Read Kissi Tɔŋ lasálàá 26 Bible Online

Tɔŋ lasálàá 26 - Kissi bible

Tɔŋ lasálàá 26

¹«La cównùn halaa fondoa le, le sélnùn piɔmnda le, la tosa pow sálà le, la kɛ́sì powtan o lɛŋnde niaalen nin, mì la kɛɛmiaa lan le lan sooloo le. Ya co Mɛlɛka ni, Hala niaa pɛɛn.

²La bii palɛi nii pɛngiɛi, mì le ke cɛi ni diandaa bɛɛlen. Ya co Mɛlɛka ni.»

³«Te la bii pɛ tɔŋnda nilan, te la tuei pɛ silala nilan mì kela lecoo,

⁴i yɔngunin piɔɔ a telen niaa bɛnda le sɔlaa-o. O kon, lɛŋnden le nɛŋi ɲɛm saŋnun lecoo-on, mì tɔlɔɔla iyɔmndan le kom kɔmnden pila.

⁵O niaa lo, la lonin malun niaan lɔɔ haa mì tuma kiandaa n'rɛsɛnndo tiiya, la lonin rɛsɛŋun niaan lɔɔ mì tuma lavayia tiiya. Baloo kuinin niaa o ba taw-taw, la calnunnin nila ɲulu o lɛŋnde niaalen nin.

⁶I lueinin kɔlɲuloo o lɛŋnden nin. La hini pɛ, ɲɛ-ɲɛ kpeeŋiaanin niaa le. I ciinin visia biyaa o lɛŋnden nin, a vɛlɛ cɔwvo luei lɛnin o lɛŋnde niaalen nin te[20].

⁷La toawnin yaamɔaa niaa, mì la mɛli nda a mɔɔn cɔwvon.

⁸Vanaa ŋuɛɛnu niaa tɛɛn a toawnin yaamɔaa niaa kɛmɛ. N'van kɛmɛ niaa tɛɛn a toawnin yaamɔaa niaa vaalan tɔ́. Yaamɔaa niaa kan a delinin niaa laci o mɔɔn cɔwvon bɛngu.

⁹I mululnin niaa hɔlla, mì nɛŋi niaa ipulu[21], mì kui niaa, mì simi kpema nuu yili a niaa.

¹⁰Ɲɛm niaa koawnin-ndon vanin niaa o ba taw-taw, mì la va mun dioo. La solinin n'paandon o kondalan nin le n'sɛnɛiyon lueiyo lon.

¹¹I kɛsinin calta nilan niaa tɛɛn, i nɔnin nɛyɔn niaa le.

¹²I vanin kelaa niaa tɛɛn, i vanin Hala niaa, mì niaa va vanaa nia.

¹³Ya co Mɛlɛka ni, Hala niaa pɛɛn. Ya soli niaa o lɛŋnde Esipte len nin ni, haliko la va cɛa Esiptea le. Ya yem yɔm kpòndò lecɛ ndáà handu niaa coo-o ni, mì la va kelaa a bolle iheelaa tema.»

¹⁴«Kɛ te la tui ya diom te, te kela o tɔŋndan ndan kpow coo le,

¹⁵te la kɛɛ pɛ silala nilan, mì la pɛɛsa nɛila nilan, te kela o tɔŋndan nilan kpow coo le, te la tɛɛmbuu pɛ kpema nuu,

¹⁶la tuei-yɔ mɛɛ ya tosalnin niaa yɛ: I tuisinin kɔl yulan-yulanndo, ɲawvo a nààla dialun tuwlan niaa coo. Nààla lan la tɛɛmbuunin niaa hɔltan mì la dɔw niaa pila yɛɛvɛ. La vanin ciɛɔn niaa fondo fúú, kani yaamɔaa niaa dɔawnunnin balo a mun ni.

¹⁷I mululunnin niaa, yaamɔaa niaa koaŋnin niaa, mì vanaa nɔ nɛyɔn niaa-a kɛsin niaa nda o labɛngunin. La ɲaanunnin hali mì vana ve niaa tovɔɔ le.

¹⁸A kon kpede te la tui ya diom te, i vangalanin sangala niaalan bɛmbɛ leŋɔmmɛw le hakila niaalan.

¹⁹I pesinin ɲɛ niaa tiindan-ndo, i kindinin halataalaa niaa coo kpoke maa icilin, mì kindi lɛŋnden maa idaɲa[22].

²⁰Yoomuma niaan ma cuunin o fondo fúúo coo. Lɛŋnde niaalen le nɛŋinin ɲɛm saŋnunnin lecoo-on te, tɔlɔɔla iyɔmndan bɛɛ la kumnin te.

²¹Te la simul-la pɛ, mì la kɛɛ le sɔɛi nii biyɔɔ, i cɔɔlunin bɛpɛla niaa vangala bɛmbɛ leŋɔmmɛw mɛɛ hakila niaalen la co yɛ.

²²I cuunin visia biyaa o lɛŋnde niaalen nin, mì visia kan diw cuavaa niaa, mà diw cɔlua niaa, mà cii niaa háá mì nɛila niaalan la yimbu.

²³Te kon kpow tiw vɛlɛ le niaa silaa le, te la simul-la pɛ,

²⁴ya bɛɛ, i simulnin niaa, mì cɔɔlu sangala niaalan vangala bɛmbɛ leŋɔmmɛw le hakila niaalan.

²⁵I tuisinin cɔwvo niaa coo, le niaa màá mingullo le kpema ni niaa tɛɛmbuu-o. Tuma niaa kɔ viannunnin o kobila niaalan nin-ndo, i saŋnin nàà n'kɔnyaa niaa tɛɛn, o kon la delnin yaamɔaa niaa o ba.

