Read Kissi Tɔŋ lasálàá 3 Bible Online

Tɔŋ lasálàá 3 - Kissi bible

Tɔŋ lasálàá 3

¹«Te vanndo soli pɛ sálà kɔlɲuloo a cɔlu bɛndoo, o va cɔlu piaandu o va cɔlu laandu, o bɛnda mò hin a cɔlu nɔ lenamta loo ya Mɛlɛka o hɔl.

²Mò handu baa cɔlu kon o lebol, mo kelu ndu bololan o cɛi-kola-toandaa-labɔɔŋianndo sondoo. O kon, mì vanaa-solia-lasálàá, poaa Aarɔn-nda balu kooma cɔlu kon fasaŋiaa o kpengun fonda-loamaa-lasálàá coo pindo.

³O sálà kɔlɲulu kon nin, o soli ɲɛm ŋɔa o yin le ya Mɛlɛka-on, ɲɛm mun co mun ni: cuɛima kumbu pulon a ɲɛm co cɔlu kon o dembe-on-ndan, a cuɛima pulon a ɲɛm co ndu nin-ndon simbulun nin-ndan kpow,

⁴kɔlkelen miunndon a cuɛima holnun mun mì ma kumbu kpengun miunndon-ndan a bungɛi hiow naŋɔɔ o yemnde nin-nde, i vana faŋa a kɔlkelon latulu-e pɛɛn.

⁵Mì poaa Aarɔn-nda lom ɲɛm mun a sálà loamaa vanin o handaa o kilion coo-o latulu o fonda-loamaa-lasálàá coo. Sálà loamaa co kon ni, o ya Mɛlɛka tuɛi cun mì ɲɔɔ hɛnan ya-o.

⁶Te a cɔlu pɔmbɔɔ vanndo co Mɛlɛka sálà kɔlɲuloo solullo ni, o bɛnda mò hin a cɔlu nɔ lenamta loo, o va cɔlu piaandu o va laandu.

⁷Te a saa téndóó o hin ni, o kɔɛ a ndu Mɛlɛka o hɔl.

⁸O handu ndu baa o lebol, o kelu ndu bololan o cɛi-kola-toandaa-labɔɔŋianndo sondoo. O kon kɔɔli, poaa Aarɔn-nda balu kooma ndɔan fasaŋiaa o kpengun fonda-loamaa-lasálàá coo pindo.

⁹O sálà kon nin, o soli ɲɛm ŋɔa o yin le ya Mɛlɛka-on: cuɛima cɔlu kon, puile ndɔlen kiolɔɔ a pɛɛngu paa kɔ́ɔ́ dí, cuɛima kumbu pulon-ndan, cuɛima pulun mun simbulun nin-ndan,

¹⁰kɔlkelen miunndon a cuɛima holnun mun mì ma kumbu kpengun miunndon-ndan a bungɛi hiow naŋɔɔ o yemnde nin-nde, i vana faŋa a kɔlkelon latulu-e pɛɛn.

¹¹Mì vana-solia-lasálàá lom ɲɛm mun kpow o fonda-loamaa-lasálàá coo. Ɲɛm dian nda loam o yin le ya Mɛlɛka-on co mun ni.

¹²Te a cuinndo o co sálàá solio ni, o hin a ndu Mɛlɛka o hɔl,

¹³o handu ndu baa o lebol, o kelu ndu bololan o cɛi-kola-toandaa-labɔɔŋianndo sondoo. O kon, vanaa-solia-lasálàá, poaa Aarɔn-nda balu kooma ndɔan fasaŋiaa o kpengun fonda-loamaa-lasálàá coo pindo.

¹⁴O sálà kon nin, o soli ɲɛm co le lomɔɔ le ya Mɛlɛka-on: cuɛima kumbu pulon-ndan a cuɛima pulun mun simbulun nin-ndan,

¹⁵kɔlkelen miunndon a cuɛima holnun mun mì ma kumbu kpengun miunndon-ndan a bungɛi hiow naŋɔɔ o yemnde nin-nde, i vana faŋa a kɔlkelon latulu-e pɛɛn.

¹⁶Mì vana-solia-lasálàá lom ɲɛm mun kpow o fonda-loamaa-lasálàá coo. Ɲɛm dian nda loam o yin-ndon co mun ni. Cuɛima fula cɔloo nin-ndan kpow ma co le ya Mɛlɛka.

¹⁷Silaa co hoo le niaa le fɛɛn a fɛɛn ni, kandɔɔ a niaa pila kɔ bii a cuavaa niaa imamaa: fonda oo fonda niaa va pɛ icali, la dia cuɛima cɔloo le, la dia vɛlɛ kooma ndɔan te.»