Read Kissi Yeremi 18 Bible Online

Yeremi 18 - Kissi bible

Yeremi 18

¹Mí diom Mɛlɛka-o dimulun Yeremi aa:

²«Cɔn ma kɔɛ o vana cɔavaa n'kpɛnɔɔ lo, lon ya dimulnin nɔm sɔɛi ya nɔ le nɔm dimullo-e ni.»

³Mí kɔa o vana cɔavaa n'kpɛɛnɔɔ lo, i komal ndu o baala cɔavaa n'kpɛɛnɔɔ coo.

⁴Kpɛɛnɛi o va cɔvɔɔ-e ndíì bɛnda lapi le, nduyɛ lende ɲɔɔ ndóò yɔŋnun ndu o ba lɔ́ɔ́ lepum ni. Mó toosiaa kpɛɛnɛi celen mɛɛ ndóò yeema yɛ.

⁵O kon mí diom Mɛlɛka-o dimulun ya aa:

⁶«Vɛ̀ɛ̀ i tiwba mi tosa a niaa Israɛlla mɛɛ ya tosa a vana cɔavaa n'kpɛɛnɔɔ ho yɛ le? Mɛɛ puulu cɔavaa n'kpɛɛnɔɔ va vana cɔavaa n'kpɛɛnɔɔ o ba nuaa yɛ, lende niaa co ya o ba ni.

⁷Lɔ́ɔ́ lepum, mì soo a lɛŋnden, te kon te a masalen lepum o kɔɔ, mì yiyan le sungɔɔ, le puusiaa a le tɛɛmbuuo.

⁸Kɛ te lɛŋnde ya dimi len sɔɛi ndɔɛi len le mal pɛ dɛnɛ vɔɔn vem ya len kɔngɔlanndo-o, i mal sɔɛi yáà kɔngɔlan le len tosallo-e.

⁹Lɔ́ɔ́ lepum, mì soo a lɛŋnden te kon te, a masalen lepum o kɔɔ, mì dimi le len mingio tangullo a le len mingio tɔlɔɔ.

¹⁰Kɛ te lɛŋnde len le tosa pɛ dɛnɛ hɛnan ya loo, mì kanalan nden, kɛ mì le kɛɛ le ya nilan yaŋɔɔ, o kon i mangala yiyan yáà nɔ le len dɛnɛ kɛndɔɔ tosallo-o.

¹¹Nɔm Yeremi, soo niko o vannda Yuda a o Yerusalɛmnda lo, mà dimul nda aa: «Mɛlɛka dimi aa: ‹I cii kiolɔɔ, i co dɛnɛ palaa toosiaa le niaa, yiyannda vɔɔnndan pila la co ya o kɔl a niaa ni. Vana-vana mangala kela ndɔ vɔɔndo. Lende ni dɛ! Vana-vana yɛlɛma tiŋ kela ndɔɔ.›»

¹²Kɛ yiyannda ndala vɔɔnndan tuŋ nda co kɔɔli ni, a co vɛlɛ mulio aa: «Ken vil naa le, i naa n nɔ o kɔl-le naa n tosanin ni.»

¹³Lelan o Mɛlɛka dimi-o co hoo ni aa: «La ɲuuniaa lɛŋnde kɔɔli-kɔɔli. Kabi vana tui dɛnnda vaa nuaa le! Dɛnɛ Israɛl tosa-o, dɛnɛ lamàà kpeekpei o co ni.

¹⁴Vɛ̀ɛ̀ o co mɛmma n'kpungban te ma kumbu powta kpovala co yondoo nin o pembon coo Liban-ndan te? Vɛ̀ɛ̀ mɛmma ɲuluma toal o peela pɔmbɔlan-ndan ma nɔla pá velaa?

¹⁵Kɛ nduyɛ vanaa nia pɔɛɛnun ya, má muungu piɔmaa co n'hala le-a sálàlan solullo, má va faŋanndo o nɛi nda paandoo coo, le sɔɔndianndo nɛɛ nɛi co le-a.

¹⁶A cii lɛŋnde ndalen mingi bémbélan kposon, telen oo telen vannda fula pɛ lon, a kpinga. Vanaa hiawnannda tiiya pɛ lon, a dɔwnun kɔndɔfili, a hiŋ bollen.

¹⁷Yaamɔa va pɛ vanaa nia hinullo, i puusiaanin nda mɛɛ hoeyii fula a ba paalen le can-ndo-e i sɛŋi cundoo yɛ. O paale ndale dɛnɛ palaalen coo, i mululnin nda kɔɔ, yɔŋii ya mulul nda hɔlla.»

¹⁸O kon mí vannda pum a dimi aa: «La hun mì n yiinun Yeremi dúmbú! Kani vanaa-solia-lasálàá venin naa lepɛŋ le naa pɛɛkoo le, kaasoŋaa kɔlkalua venin naa lepɛŋ le naa silala kɛndɛlan yɔngoo le, vanaa-tɛɛngaa-diom Hala-a bɛɛ venin naa lepɛŋ le naa sɔɛi Hala-e tɛɛngullo le. N kɔnnun mì n kɔ hɛɛndun ndu sɔɔn coo. N yaŋnun nilan o sɔɔn o vanin dimio-on te!»

¹⁹Yaŋ ya nilan fɔ Mɛlɛka, mà tuei vanaa nɔ nɛyɔn nuu-a diom.

²⁰Vɛ̀ɛ̀ vana mingi dɛnɛ vɔɔndo le dɛnɛ kɛndɔɔ? Kani a co ya soondo tuwvo. Loonun maa i sim nɔm o hɔl, mí soaa le nda, haliko mi nɔm óò mal kɔngɔlan nɔm óò kɔngɔlan nda-o.

²¹Lelan tuisi poaa ndaa yima fofolan coo, mà cii nda pila o mɔɛi cɔwve bɛngu. Màá hɔ́aa ndaa laandua hiɔlun nda, mì piaandaa ndaa cuu vu! Màá nàà n'kɔnyaa cii piandaa ndaa, mì poaa ndaa piaandua cuu o cɔwvo!

²²Màá yeelan la va sɔɛi o la nda lo cɛilan nin, telen n solulnin nda vanaa del vannda coo, mà del nda coo-o! Kani a co bɛɛndianndo le ya biyɔɔ, a cii yaŋɔɔlen handɔɔ ya laci.

²³Nɔm Mɛlɛka, a pɔw ɲɛ-ɲɛ o tuula nda co le ya diyɔɔ lan nin te. Mal nda haki le dɛnɛ vɔɔn nda co tosaa-o le, faŋa hɔlla o hakila ndalan te. Màá a siɛɛlia mà deli nɔm o hɔl telen n co kɔl fula a nda-o!