ́ siòòŋii Hala niaa. Ya co Mɛlɛka ni, Hala niaa pɛɛn.

¹⁸La kela o tɔŋnda nilan coo, la bii pɛɛkula nilan mì la kela lecoo. O kon, la vanin icali nila ɲulu o lɛŋnde niaalen nin.

¹⁹Lɛŋnden le nɛŋinin tɔlɔɔlan taw le niaa baloo dɔvɔɔ. O kon, la celnin lenin a buulan te.

²⁰Bɔɔle mì la ɲunan aa: ‹Yɛɛ naa n dia yɛnin o vɔsi ŋɔmmɛwndɔɔ nin? Kani n seŋnin ɲɛ-ɲɛ le, n kuwnin ɲɛ-ɲɛ le.›

²¹I dɔawnin niaa duaa o vɔsi ŋɔmpumndɔɔ nin, i viamnin lɛŋnden mì le vangala kɔmnde ɲɛ saŋnunnin lecoo-o len le vɔsilan tan yáá.

²²Vɔsi ŋɔmaandɔɔ la vaanin vɛlɛ ciɛɔn niaan, kɛ vɔsi kon la va vɔ nin ɲɛm niaa kow paandu-on dioo háá vɔsi ŋɔmahiɔɔlundɔɔ. Kani ɲɛdiaa vanin niaa o ba taw háá mí vɔsi ŋɔmahiɔɔlundɔɔ tiiya.»

²³«Lɛŋnden le bɛnda mi le pisin few-few le, kani Mɛlɛka ya nɔ lɛŋnden ni. Niaa co macoaa maa mialla a vanaa hiawnannda o lɛŋnde nilen nin.

²⁴Lelan, o lɛŋnde ya co niaa yɔngu len nin, la bɛnda mi la handu tɔŋndan haliko mi vana-vana nɔ dí le yondo ndɔɔ baŋaa.

²⁵Te kuɛi tol pɛ puapilɛ niaa coo, mì kuɛi ken vem ndu yondola ndɔlan o pilɛ pisio, o vanayan ndɔn tɛɛn, vana nɔ dío le ɲɛm ndɔn baŋaa-o bɛnda mò baŋa yondo kon.

²⁶Te vana kon nɔ vanayɛi kpɛɛluŋii nɔ dí le yondo kon baŋaa le, kɛ mì ndu pila sɔla ɲɛ le yondo ndɔɔ baŋaa,

²⁷o bɛnda mò tùú vɔngoo mɛɛ vɔsilan la lo le Vɔsi Kɔlkɛndɛ Bɛndoo tiiyaa yɛ, mò sala o kon mò mingin yondo ndɔɔ o ba.

²⁸Te o sɔla yɛ ɲɛ le yondo ndɔɔ baŋaa le, yondo kon lo pɔɔ vana pendu ndu-o o ba háá mì Vɔsi Kɔlkɛndɛ Bɛndoo tiiya. Vɔsi Kɔlkɛndɛ Bɛndoo tiiya pɛ, yondoo muungu niko ndu o ba.

²⁹Te vanndo pisi pɛ cɛi vana lɔl nin-ndo o kobi kungan a kpakio-o nin, vana ɲɔɔ nɔ dío le ndu baŋaa o telen bingi bɛngu: o bɛnda mò hiow vɔsio pilɛ coo kandɔɔ a paale nda pisi ndu len te.

³⁰Te cɛiyo baŋan o vɔsi pilɛ bɛngu le, o lonin le vana pendu ndu-o a le cuavaa ndɔa le fɛɛn a fɛɛn. Hali Vɔsi Kɔlkɛndɛ Bɛndoo tiiya nin bɛɛ, a mingi lɛnin ndu le.

³¹Le cɛila co cieon kungan a kpaki lon nin-ndan yɛ, la vanin o tɔŋnda pilɛlan bɛngu a yondolan tɔ̀la co o lɛŋnden nin-ndan. Cɛila vaa lende la nɔ dí mì la sɔla baŋaa le lɔ́ɔ́-lɔ́ɔ̀. Te la sɔla yɛ baŋa o vɔsila tɔ̀lan bɛngu le, Vɔsi Kɔlkɛndɛ Bɛndoo tiiya pɛ, la bɛnda mi la muunguu vanaa lacɛiya o ba.

³²Le leviia nda, o kobila leviia nin, a nɔ dí tuma-tuma le cɛila ndalan baŋaa.

³³Hali o va bɛɛ leviinɔɔ pum pendu cɛi leviinɔ celen ni, cɛi kon bɛnda mò muungu leviinɔ tase nɔ ndu-o o ba o Vɔsi Kɔlkɛndɛ bɛndoo coo. Kani cɛila lan daama la vanin kɛ leviia o lɛŋnde Israɛl-ten nin ni.

³⁴Kɛ yondola balu kobila leviia lan la bɛnda mi la pisin te, kani lan la vanin kɛ fɛɛn-fɛɛn leviia ni.»

³⁵«Te kuɛi tol pɛ puapilɛ niaa coo, mì ɲɛ-ɲɛ luɛi ndu pɛŋnden, la bɛnda mi la mala ndu, haliko mɛɛ o nɔla mò va yoomu niaa ikɛi yɛ. Lende koni niaa bɛnda le tosaa a miallo, te kon te a vana hin icali niaa o bɛngu coo-o ni.

³⁶La bɛnda mi la ɲuna ndu le niaa ɲɛ-ɲɛ mingul a tɔnɔ súú-súú lecoo le. La nɔ́ siòòŋii Hala niaa, o kon mì puapilɛ niaa va yoomu niaa ikɛi.

