Read Kissi Tɔŋ lasálàá 8 Bible Online

Tɔŋ lasálàá 8 - Kissi bible

Tɔŋ lasálàá 8

¹Paale pilɛ, mí Mɛlɛka soaa o Moise lo, mó dimul ndu aa:

²«Veelu Aarɔn nda poaa ndɔa, ma cua volɔɔla solia lasálàlan, cuɛima pɔlan, naw tova co le sálà co le hakio sɔlaa malɔɔ-o, saa kóndóa ŋiɔnda a kambɛi bulu toosian a lɛvɛn too co nin-ndo,

³ma cuungiaa vɛlɛ sɛ́lɔ́ɔ́ kpow o cɛi-kola-toandaa-labɔɔŋianndo sondoo.»

⁴Mí Moise tosa mɛɛ Mɛlɛka dimul ndu yɛ, mó cuungiaa sɛ́lɔ́ɔ́ kpow o cɛi-kola-toandaa-labɔɔŋianndo sondoo.

⁵Mó dimul nda aa: «Ɲɛ Mɛlɛka dimul naa le tosaa-o co hoo ni.»

⁶Mí Moise veelu Aarɔn nda poaa ndɔa, mó pulu nda a mɛnndan.

⁷Mó vow Aarɔn doma lebɛngoo, mó yii ndu yáwlen, mó vow ndu doma bɛndoo, mó vow ndu doma ifalenndo lecoo, mó yii yáwve o doma ifalen kon coo,

⁸mó handu ndu doma-lapow-iyamaa o takpa, mó vow urim a tumim o yifɔla doma-lapow-iyama kon nin.

⁹Mó vow ndu mɔsil vilɛiyo o lebol, mó handu pɛngɛi n'sianiei o mɔsil kon laci, tomasele diandaa co kon ni, mó va kpafii mɛɛ Mɛlɛka dimul ndu Moise le tosaa yɛ.

¹⁰O kon kɔɔli, mí Moise cua cuɛima va le pɔlaa-an, mó pɔla Calta Mɛlɛka lan a ɲɛm va lenin-ndon kpow, mó dindi mun,

¹¹mó vesul cuɛiyan bɛmbɛ leŋɔmmɛw o fonda-loamaa-lasálàá, mó pɔla ndu a ɲɛm-laandun diandan ndɔn kpow, a fɛngɛ bɛndoo a tum fɛngɛ kon cal coo-o le ɲɛm mun siinguuo teengen le baala Mɛlɛka-o.

¹²O kon kɔɔli, mó tala Aarɔn cuɛima pɔlan o lebol, mó pɔla ndu le ndu siinguuo teengen le baala Mɛlɛka-o.

¹³Mí Moise veelu vɛlɛ poaa Aarɔn-nda, mó vow nda domala lebɛngulan, mó yii nda yáwve, mó vow nda mɔsilta solia lasálàlan mɛɛ Mɛlɛka dimul ndu le tosaa yɛ kpafii.

¹⁴O kon kɔɔli, mí Moise sɔɔnguu naw tova va le sálà co le hakio sɔlaa malɔɔ-o, mí Aarɔn nda poaa ndɔa handu balan naw tova kon o lebol.

¹⁵Mí Moise kialu ndu bololan, mó cua kooma ndɔan, mó vow suei lenin, mó suu o kpɛ̀ɛ́n fonda-loamaa-lasálàá, mó balu man suiyo pindo, mó cuiŋi matɔ̀an o fonda-loamaa-lasálà kon bɛngu, mó dindi ndu le baala Mɛlɛka-o, le faleŋun sálà co le hakio sɔlaa malɔɔ-on tosaa lecoo.

¹⁶Mó cua cuɛima kumbu pulon-ndan kpow, bungɛi hiow naŋɔɔ o yemnde nin-nde, kɔlkelen miunndon a cuɛima kumbu mun-ndan, mó loam ɲɛm mun kpow o fonda-loamaa-lasálàá coo.

¹⁷Visin tɔ̀un naw kon, yáw ndɔɔ, a ɲɛm va ndu o dembe-on kpow, mó loam mun a yinnden o dɔ́ɔ́ngɔ́ɔ̀ kɔɔli, mí Moise tosa falenndon mɛɛ Mɛlɛka cɔm ndu yɛ kpafii.

¹⁸O kon kɔɔli, mó hun a saa kóndó va le sálà loamaa solio-o, mí Aarɔn nda poaa ndɔa handu balan saa kóndó kon o lebol,

¹⁹mí Moise kialu ndu bololan, mó fasaŋiaa kooma ndɔan o kpengun fonda-loamaa-lasálàá coo kpow.

²⁰Mó siaŋ cɔlu kon, mó kilikili ndu, mó loam bollen, visin bɛɛnndon a visin macuɛiyon.

²¹Mó tɔaa pulon a bɛngulan o mɛnndan nin, mó loam saa kóndó kon kpow o fonda-loamaa-lasálàá coo. Ndu yɔŋnun sálà loamaa cun kɛndɛ ŋɔɛ o yin le ya Mɛlɛka-o ni. Mí Moise tosa falenndon mɛɛ Mɛlɛka cɔm ndu yɛ kpafii.

