Read Kissi Yeremi 20 Bible Online

Yeremi 20 - Kissi bible

Yeremi 20

¹Pasur vana-solia-lasálàá, po Immɛr-o va bolle kpalilla o Cɛi-Mɛlɛka-o nin ni. Ndóò tueyɔɔ Yeremi sɔɔn Mɛlɛka dimul ndu mun-ndon tɛɛnguuo,

²mó lɔaa Yeremi, vana-tɛɛngaa-diom Hala-o, mó dimi, má yii ndu o sungbulen o dio bɛndu Bɛnyamɛn va le luɛyɔɔ o Cɛi-Hala-o nin-ndo.

³Diimandɔɔ, mí Pasur timbi Yeremi o sungbulen. Mí Yeremi dimul ndu aa: «Mɛlɛka veelu lɛnin nɔm aa Pasur le, kɛ aa Magɔr-Misabib, kon co dimio ni aa: ‹Siòòŋii bɛnduei tiw ba-ba fee.›

⁴Kani o Mɛlɛka dimi-o co hoo ni aa: ‹I tosanin mì la ɲiiya niaa caaŋaa nɔmnda. A delnin o mɔɛi cɔvii yaamɔaa ndaa bɛngu nɔm o hɔl kpedekele-a mà vi. I malnin vannda Yuda kpow masaa Babilɔn o ba, mò kɔɛ a nda o lɛŋnde ndɔlen nin, te kon te mò diw nda a mɔɛi cɔwve.

⁵I tɛɛmbuunin bolofaa co Yerusalɛm-ndo kpow, ɲɛm nda sɔla o baala ndaa nin-ndon, ɲɛm ndan sɔvɛɔn kpow a bolofaa masaa Yuda kpede, mì yɔngu yaamɔaa ndaa ɲɛm mun kpow, mà cuungiaa mun, mà cua mun, mà kɔɛnnun a mun Babilɔn.

⁶Nduyɛ nɔm Pasur a vanaa co o nɔm ndo cɛinin-nda kpow, la kɔanin o biyɔɔ nin. A tiiya pɛ Babilɔn, lon n co lakɔ vu ni, mà kumbu nɔm lon, lende koni ya tosanin vɛlɛ a caaŋaa nɔmaa n va diom hala lacòòva kon dimullo-a ni.›»

⁷Mɛlɛka, a pala ya, mí cɛl le nɔm malnɔnndo o ba, má bii ya a paa-kala, má hiaw ya kpaayaa. Lɔ́ɔ́-lɔ́ɔ̀ vannda co ya mamɔɔ, nda kpow a co ya mamɔɔ.

⁸Kani lɔ́ɔ́-lɔ́ɔ̀ ya va pɛ sɔɛi, mɛɛ mì yonda aa: ‹Delɔɔ coo! Kɔlvesɛiyo!› A toɲa, vannda co mamɔɔ, mà va ya yeolan lepalaa-lepala le sɔɛi nɔmnde, nɔm Mɛlɛka-e pɛɛn.

⁹Te i dimi pɛ aa: ‹I pel-lɛnin ndu ladio le, i suu lɛnin o diola ndɔlan te›, ɲɔɔ lom ya o kɔllo nin maa leyin. Mì kindin le biuvɔnndo, kɛ i tiwba le.

¹⁰I co vannda taw tueyɔɔ tuula vɔɔnndan le ya. Nuaa nda co ya veeloo ni aa: ‹Siòònde tiw sɔ́›. A pum a co ya vɛlɛ diolan keo aa: «Cɔɔmuu ndu! N kɔ lɔlun ndu!» Vanaa va caaŋaa nia-a kpow a muungu ya mɛngɛlaa le tɛɛmbuu hali ɲɛ-pɔmbɔ cɔu. A co dimio aa: «Bɔɔle o co pɔɛɛnɔn a ndu pila, o kon mì n tiw ndu ba, mì n mingul ndu màá náà»!

¹¹Kɛ nɔm Mɛlɛka co ya ikɛi, a co cɔlɔbaa le ya a kpaayaa. Lelan vanaa co ya yɛlen tollo-a boŋnin, a nɔlanin tosaa mɛɛ nda yiyan a ya yɛ le. Siɛmbulan la biinin nda le bumba nda bumbanin ya-o. Siɛmbula lan la vanin nda lɔ́ɔ́-lɔ́ɔ̀, vana-vana pɔɛnunnin a lan o kɔɔ le.

¹²Nɔm Mɛlɛka-Nɔ-Kpaayaa-Kpow-vo, a sinà vana sandu a nɔm-ndo. A sinà yeemɛi nɛi a yiyannda naalan. Nɔm ya dimul le ya kandaa ni, i canin mɛɛ n solinin ya mɔnɛi yɛ.

¹³La soli condon le Mɛlɛka, la loo ndu balan, kani o soli vana dɛnɛ palaa yaamɔaa ndɔa o ba.

¹⁴Dangaa co le paale ya velun-nden. Màá duaa va le paale kala nuu velu ya len te!

¹⁵Dangaa co le vana kɔ pei fuɲa nuu ɲaaloo o kɔl, mó dimul ndu aa: «Hɔ́ɔ́ piaandoo vilun nɔm»-ndo!

¹⁶Màá vana kon siŋnun maa kobila Mɛlɛka tɛɛmbuu ɲíí bii ndu le lan! Màá o tuei caŋnda imɔnɔlan idiiyo, mò tuei yondala cɔwlan a paalen o pol!

¹⁷Te Hala ndóò dii ya pɛ kala nuu o dembe, mí dembe kala nuu ndóò siŋnɔn sɛiyo le ya. I va lo ndu o dembe le lɔ́ɔ́-lɔ́ɔ̀.

¹⁸Le yɛɛ ya fula yɛ kala nuu o dembe, le sangaa a mɔnɛi cɔu nuaa, a le ceen nuu hivio o siɛmbulan ndan nin?