Read Kissi Tɔŋ lasálàá 5 Bible Online

Tɔŋ lasálàá 5 - Kissi bible

Tɔŋ lasálàá 5

¹«Te vanndo ce pɛ dɛnɔɔ pum o tosanndo, te kon te mò sina sɔɛi pum, mà veelu vannda le seilen tɛndaa a dɛnɛ kon o kɔɔ, kɛ mò kɛɛ le kɔlan seile len tɛndaa, mɛɛ hakio o tosa ni, sanga haki ndɔɔ vanin ndu pila o lebol.

²Te vanndo pilan yɛ pɛ ɲɛ nɔɔlɛiyo[1] hali o sina lepɛŋndo nin, maa visi nɔɔlɛi vílɛ́iyo, te kon te cɔlu cieenin nɔɔlɛi vílɛ́iyo, te kon te mò pilan visin visi nɔɔlɛi vílɛ́iyo pum o visia pɔm-pɔmbɔa kela lɛŋ-nda tɛɛn, mɛɛ o siŋnun vana nɔɔlɛiyo a vana tɛɛmbua tɔŋndo.

³Hali mì vanndo sìná le, te o pilan pɛ vanaciee co o dɛnɛ nɔɔlɛiyo nin-ndo, dɛnɛ súú-súù nɔla mo nɔɔliaa vanacieo, vana kon siŋnun vana tɛɛmbua tɔŋndo lɔ́ɔ́ o sinanin tɛɛmbuu ndɔɔ-o.

⁴Te vanndo yiyan fɔlɔn ɲɛkɛndɛi le, mo teŋnun[2] le dɛnɛ kɛndɔɔ tosaa, te kon te le dɛnɛ vɔɔndo, te o dow sɔɛi ken taasi mò tosa sɔɛi o teŋnun ken coo-e le, telen o sinanin lende-o, o siŋnun vana tɛɛmbua tɔŋndo.

⁵Lelan, mɛɛ mì vana tɛɛmbuu tɔŋndan ndan o pilɛ-o sɔlɔlan haki o tosa-o,

⁶o kon, o hin a cɔlu laandoo le sálà bɛɛndiaa isɔɔ o ya Mɛlɛka lo le haki o tosa-o: saa laandoo, te kon te cuin laandoo. Mì vana-solia-lasálàá tosa ndu faleŋii baŋannde coo le haki ndɔɔ vɔɔsuuo mò malnun haki.»

⁷«Te vanndo nɔ se le saa laandoo, te kon te le cuin laandoo sɔlaa le, o hin o Mɛlɛka lo a piinda nda ŋiɔn, te kon te kangboa nda ŋiɔn le sálà bɛɛndiaa isɔɔ solio le haki o tosa-o. Mì o pilɛ va le sálàá le hakio sɔlaa malɔɔ, o pilɔɔ le sálà loamaa.

⁸Mò hin a yovaa kan o vana-solia-lasálàá lo, mì vana-solia-lasálàá dii fɔlɔn yow co le sálàá le hakio sɔlaa malɔɔ-o, mò kandu ndu bollen kiolɔɔ o kɛsei, kɛ o kilu ndu bollen kpali le,

⁹mò balu kooma ndɔan taaliaa o fonda-loamaa-lasálàá pindo, mò cuiŋi matɔ̀an lebɛngu. Sálà co le hakio sɔlaa malɔɔ-o co kon ni.

¹⁰O cii pɛ kon, o soli sálà loamaa a yowvo pilɔɔ, o tosa a ndu mɛɛ faleŋun sálà loamaa n co yɛ. Lende vana-solia-lasálàá bɛnda ni mo tosa vana tɛɛmbuu tɔŋndo-o faleŋii baŋannde coo le haki o tosa-o. O kon Mɛlɛka mal ndu haki.

¹¹Te vana kon nɔ vɛlɛ se le piinda nda ŋiɔn, te kon te kangboa nda ŋiɔn sɔlaa le, o yɔngu kpeyanndo kiloo leyàá le sálàá le hakio sɔlaa malɔɔ. O bɛnda mò vow cuɛiyan lecoo le, o bɛnda vɛlɛ mo kɛsi ansan lecoo le, kani sálàá le hakio sɔlaa malɔɔ co kon ni.

¹²O cua ndu pɛ, o kɔɛ a ndu o vana-solia-lasálàá lo, mì vana-solia-lasálàá ɲɔla kpeyan kon baa ca, ɲɛ loonanndo co kon ni. Mò lom ndu kpúlúká o yinnden nin o fonda-loamaa-lasálàá coo, o sálàla nda loam o yinnden nin le ya Mɛlɛka lan coo. Sálàá le hakio sɔlaa malɔɔ co kon ni.

¹³Lende vana-solia-lasálàá bɛnda ni mo tosa faleŋii baŋannde vana kon coo le haki o tosa-o. O kon Mɛlɛka mal ndu haki. Ɲɛ tɔ̀ lonin-ndo vànin le vana-solia-lasálàá mɛɛ o tosan a sálàla ɲɛm-vaalan yɛ.»

