Read Kissi Yeremi 17 Bible Online

Yeremi 17 - Kissi bible

Yeremi 17

¹«Haki Yudaa co mɛɛ vana sɛva sɔɛi pum a tuɛndɔɔ, te kon te a pɔɔndɔɛi diamannde yɛ. O co nda o sɛvaa o lakɔl a o kpɛ̀ɛ́n fondala-loamaa-lasálàlan coo.

²Mɛɛ nda yiyan poaa ndaa coo yɛ, lende koni nda co yiyanndo fondala-loamaa-lasálàla ndalan, sungbuma soolaama ndan, a yɔmii puiyɛi co o pembon coo-e coo ni.

³Niaa vannda Yuda, niaa co keiyo piɔmnda sooloo o pembon coo yondoo nin ni. I co ɲɛ-sɔlaa niaa, ɲɛm niaan, a tombun niaan malɔɔ vannda o ba. I tosanin ken le hakila niaa tosa o lɛŋnde niaalen kpow nin-ndan.

⁴La malnin kɛ́ yáà ke niaa-o, mì siinguu niaa cɛa yaamɔaa niaa o lɛŋnde niaa sina le len nin. Yinnde niaa mɛndul-la o kɔl-ten le vanin biyɔɔ le fɛɛn a fɛɛn.»

⁵Diom Mɛlɛka dimi-o co hoo ni aa: «Dangaa co le vana kalifan vanacieo, mò kɛsi kɔllo vanaciee yoomaa coo, mò faŋa kɔl ndɔɔ Mɛlɛka coo-o.

⁶Maa bɔ̀ɔ̀ n'yɔ co o lɛŋnde veselɛilen nin-ndo vanaa kan co ni. Lɔ́ɔ́-lɔ́ɔ̀ bɛɛ, dɛnɛ kɛndɛ co le nda le, o lɛŋnde veselɛile lapowlen nin tuŋ nda co ni, lɛŋnde ihɛlte vanaciee co nin te len.

⁷Kɛ duaa co le vana kalifan ya Mɛlɛka-o, ò ya Mɛlɛka co kɔlkɛsiaa ndɔɔ-o pɛɛn!

⁸Vana kon co maa yɔm co o tɔalaa o peo kɔngɔ-o, ò puundun ndɔn talataliaa háá o mɛnndan nin di-o. Hangullo va bɛɛ hunɔɔ siòòŋii bii ndu le, Pei ndɔɛi co ikiyɛi lɔ́ɔ́-lɔ̀ɔ́. O va bɛɛ o vɔsi valo bɛndoo nin, o buulan te, o sanga a komɔɔ le.

⁹Ɲɛ-ɲɛ hui vana maa kɔl vanacieo le. Vana nɔla ndu singio le, vana nɔla ndu bɛɛ bila biyɔɔ le.

¹⁰Mí ya Mɛlɛka dimi aa: Ya co vana ca o kɔllo nin di-o ni, i sina yiyannda viannannda co o kɔltan nin-ndan. Le hee, i tiwba mi bii vana-vana mɛɛ kela ndɔɔ co yɛ, mɛɛ dɛnnda vana-vana la co yɛ.

¹¹Maa sɔɔ kuumbun o pelta o dow le lan coo-o vana co bolofaa sɔlaa o kafalan nin-ndo co ni. O tiiya pɛ o yoomu ndɔɔ tɛɛn, o mɛi bolofaa kalaa, o mɛɛlulan, o hiŋnun bollen.»

¹²Kpɛŋɛ lemasaa nɔ biilu bɛndoo-o pum co kabi o tasendɔ, ndu hiow ɲɔɔn kpow ni. Lon cɛi-kola-toandaa diandaa naa co ni.

¹³Mɛlɛka, nɔm co kɔlkɛsiaa Israɛlla ni! Màá siɛmbulan la bii vanaa kɛɛ nɔm-nda kpow! Diola vanaa co nɔm kɔɔ mulullo-a kpow la co lasɛvaalan o cundoo nin, kani a kɛɛ nɔm Mɛlɛka co soon mɛmma cindaa-o.

¹⁴Mɛlɛka, singi ya mì sengu, ciindiaa ya mì cinda, kani biilu nɔmndo co ya o sondo lɔ́ɔ́-lɔ́ɔ̀.