³⁷Te la ke ndu pɛ volion kueo, la ɲúnà ndu le niaa mulul salal a tɔnɔ lecoo le. Te la dɔnda ndu pɛ ɲɛdiaa, la ɲuna ndu le niaa ndu mingul a tɔnɔ lecoo le.

³⁸Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni le niaa lɛŋnde Kanaan-nden yɔngoo, haliko mi siŋnun Hala niaa.»

³⁹«Te kuɛi tol pɛ puapilɛ niaa coo, mì ndu pila lendulun niaa o ba, la bii ndu maa cɛ le.

⁴⁰Kɛ la bii ndu maa vana co baalaa niaa o ba le salaa sɔlaa-o, te kon te maa mial hin calle niaa o bɛngu coo-o. O lonin vana o lendulun o ba-a baalaa tosallo háá mì Vɔsi Kɔlkɛndɛ Bɛndoo tiiya.

⁴¹O Vɔsi Kɔlkɛndɛ Bɛndoo coo, hɔɔyɛi ndɔɛi yɔngun ndu pila a cuavaa ndɔa, o kon o muungu o yungu ndɔɔ nin, o kɔ mingin yondola fuɲaa ndɔa o ba.

⁴²Kani Israɛlla, vanaa niaa baalaa nda co ni, ya soli nda Esipte ni. Vana bɛnda ma pisi nda mɛɛ vana pisi cɛa yɛ le.

⁴³La bɛnda mi la tosal vana vaa lende dɛnndan kpoku-kpoku le. La nɔ́ siòòŋii Hala niaa.

⁴⁴La nɔ pɛ makoo a cɛa, a piaandua a à laandua, la pendu nda o vanaa-mangalaa-isɔaa balu niaa-a tɛɛn. Kan vanin cɛa niaa kpeekpeiya ni.

⁴⁵La nɔla vɛlɛ mì la pendu nda o cuavaa mialaa co icali o lɛŋnde niaalen nin-nda tɛɛn, te kon te o yungula ndala velun lon-ndan tɛɛn. Kan vanin cɛa niaa kpeekpeiya ni.

⁴⁶Cɛa kan niaa melnin poaa niaa kɛ́ɔ ni, kɛ ndaa vanin kon ni. La mandanin cɛa kan maa kɛ niaa le fɛɛn a fɛɛn. Kɛ le puapilɛa niaa Israɛlla nda, vana-vana bɛnda mò tosal nda dɛnndan kpoku-kpoku le.

⁴⁷Te vana co icali o lɛŋnde niaalen nin-ndo, te kon te mial hin calle niaa o bɛngu coo-o siŋnun pɛ vana bolofaa, mì kuɛi tol puapilɛ niaa Israɛlnɔɔ coo háá mò lendulun vana co kon icali o lɛŋnde niaalen nin-ndo, te kon te mial hin kon calle niaa o bɛngu coo-o o ba, te kon te mò lendulun vana pilɛ o ba o yungula mialaa kan nin,

⁴⁸o nɔ dí mò sɔla baŋaa o lendulɔn ndɔ kon kɔɔli. Puapilɛa ndɔa vana pilɛ bɛnda mò baŋa ndu.

⁴⁹Fuɲa ndɔ bɛndoo, fuɲa ndɔ pɔmbɔɔ, po fuɲa ndɔ bɛndoo, po fuɲa ndɔ pɔmbɔɔ, te kon te vanayɛi ndɔɛi kpɛɛlun-nde bɛnda mi i baŋa ndu. Te ndu pila sɔla yɛ pɛ ɲɛ le baŋanndo, o nɔla mò baŋan.

⁵⁰O kon, nda vana o lendulun o ba-o latulu, à tùú mɛɛ volion bɛnda cɔnɔnndo vɔsi o lendulun-ndo kɔlan háá a Vɔsi Kɔlkɛndɛ Bɛndoo tiiya yɛ. Mɛɛ vɔsilan la vanin yɛ lende vɔngoo kialunnin ni. Sala baala o tosa-o bɛnda mò tuunun mɛɛ sala vana vali vana sala le paalen-ndo vanin yɛ.

⁵¹Te vɔsilan la vɔ pɛ taw le Vɔsi Kɔlkɛndɛ Bɛndoo tiiyaa, o yɔngu volion calan mɛɛ vɔngu o lendulun bɛngu-o va yɛ.

⁵²Te vɔsilan la lo yɛ pɛ ɲɛ-pɔmbɔ le Vɔsi Kɔlkɛndɛ Bɛndoo tiiyaa, o tuu vɔngoo, o yɔngu volion tùúlen mɛɛ vɔsilan la dɔɔnan yɛ, o yɔngu le baŋan ndɔɔ.

⁵³O va pɛ o vana ndɔ bɛndu o lendulun o ba-o lo, vana kon bɛnda mò bii ndu maa vana vali co baalaa tosaa le vɔsio-o. La cɛl mì vana ndɔ bɛndu kon tosal ndu dɛnndan kpoku-kpoku le.

⁵⁴Te o sɔla baŋaa o nɛi-nɛi coo le, hɔɔyɛi ndɔɛi yɔngunnin ndu pila a cuavaa ndɔa o Vɔsi Kɔlkɛndɛ Bɛndoo coo.»

⁵⁵«Vanaa niaa baalaa niaa Israɛlla co ni, cɛa nia niaa co ni. Ya soli niaa o lɛŋnde Esipte len nin ni. Ya co Mɛlɛka ni, Hala niaa pɛɛn.»