¹⁴Mí Mɛlɛka soaa o Moise lo, mó dimul ndu aa:

¹⁵«Te vanndo tosa pɛ haki kàlà-kálàá o sandii lepɛŋnde nin, mò kɛɛ le ɲɛm co le ya Mɛlɛka-on yɔngoo, o bɛnda mò yɔngu saa kóndó nɔ lenamta loo le haki o cua a ya Mɛlɛka-o, mà kelu ndu iyama o volin latámán nin mɛɛ volin latámán có dionnɔnndo o Cɛi-Diandaa nin-ndon co yɛ. Cɔlu kon vanin le sálà ɲɛ pilaa salaa ni.

¹⁶O kon, vana tosa kon hakio-o sala ɲɛm ndóò bɛnda le ya Mɛlɛka yɔngoo-on kpow. Kɛ o va pɛ mun salaa, o handu ipilɛ o ŋuɛɛnu oo ŋuɛɛnu coo, o hin a ɲɛm mun o vana-solia-lasálàá lo. O hin pɛ a mun, vana-solia-lasálàá tosa faleŋii baŋannde ndu coo a saa kóndó kon le haki o tosa-o. O kon Mɛlɛka mal ndu haki.

¹⁷Hali mì vanndo sìná le, te o tosa pɛ hakio, mò tosa dɛnɛ tɔŋnda Mɛlɛka lan la kuuna-o, o siŋnun vana tɛɛmbua tɔŋndo hali mò sina telen o tosa dɛnɛ kon-ndo le. Le hee, sanga haki ndɔɔ vanin ndu pila o lebol.

¹⁸O bɛnda mò yoo vana-solia-lasálàá cɔlu fula o cɔlua pɔmbɔa nin-ndo, saa kóndó nɔ lenamta loo pɛɛn. O kɔɛ pɛ a ndu, à kelu ndu iyama maa cɔlu co le sálà mingiaa ɲɛ pilaa-o, mì vana-solia-lasálàá tosa faleŋii baŋannde vana kon coo le haki o tosa o sina lepɛŋndo nin-ndo. O kon, Mɛlɛka mal ndu haki.

¹⁹Sálà co le ɲɛ pilaa mingio-o co kon ni, kani tɛɛmbuuo kpeekpei vana kon ndóò tɛɛmbuu a Mɛlɛka ni.»

²⁰Mí Mɛlɛka soaa o Moise lo, mó dimul ndu aa:

²¹«Te vanndo ve sakpo a Mɛlɛka le, mò tosa yɔŋ vɔɔndo, mò pala puapilɛ ndɔɔ a ɲɛ nda ke ndu le kɛsio-o o kɔɔ, a ɲɛ nda yow ndu-o o kɔɔ, mò yɔŋ vuilen, mò puu ɲɛ pilaa a sondo yeelaa,

²²te kon te mò saalun ɲɛ pila lo-o, mò kɛɛ le ndu cɔmndo, mò mɛnan o còòlan coo a dɛnɛ vɔɔn vanacieo tosà-o o kɔɔ,

²³mɛɛ o tosa yɔŋ vɔɔn bɛndu. Te o sina pɛ haki ndɔɔ, o bɛnda mò sala ɲɛ o ciimbuu-o, ɲɛ o puu a sondo yeelaa-o, ɲɛ nda ke ndu le kɛsio-o, te kon te ɲɛ pila lo mo saalun ndu-o. Kani hakio o tosa le dɛnnda o tosa lan-ndan ni, lelan o siŋnun vana tɛɛmbua tɔŋndo ni.

²⁴O kon kɔɔli, o bɛnda mò mingi ɲɛ o viinun sɔɛi ndɔɛi mo mɛnan o còòlan coo-o. O va pɛ ndu mingio, o handu ipilɛ o ŋuɛɛnu oo ŋuɛɛnu coo o vɔngu ndɔɔ coo. O kon, o mingul vana nɔ ɲɛ kon-ndo paale nda vanin cɔlu o yɔngunin vana-solia-lasálàá le sálà ndɔ co le ɲɛ pilaa mingio-o solio len.

²⁵O kon o hin a cɔlu sálà co kon le sálà mingiaa ɲɛ pilaa-o o ya Mɛlɛka lo: cɔlu fula o cɔlua pɔmbɔa nin-ndo, saa kóndó nɔ lenamta loo. Mà kelu ndu iyama, mà yɔngu vana-solia-lasálàá ndu le sálà co le ɲɛ pilaa mingio-o solio.

²⁶Mì vana-solia-lasálàá tosa faleŋii baŋannde ndu coo Mɛlɛka o hɔl. O kon, o sɔla hakio malɔɔ le ɲɛ-ɲɛ o tosa mó siŋnun vana tɛɛmbua tɔŋndo.»