Read Kissi Yeremi 16 Bible Online

Yeremi 16 - Kissi bible

Yeremi 16

¹Mí diom Mɛlɛka-o dimulun ya aa:

²«A bɛnda ma yil lanɔɔ, mà velu cuavaa piaandua, te kon te a laandua o lɛŋnden nden nin te.

³Kani o ya Mɛlɛka dimi le poaa a cuavaa laandua co violɔn o lɛŋnden nden nin-nda, handɔɔ fuɲaa ndaa a kalaa ndaa o kɔɔ-o co hoo ni:

⁴Nàà piɔ́mndo biinin nda mà vi, vana venin le nda caŋ te, a sɔlanin kumbɔɔ le. Lende nda lonin ni mà siŋnun kɔmbɔɔsio lɛŋ. Cɔwvo a yima fofolan ma diwnin nda ni, mì duàá a tivolla de dialun ndan.»

⁵O Mɛlɛka dimul-la vɛlɛ-o co hoo ni aa: «Luɛi o cɛi biisio nin te, kɔa o biisi le, toolu vana-vana le biisi le, kani i cii canyɛi, kɛndɛi a kaola va naa tɛɛn naa vannda ha-o tɛɛmbuu.

⁶Vanaa bolofaa te kon te vanaa bala fondoa vunin o lɛŋnden nden nin, vana venin le nda kumbɔɔ le, vana venin le nda caŋ te. Vana-vana mɔnɛi biinin mò keŋnun vaasan lekɔɔ, te kon te mò sendin tembello le biisi ndaa le.

⁷Vana-vana venin le ɲɛdiaa piɔvanndo nda vanaa biisio del-la le nda ɲɔɔlu le. Vana-vana yɔngunin vɛlɛ vanaa fuɲa nda, te kon te kala nda vi-a taala kólaa le nda ɲɔɔlu le.

⁸Luɛi vɛlɛ o cɛi ɲɛdiaa kafoo co nin-ndo, mà kɔ cal niaa vannda le dioo a kolɔɔ le.

⁹Kani o ya Mɛlɛka-Nɔ-Kpaayaa-Kpow-vo, Hala Israɛl-lo dimi-o co hoo ni aa: ‹I co vɔkɔ-vɔkɔ lakafo ndaa ɲumi, mì ɲumi yoondiaala ɲaalela ndalan a condun felengia co nɔlan kila sɛnɛiyo-a. La va vɔnin icali mì la ce ken ciŋ.›»

¹⁰«Lɔ́ɔ́ n dimulnin vannda ha sɔɔn mun kpow-vo, bɔɔle a ɲunanin nɔm aa: ‹Le yɛɛ nɛ Mɛlɛka co yɛ naa dɛnnda palaala bɛndula vaa lende kpow tuisi coo? Dɛnɛ vɔɔn yɛɛ naa n tosa yɛ? Haki yɛɛ nɛ naa n tosa yɛ a Mɛlɛka Hala naa?›

¹¹O kon a mululnin nda aa: Sɔɛi fula Mɛlɛka o sondo-e co hee ni aa: ‹Kani fuɲaa niaa mamaa kɛɛ ya, má yiinun a halaa celen, má baŋ nda vulan o labɛngunin, má sooluu nda. Ya niko, má mal-la, a bii pɛɛkuula nilan te.

¹²Niaa yɛ, la co dɛnnda hiow vɔwlen ndan tosaa, la fuɲaa niaa tosa lan pɛɛn, vana-vana co kɛɔ nilan yaŋɔɔ o sɔɔn nun, le yiyannda niaala vɔɔnndan tolɔɔ kɔɔli.

¹³Lelan, i co niaa tovɔɔ mì yɛɛ niaa o lɛŋnde niaa sina le len nin, le fuɲaa niaa mamaa sina bɛɛ paandu le len, lon niaa kɔ vanin halaa celennda sooloo paalen a ɲumndan ni, i tuinun ndɛnin niaa iɲíí le.›»

¹⁴Lelan, mí Mɛlɛka dimi aa: «Paale co hunɔɔ, vannda mɛnan ndɛnin aa: ‹Le Mɛlɛka yoomaa, o soli Israɛlla Esipte-o› le.

¹⁵Kɛ aa: ‹Le Mɛlɛka yoomaa, o soli Israɛlla o lɛŋnde co a ba luaŋ-ndo len nin a o lɛŋii tɔ̀ɛi ndóò tow nda nin-nde nin-ndo!› Kani i co nda mingi o lɛŋnde ndale yáà yɔngu fuɲaa ndaa mamaa len nin.»

¹⁶Sɔɛi fula Mɛlɛka o sondo-e co hee ni aa: «I co vanaa yɔɔyaa sɛ́lɛ́ bɛndoo yɔɔ, mà kɔ yɔɔya nda, o kon kɔɔli mì vem doosua sɛ́lɛ́ bɛndoo, mà kɔ vɔm nda o pembon coo, o buubuuon coo a o tɛɛndiaala powta kpovalan tɛɛn dí.

¹⁷Kani i nɔ hɔlten o kela ndaa kpow coo, kela ndaa co o viannan ya o hɔl te, hakila ndalan la co ya o hɔl kpendekele.

¹⁸I co nda sala dɛnnda ndala vɔɔnndan yɔngu bɛmbɛ lediin, kani a cii lɛŋnde nilen tɛɛmbuu, a cii kɛ́ nuu pei cá a piɔmaa ndaa lamàá-a.»

¹⁹Mɛlɛka, nɔm co kpaaya nuu a vana co ya kandaa-o ni, nɛɛ nia viannannda o paale dɛnɛ palaalen coo! Vanaa-mangalaa-isɔaa sina Hala le-a hunnin nɔm o ibuŋ fulaa o ceendo mɛɛlulan, mà dimi aa: «Fuɲaa naa mamaa sɔla kɛ́ celen te, fɔ còòlan, ɲɛm fondon soli vana kpeku lon.

²⁰Vanacieo nɔla halaa cownɔn te, ɲɛla o toosiaa lan la co n'hala le.»

²¹Lelan mí Mɛlɛka dimi aa: «O laan i co nda kpaaya nuu a yoomuma nian cɔm, o kon a sinanin maa diola nilan la co Mɛlɛka ni.»