Read Kissi Yeremi 14 Bible Online

Yeremi 14 - Kissi bible

Yeremi 14

¹Sɔɛi Mɛlɛka dimul Yeremi a kpundɛ valo bɛndoo o kɔɔ-e co hee ni aa:

²«Vannda Yuda co o mɔnɛi nin, kobila ndalan la co yɛɛvɔɔ dɔwnɔnndo, a co a hɔlaa yiyaa icali lɛŋ. Yerusalɛmnda co koŋullo, mì diom ndaa va kɔlan háá o halataala.

³Vanaa bɛndua co buɛyaa ndaa vomɔɔ kela mɛnndan. A co kɔlan o soonnda mandaa mamɛnndan, ma va lan komallo la velɛilan, a co muungoo a ɲɛla ndala vovaa mamɛnndan fondo. Siɛmbula bɛndulan la bii nda ma kumbu hɔlla.

⁴Lɛŋnden le piɔsi nɛɛ-nɛɛ ka fee, kani piɔɔ co sia lecoo le. Le hee, vanaa vàá co buulanndo, a co hɔlla vionɔɔ.

⁵Kiallo mɛi cuale o kom sɛnɛi len yondoo nin, kani bil puiyaa co lɛ le.

⁶Sofɛlɛa yondoa co isisi o pembun puleeon coo, a co hoeiye cunndo cuaa maa n'tivoli, a co sangaa hɔlla keeliaa, kani bil kiɛi co lɛ le.»

⁷«A toɲa, hakila naalan la co naa seilen solullo, kɛ Mɛlɛka, tosa ɲɛ pum le diola nɔmndan, kani n hui nin nɔm bɔɔ, naa n vɔw a nɔm ni.

⁸Nɔm Israɛl tiindan-ndo, nɔm ciindiaa ndu o telen dɛnɛ palaa-o, le yɛɛ nɛ n tosa yɛ maa mial o lɛŋnde ndɔlen nin, maa vana hiawnan kei cɛi-kola-toandaa ndɔɔ simi le lɔan-ndo?

⁹Le yɛɛ n tosa yɛ maa vanapɔnɔ nɔ mayoomu loo, maa kuubanɔ cɔw nɔla vana ciindiaa loo? Nduyɛ a co naa tɛɛn, nɔm Mɛlɛka, le nɔm naa n co ni, mal naa le.»

¹⁰Diom Mɛlɛka dimi a vannda ha-o co hoo ni aa: «A yeema bɔɔ balɔɔ ba-ba fee, a kɛsi pelon te.» Dɛnɛ ndaa hɛnan-ndɛ Mɛlɛka le, o loonunnin a pɔwla ndalan, mò saangiaa nda le hakila ndalan.

¹¹Mí Mɛlɛka dimul-la aa: «Tɛɛlun ya o lepiɛi nin le vannda le.

¹²A biinin bɛɛ sumndo, i yeŋnin nda lani o ya ɲɔɔloo le. Hali a soli sálàla loamaalan a ɲɛm-kéan, i cɛlnin ndan te. Kɛ mɛɛ mì cii nda kpede a cɔwvo, a yima fofolan a á nàà n'kɔnyaa.»

¹³Mí muli aa: «Éé Maalii Hala! Vanaa-tɛɛngaa-diom Hala-a ndaa co nda dimullo aa: ‹Fɛɛn bɛɛ la sinanin ɲɛ co cɔwvo a yima fofolan-ndo le. Kɛ Hala kenin niaa kɔlɲulu kpeekpeiyo o fondaa ho.›»

¹⁴Mí Mɛlɛka mulul-la aa: «Vanaa-tɛɛngaa-diom Hala-a kan co dimio aa o diola nilan nda co sɔɛi ni. Còòlan fúú. O co ya le vem nda le, i dimul nda ɲɛ-ɲɛ le, sɔɔn fondon fúú nda co dimio a siɔdii lacio o kɔɔ ni, sɔɔn nda pila toosiaa le vannda palaa-on daama ni.

¹⁵Lelan o ya Mɛlɛka dimi a vanaa-tɛɛngaa-diom Hala-a kan-ndo co hoo ni, i vim nda le, kɛ ma va dimio aa o diola nilan nda co sɔɛi ni maa cɔw lueinin te, yima venin o lɛŋnden nden nin te. Nduyɛ, cɔwvo a yiaan ma co nda cii kpow ni.

¹⁶Vanaa nda co siɔdii laci kon dimullo-a yɛ, a delinin o nɛilan Yerusalɛm coo a cɔwvo a á yima fofolan. Vana-vana venin le laandaa ndaa, poaa ndaa, te kon te cuavaa ndaa laandua kumbɔɔ le. Lende ya cuiŋinin dɛnɛ nda vɔɔndo nda pila coo ni.

¹⁷«Sɔɛi n dimulnin nda-e co hee ni aa: Paalen a ɲumndan mɛmɛan ma co ya tolɔɔ kongilan, kani dɛnɛ palaa vɔɔn-vɔɔndo tol vanaa nia coo, a yɔŋulun yɔŋulɔn nɛyaa bɛndu singu loo.

¹⁸Te i kɔɛ pɛ yondoo nin, vanvílɛ́iya tuŋ ya saalun ni, a cɔwvo co diwvo-a. Te i kɔɛ pɛ ciee, vanvílɛ́iya tuŋ ya ca ni, vanaa-tɛɛngaa-diom Hala-a a vanaa-solia-lasálàá co kelanndo o lɛŋnden nin, ɲɛ-ɲɛ bɛɛ a co bila biyɔɔ le.»

¹⁹«Vɛ̀ɛ̀ kɛɔ few-few n kɛɛ Yuda nuaa ni? Vɛ̀ɛ̀ nɛinɔnndo Siɔn nɛinun nin nɔm ni? Le yɛɛ n yɔŋul-lɛ naa yɔŋul singunin too? N va yiyanndo maa n sɔlanin kɔlɲuloo, kɛ dɛnɛ kɛndɛ bɛɛ. N va siongɔɔ kɔl, kɛ yɛlɛma bɛɛ!

²⁰Mɛlɛka, n sina maa n cee tosa le, n sina vɔwle fuɲaa naa. Naa n cua hakio a nɔm ni.

²¹Le tɔ́ɔ́ nɔm kɛndɔɔ, soli kpɛŋɛ nɔm lemasa a biilu bɛndoo o baa nin te. Yiyan, kialu kpema nɔmndo a naa le!

²²O halaa co vanaa-mangalaa-isɔɔa o ba-a kpow tɛɛn, hala kuɛɛ nɛ nɔla yɛ piɔɔ tuisio? Vɛ̀ɛ̀ halataalaa pila tuisi piɔɔ ni, o co nɔm te co Mɛlɛka Hala naa le? Hala naa, nɔm naa n kɛsi kɔllo coo ni, kani nɔm tosa dɛnnda lan kpow ni.»