¹⁵Vannda co ya dimullo aa: «Ɔ́ɔ̀ niko kɔngɔliannda Mɛlɛka va lan? Mɛɛ sɔɔn o dimi mun-ndon peelun-ndɔ niko!»

¹⁶Ya, i beŋ nɔm le dɛnɛ palaa tuisi kangalan te, o co yeemɛi ni mì paale dɛnɛ palaalen le tiiya le. Nɔm Mɛlɛka, a sina ken válán. Diom ya soo-o, nɔm o hɔl ya dimi ndu ni.

¹⁷Tosa mì siòònde bii ya mì ɲiiya le, nɔm co nɛɛ nia viannannda o paale dɛnɛ palaalen coo ni.

¹⁸Vanaa co ya yɛlen tollo-a siɛmbulan láà bɛnda le biyɔɔ ni, kɛ o co ya le. Ndáà bɛnda le ɲiiyaa a siòònde ni, kɛ o co ya le. Tuisi paale dɛnɛ palaalen nda coo, mà tɛɛmbuu nda kpede.

¹⁹Mí Mɛlɛka dimul-la aa: «Kɔ mà sim o dio kobio sondoo, nɛɛ masaa Yuda a kei le luɛyɔɔ a le fulaa o kobio nin-nda, a o diola tɔ̀lan Yerusalɛm kpede.

²⁰Mà dimul nda aa: ‹Niaa masaa a Yudaa kpede, niaa vana-vana co Yerusalɛm mì la va keiyo o diola luɛyaalan-ndan, la yaŋ nilan o diom Mɛlɛka dimi-o.

²¹O Mɛlɛka dimi-o co hoo ni aa: La caa taw, la cua lavolɔɔ kɛ́-kɛ̀ o paale pɛngiaalen coo, mì la kei a lan o diola Yerusalɛm-ndan te.

²²La soli lavolɔɔ kɛ́-kɛ̀ o laniaa lo cɛilan nin o paale len coo le, la tosa baala kɛ́-kɛ̀ le, la manda paale len le ya, maa mɛɛ ya dimul fuɲaa niaa mamaa yɛ.

²³A tui ya diom te, a yeŋ ya lani le, má kindi nilan, a cɛl le nilan yaŋɔɔ ma sɔla pɛɛkoo le.

²⁴Sɔɛi fula Mɛlɛka o sondo-e co hee ni aa: Kɛ niaa, te la yaŋ pɛ nilan o sɔɛi nii, mì la cue lavolɔɔ mì la kei a lan o diola kobio ho le, mì la ke paale pɛngiaalen bɛɛlen, mì la tosa baala kɛ́-kɛ̀ le,

²⁵mɛɛ masaa co o kpɛŋɛ lemasa David-o coo-a, a co kelaa o soa coo a o ɲɛla ɲaanannda soa nan-ndan coo-a vanin keiyo lɔ́ɔ́-lɔ́ɔ̀ o diola kobio ho. Simlacia ndaa, vannda Yuda a vanaa-vanaa co Yerusalɛm, nda bɛɛ a vanin keiyo lon, a vanin vɛlɛ icali o kobio ho nin le lɔ́ɔ́-lɔ́ɔ̀.

²⁶Vannda vanin fulaa o kobilan Yuda a o Yerusalɛm balɔɔ, a pum a fulanin o tàndá Bɛnyamɛn-ndo nin, cɔnɔnndo o lɛŋnden a ba too, kɔ tiiyaa a maluaŋ kɔ bii a Nekɛv, le hunɔɔ sálàla súú-súù ka solio: sálàla loamaalan, sálàla celenndan, ɲɛm-kéan a ansan, a vanin vɛlɛ hunɔɔ a sálàla malaa balikalan o Cɛi-Mɛlɛka-o nin.

²⁷Kɛ te la yeŋ ya nilan te, te la luei paale pɛngiaalen yii mì la manda len le ya le, te la cua pɛ volɔɔlan o paale len coo, mì la kei a lan o diola Yerusalɛm-ndan, i malnin kobi kalaa yin, mì cɛila ndɔla kɛndɛlan la ŋɔɛ, nduyɛ le ɲumnin te.»