Read Kissi Yeremi 10 Bible Online

Yeremi 10 - Kissi bible

Yeremi 10

¹Israɛlla, la yaŋ nilan o sɔɛi Mɛlɛka co dimio a niaa o kɔɔ-e!

²O dimi aa: «La tuula vanaa-mangalaa-isɔɔa a kela ndaa le. Siòòŋii bii niaa a tɔɔmaselela co o halataala lan te, kani a nda vanaa-mangalaa-isɔɔa nɔ siòònde taw ni.

³Kani ɲɛ fondoo fúú naamula vanndacieea la co ni. A kelu pɛ yɔmndo o bundɔɔ nin, vana caa baala labaa-o tosa ndu baala a cuei,

⁴a kɛɛmiaa ndu a volin latámán a á sianion, a cua káángoo a baŋ ndu a pɔɔndɔn, yɔŋii o va hiilɔnndo.

⁵Maa ɲɛla nda lɛɛnduu o ciɛi nin le yowva tovɔɔ lan halaa ndaa co ni, a suu le. Fɔ ma cua nda, kani a nɔ pelun kɔaa le. La vo nda le, kani a nɔla vana ɲɛ yɔŋ te, a nɔla vɛlɛ vana mala le.»

⁶Vana-vana co maa nɔm te Mɛlɛka, a co o bɔɔ, diola nɔmnda kpaaya lan la co la bɔɔ.

⁷Nɛ̀ɛ́-nɛ̀ kɛɛ yɛnin nɔm vo, nɔm co masaa le vanaa-mangalaa-isɔɔa súúlan kpow-vo? Nɔm vana bɛnda le vou ni, kani o vanaa kɔlkalua co vanaa-mangalaa-isɔɔa súúlan kpow-va tɛɛn, a o masɛi ndɛi kpow nin, vana-vana co maa nɔm te.

⁸Nda kpow ɲɛ pilɔɔ nda co ni, a kindu lakɔl te, diɔmnda nda co ni, yɔmii sialɛi nda co ni, halaa ndaa nɔla nda ɲɛ-ɲɛ cɔm te.

⁹Vana caa baala labaa-o sɛl pɛ, vana teengiaa cilinndon-ndo yikpa nda a pɛngɛn volin humbun nda fula Tarsis-on, te kon te a sianin nda fula Ufas-on. O kon kɔɔli, a vow nda kolala keesela siaŋala sɔɔtɔtɔlan a la yim-yimndan. Mɛɛ nda co kpow, vanaa caa baala labaa-a toosiaa nda ni.

¹⁰Kɛ Mɛlɛka, Hala kpeekpeiyo o co ni, Hala nɔ yoomoo o ba-o, masa co le lɔ́ɔ́-lɔ́ɔ̀-o. Te o tambu pɛ kɔllo, lɛŋnden le ɲiiya, vanndacieea nɔla kɔl ndɔ tuwvo simullo le.

¹¹O niaa co nda dimul-lo co hoo ni aa: halaa cow halataala a lɛŋnden te-a kpow a co hunɔɔ itambu o lɛŋnden coo ma ɲum o halataala bɛngu.

¹²A kpaaya ndɔɔ Mɛlɛka cɔw lɛŋnden ni, a kɔlkalu ndɔɔ o kila ceendo ni, a dɛnɛ sinaa ndɔɔ o pɛngɛla lɛŋnden ni.

¹³O cua dɔ́ɔ́ pɛ sondoo, mɛnndan ma cuungian o halataala, coocoo piimiaa kɔɔli-kɔɔli, ɲɔɔ kandu dɔ́ɔ́ volio le piɔɔ tuisio, hoeiye cɛn hɔŋndo.

¹⁴Vanndacieea kpow a siŋnun diɔmnda, siɛmbulan la bii vanaa toosiaa n'piɔmnda a piɔmaa ndaa, kani còòlan fúú piɔmaa kan a co ni, a nɔ hoeyii yoomaa nda niŋ te.

¹⁵Ɲɛ fondoo fúú nda co ni, baala n'taaninndo. Telen Mɛlɛka cannin le mɔnɛ soli a nda-o, a co hunɔɔ itambu kpow.

¹⁶Hala co le Yakɔb-o co maa nda le, kani ndu toosiaa ɲɔɔn kpow ni, Israɛlla co polale co kɛ́ ndɔɔ len ni, diola ndɔlan aa Mɛlɛka-Nɔ-Kpaayaa-Kpow-vo.

¹⁷Cɔwviaa ɲɛm nɔmndon lɛŋ, nɔm vana nda cii nin hoo tiila-o.

¹⁸Kani o Mɛlɛka dimi-o co hoo ni aa: «O laan, i co vanaa co o lɛŋnden nden nin-nda viovɔɔ polon, i co nda ŋɔvɔɔ haliko ma sɔla biyɔɔ.»

¹⁹«Mbɔ̀ ya i kɔndu dɛnɛ fɔ́! Bolin nuu singu le. I va dimio aa: sanga co le ya-o, i bɛnda mì biwnun ndu.

²⁰Cɛi-kola-toandaa nuu puusian, yoei ndɔɛi kpow i suingin. Cuavaa nia kpow a faŋan ya, a co lɛ le, vana co lɛ le ya cɛi-kola-toandaa nuu mingul-lo isisi le, le ya nɛɛ calaa tengullo le.»

²¹Diɔmnda simlacia yɔŋnun ni, a ɲuna Mɛlɛka le, lelan nda dema dɛnɛ ni, mí cɔlua ndaa lakundaa sɛŋin kpow.

²²La yaŋ ndɔ nilan! Diomndo co fulaa, vɔkɔ-vɔkɔ bɛndoo co sɔɛi fulaa a ba luaŋ-ndo, le hunɔɔ kobila Yuda lan mingio pɔmndan, nɛɛ bɛ̀mɛ́lta tivolla la vanin-nda.

²³Mɛlɛka, i sina maa vanacieo nɔla kelaa mɛɛ o bɛnda yɛ le, vanacieo nɔla kelaa a ba ndɔ o nɛila kɛndɛlan coo le.

²⁴Mɛlɛka, sila ya tùúlen, o va a kɔltuw le, yɔŋii n tɛɛmbuu ya.

²⁵Tuisi kɔltuw nɔmndo lɛŋii sina nɔm te-e a vanaa co nɔm biilu le-a coo. Kani a co vanaa nɔmnda ɲɔɔn poondiaa o laba, a co nda mɛiyo fondo fúú, a co lɛŋnde ndalen tɛɛmbuuo.