²⁶I tuŋnin niaa ɲɛdiaa. Vanlaandua tɔ́ a loamnin bulu niaa o fonda loamaa buloo ndu pilɛ nin, mà cuu niaa ndu ɲɛ-pɔmbɔ cuinii. La dianin ndu kɛ la pimnin ndu le.

²⁷O kon nin kpede te la bii sɔɛi nii le, te la hiow pɛ laci a ya simullo,

²⁸ya bɛɛ, i simulnin niaa a kɔltuwvo, mì cɔɔlu sangala niaalan vangala bɛmbɛ leŋɔmmɛw le hakila niaalan.

²⁹La sɔamnin poaa niaa a cuavaa niaa laandua.

³⁰La nɛinunnin ya háá mì tɛɛmbuu sooluula niaalan, mì pesi máánnda niaala niaa loam ansan coo lan, mì handu niaa a vílɛ́iya o piɔmaa niaa piɔsiɛiya coo.

³¹I siinguunin kobila niaalan bémbélan, mì siinguu sooluula niaalan pɔmndan. Sálàla niaala cun kɛndɛlan la hɛnan ndɛnin ya cun te.

³²Ya pila tɛɛmbuunin lɛŋnde niaalen, háá mì yaamɔaa niaa hun calnin lenin-nda dɔwnun kɔndɔfili taw.

³³I saŋnin niaa vanaa-mangalaa-isɔɔa tɛɛn, lɛŋnde niaalen le lonin fondo, mì kobila niaalan la siŋnun pɔmndan.

³⁴O vɔsila niaa ciinin o káálen nin o yaamɔaa lo lan kpow nin, yondola niaala lonin fondo lan la sɔlanin pɛngio. Pɛngi láà sɔla paandu loo, la sɔlanin ndu o vɔsila lan nin.

³⁵Lende ni, yondolan la sɔlanin pɛngio. Pɛngi kon vanin sɔ̀ngɔ́ pɛngi niaa tuŋ-ndan tuma niaa va icali o lɛŋnden nin-ndo-o.

³⁶O niaa tɛɛn, vanaa lonin yoomu o lɛŋii yaamɔaa ndaa nin-nda, i lueinin kɔl yulan-yulanndo nda nin. Hali hoeiye hiiluu peelen nin, mà tuei hiiluu kon, a voolunin mà ɲaanun mɛɛ vana ɲaanun yaamɔɔ co hunɔɔ a mɔɛi cɔwve o ba-o nuaa yɛ. A delinin hali mì vana ve nda tovɔɔ le.

³⁷Hali mì vana ve nda tovɔɔ le, a boŋinin o nda pila vellaa-velle mɛɛ vana ɲaalun mɔɛi cɔvii yaamɔɔ nuaa yɛ. A nɔlanin yaamɔaa ndaa simullo le.

³⁸O mɛɛlulan, lɛŋii yaamɔaa ndaa i dɔawnin nda yɛɛvɛ, ma vi vanaa-mangalaa-isɔɔa tɛɛn.

³⁹O niaa tɛɛn, vanaa pum a lonin yoomu o lɛŋii yaamɔaa niaa nin-nda, nda dɔawnunnin yɛɛvɛ le hakila nda pilalan a le hakila fuɲaa ndaa mamaa.»

⁴⁰«O kon, a sɔlɔlannin tɛɛmbuula ndalan a tɛɛmbuula fuɲaa ndaa mamaa, mà sɔlɔlan kasila nda del a ya lan a nila kalula nda tosa a ya lan.

⁴¹A biinin bila maa ya bɛɛ mí simul nda, mí yaa nda o lɛŋii yaamɔaa nda nin. O kon, a sinanin maa a yɔŋnun vanaa lo lediom coo le. Le hee a tuisinnin, mà cɛl sanga tol nda coo le hakila ndalan-ndo.

⁴²I loonunnin a kpema co naa tɛɛn naa Yakɔb-o, i loonunnin a kpema co naa tɛɛn naa Isaak-o, i loonunnin vɛlɛ a kpema co naa tɛɛn naa Abraham-o. O kon, i loonunnin a ciɛ́ɔn ya cua a lɛŋnde ndalen o kɔɔ-on.

⁴³Tuma nda vanin nɛɛ celen-ndo, lɛŋnde ndalen le vanin lemalnannden, o kon yondolan la sɔlanin pɛngio. Tuma kon, nda pila co va sangaa sɔlaa le tùú nda kɛɛ le tɔŋnda nilan biyɔɔ-o a le tùú silala nilan la nɛinun nda-o.

⁴⁴Ya yɛ, hali tuma nda vanin a saŋnannda o lɛŋii yaamɔaa ndaa nin-ndo, i kɛɛnin nda few-few le, a nɛinunnin ya le, i ciinin nda le, i tɛɛmbuunin kpema nuu a nda le. Kani Mɛlɛka ya co ni, Hala ndaa pɛɛn.

⁴⁵Le cinda ndaa, i loonunnin a kpema co naa tɛɛn naa fuɲaa ndaa mamaa-o o kɔɔ, fuɲaa ndaa mamaa ya soli o lɛŋnde Esipte len nin vanaa-mangalaa-isɔaa celennda o hɔl-la pɛɛn. I soli nda haliko mi va Hala ndaa. Ya co Mɛlɛka ni.»

⁴⁶Silalan ndan, pɛɛkulan ndan a tɔŋndan ndan Mɛlɛka handu ndu pila a Israɛlla tɛɛn o pembei Sinai ni. A Moise o kei le nda lan tɛɛngullo ni.