²²O kon kɔɔli, mó hun a saa kóndó diinndɔɔ, saa kóndó va le sálà kandaa baala Mɛlɛka-o solio-o pɛɛn. Mí Aarɔn nda poaa ndɔa handu balan saa kóndó kon o lebol.

²³Mí Moise kialu ndu bololan, mó cua kooma ndɔan, mó vow man o nile tiilannde ba kɛndɛle Aarɔn-nden nin, mó suu ndu man o suei bɛndui ba ndɔ kɛndɔɔ a o suei bɛndui bɛngu ba ndɔ kɛndɔɔ.

²⁴Mí Moise sɔɔnguu vɛlɛ poaa Aarɔn-nda, mó vow koovan o nila ndala tiilannda ba kɛndɛlan nin, mó suu nda man o suon ndan bɛndun bɛngula ba kɛndɛlan. Mó fasaŋiaa kooma tɔ̀an o kpengun fonda-loamaa-lasálàá coo kpow.

²⁵Mó cua vɛlɛ cuɛima cɔlu kon, puile ndɔlen, cuɛima kumbu pulon-ndan a bungɛi hiow naŋɔɔ o yemnde nin-nde, kɔlkelen miunndon a cuɛima kumbu mun-ndan, a lɔlu ba kɛndɔɔ,

²⁶mó cua dɛɛ toaŋaa toosian a lɛvɛn too, o toŋnun a cuɛiyan-ndo, a dɛɛ toaŋaa o pilɛ o kambɛi bulu toosian a lɛvɛn too va nin-ndo nin, kambɛi va Mɛlɛka o hɔl-lo pɛɛn, mó kɛsi lan o visin macuɛiyon coo a o lɔlu ba kɛndɔɔ coo.

²⁷Mó cua ɲɛm mun kpow, mó yɔngu Aarɔn nda poaa ndɔa, mó cɔm nda faleŋii vana heelu ɲɔɔ coo le Mɛlɛka ndu cɔmndo-e. O kon mí nda tosa faleŋii ken, má cɔm Mɛlɛka ɲɛm mun.

²⁸Mɛɛ nda cii cɔm, mí Moise bii nda ɲɛm mun o ba, mó loam mun o fonda-loamaa-lasálàá coo, o sálà loamaa coo. Sálà kon co sálà kandaa baalaa ni, o ŋɔa kpúlúká o yinnden nin-ndo, o Mɛlɛka tuɛi cun mì ɲɔɔ hɛnan ndu-o pɛɛn.

²⁹Mí Moise cua kɔŋɔ saa kóndó va le sálà kandaa baala Mɛlɛka-o-o, mó tosa faleŋii vana heelu ɲɔɔ coo le Mɛlɛka ndu cɔmndo-e. Mí kɔŋɔ kon yɔngun Moise mɛɛ Mɛlɛka dimul ndu le tosaa yɛ.

³⁰Mí Moise cua cuɛima va le pɔlaa-an a kooma va o fonda-loamaa-lasálàá coo-an, mó fasaŋiaa man Aarɔn coo a o volɔɔla va ndu lekɔɔ lan coo, mó fasaŋiaa man vɛlɛ poaa Aarɔn-nda coo a o volɔɔla va nda lekɔɔ lan coo. Lende Aarɔn nda poaa ndɔa, a volɔɔla va nda lekɔɔ lan kpow sɔla pɔlaa ni.

³¹Mí Moise dimul Aarɔn a poaa ndɔa aa: «La yáw vision o cɛi-kola-toandaa-labɔɔŋianndo sondoo. Lon niaa dianin mun a bulu co o kambɛi sálà kandaa baala Mɛlɛka-o nin-ndo ni. Maa mɛɛ ya dimi yɛ, Aarɔn nda poaa ndɔa dianin mun ni.

³²Ɲɛ tɔ̀ co lo o visin mun a o bulu kon nin-ndo, la lom ndu o yin kpúlúká.

³³O palɛi ndii ŋɔmmɛw bɛngu, la bɛnda mì la faŋan o cɛi-kola-toandaa-labɔɔŋianndo sondoo le, háá mì palɛi kelun ken le bɛɛndianndo le baalaa niaa kandɔɔ-e i cuu few. Kani fɔ mì palɛi tosan ndii ŋɔmmɛw malan niaa cuu bɛɛndian le baalaa kandɔɔ.

³⁴Dɛnɛ tosan hoo hau-vo, Mɛlɛka pila dimi le tosaa lende ni, haliko mi la sɔla hakio malɔɔ le hakila niaalan.

³⁵O palɛi ŋɔmmɛw-ve he bɛngu kpede, la bɛnda mì la lo o cɛi-kola-toandaa-labɔɔŋianndo sondoo paalen a ɲumndan, mì la bii sɔɛi Mɛlɛka-e yɔŋii niaa vu. Kon dimulun ya le tosaa ni.»

³⁶Mí Aarɔn nda poaa ndɔa tosa ɲɛ-ɲɛ Mɛlɛka dimul nda le tosaa, o Moise tɛɛngul nda-o.