Read Kissi Yeremi 11 Bible Online

Yeremi 11 - Kissi bible

Yeremi 11

¹Sɔɛi Mɛlɛkai dimulun Yeremi-e yɔŋnun hee ni aa:

²«Yaŋ nilan o sɔɔn kpemaa ho, mà dimul vanpiaandua Yuda a vannda Yerusalɛm sɔɔn mun aa:

³‹Diom Mɛlɛka, Hala Israɛlla dimi-o co hoo ni aa: Dɛnɛ palaa co le vana kon, o kɛɛnin le sɔɔn kpemaa ho yaŋnɔnndo-o,

⁴o ya sɛval fuɲaa niaa mamaa, o paale ya soli nda Esipte, o tóndó teengiaa n'cilinndo nin-ndo.› Mí dimul nda aa: ‹La yaŋ nilan o diom nuu, mì la kela o sɔɔn ya dimul nia-on kpow coo, o kon la vanin vanaa nia, mì ya i va Hala niaa.

⁵O kon, i peelunin kpema yáà yiilu fuɲaa niaa mamaa le nda lɛŋnden yɔngoo-o, lɛŋnde tɔlɔɔlan la naŋ nin taw len pɛɛn, maa mɛɛ niaa co cɔu hau nuaa-yɛ.›» O kon mí muli aa: «Amiina Mɛlɛka!»

⁶Mí Mɛlɛka dimul-la vɛlɛ aa: «Yonda sɔɔn mun o kobila Yuda lan nin a o nɛilan Yerusalɛm coo aa: ‹La yaŋnun sɔɔn kpemaa ho, mì la kela lecoo.

⁷Kani kabi ya soli fuɲaa niaa mamaa Esipte háá hau, nuaa koni ya va nda baŋnɔnndo kɔɔli a sɔɛi ni, i va sɔɛi o nda lo mí va sɔɔn mun mingio dimio aa: La yaŋnun diom nuu!

⁸Kɛ a yeŋnun te, a muli lahɔl lon te, ma del yiyannda ndala vɔɔnndan kɔɔli. O kon mí peelu sɔɔn kpema kon kpow nda coo le tùú nda kɛɛ le lou o kpemaa coo-o, a sɔɔn kɛ́-kɛ̀ ya dimul nda kpede a cɛl le ndu biyɔɔ loon pɛɛn.»

⁹O kon kɔɔli mí Mɛlɛka dimul-la aa: «Yudaa a Yerusalɛmnda cii dúmbóó yii.

¹⁰A muungun o dɛnnda vɔɔnnda fuɲaa ndaa mamaa kɛɛ le sɔɔn nun biyɔɔ-a coo, má mulin halaa celen kɔɔli le nda sooloo. Israɛlla a Yudaa tɛɛmbuu kpema yáà yii a fuɲaa ndaa mamaa-o.

¹¹Lelan o Mɛlɛka dimi-o co hoo ni aa: ‹I co nda dɛnɛ palaa tuisi coo, a nɔlanin fulaa lebɛngu le. A mɛlinin yeelan o ya lo, kɛ i yeŋnin nda lani le.

¹²O kon Yudaa a Yerusalɛmnda mulinnin o halaa ndaa nda solul sálàlan-nda lo, kɛ a baŋanin nda a dɛnnda ndala palaalan te few.

¹³Kani Yudaa nda, mɛɛ nda nɔ kobilan yɛ koni nda nɔ halaa ni! Mɛɛ Yerusalɛmnda nɔ nɛilan sɛ́lɛ́ taw yɛ koni nda tangul máánndan le piɔmaa ndaa Baal sálàlan solullo ni.›

¹⁴Lelan nɔm Yeremi, piɛi le vannda ha le, hali mà solul-la diom le ya tɛɛlɔn, te kon te le ya ɲɔɔlu le nda le. Kani telen nda vanin o dɛnɛ palaa nin-ndo, a veelunin ya le nda malaa, kɛ i yeŋnunnin nda le.»

¹⁵Yɛɛ vana ni ya kaola taw-vo co yɛ hunɔɔ tosa o cɛi nuu nin? O co hiovɔɔ laci tuŋ a dɛnnda vɔɔnndan kuiyo. O nɔ ko o kɔl aa yoei o co baa o ya lo-e a visin sálàn o co ya keo-von n nɔla ndu dɛnɛ palaa cii kuee. O ca kaa ken solinin ndu o dɛnɛ palaa nin ni?

¹⁶Diola ya Mɛlɛka yáà ke ndu lan la va lan ni aa: ‹Oliviee puiyaa kulun kɛndɛ bɛndoo.› Kɛ mí mal yinnden o bɔɔ ndɔ yukɔn-ndo nin, o diom bɛndu-bɛndoo nin, mí le loam lɛɛndun ndɔn kpede.»

¹⁷Mɛlɛka-Nɔ-Kpaayaa-Kpow-vo ndóò tɔl ndu ni. Ndu kon co tosaa ni mì dɛnɛ palaa va nɔm tolɔɔ coo, le dɛnɛ vɔɔn Israɛlla a Yudaa tosa-o, a cii ya tiŋɔɔ o Baal sálàlan solullo.»

¹⁸Mí Mɛlɛka cɔm ya dɛnɛ kon, mí bii ndu bila. O kon mó cɔm ya kela nda co-o.

¹⁹Ya i va mavaa nda o ba maa saa téndé co kɔlan a ba ndɔ le ndu kɔlan diyɔɔ-o, i ve yiyannda vɔɔnnda ndáà nɔ o kɔl a ya lan sina le, a va dimio aa: «N kioŋnun yɔmndo telen o co o lende-o. N sungun ndu mò fula vanaa yoomaa tɛɛn, vannda yiyan ndɛ a diola ndɔlan o kɔɔ le.»

²⁰Kɛ nɔm Mɛlɛka-Nɔ-Kpaayaa-Kpow-vo, nɔm co vana kialaa n'yama sandaa ni, nɔm sina yeemɛi a yiyanndan kpow ni. I canin mɛɛ n mingulnin nda maa yɛ, kani nɔm ya tiindan ni.»

²¹Lelan ɲɛ Mɛlɛka dimi a vannda Anatɔt o kɔɔ-o co hoo ni, a yeema le ya Yeremi diyɔɔ-a, nda dimi ni aa: «Tɛɛngul naa isɔɔ o diola Mɛlɛka lan te, yɔŋii naa n dii nɔm.»

²²Ɲɛ Mɛlɛka-Nɔ-Kpaayaa-Kpow-vo dimi le nda-o co hoo ni aa: «I co nda simul, langbaa felengia ndaa vunin o mɔɛi-cɛwve bɛngu, mì poaa ndaa a cuavaa ndaa laandua vi a yima fofolan.

²³Vɔsi ya cannin le vannda Anatɔt dɛnɛ palaa tuisio coo-o, vana-vana helunnin o nda tɛɛn te.»