Read Kissi Yeremi 22 Bible Online

Yeremi 22 - Kissi bible

Yeremi 22

¹Diom Mɛlɛka dimul Yeremi-o co hoo ni aa: «Kɔ o cɛi lemasaa Yuda nin, mà kɔ dimi sɔɔn mun ndon.

²Má dimi aa: ‹Nɔm masaa Yuda co icali o kpɛŋɛ lemasa David-o coo-o yaŋnun sɔɛi Mɛlɛka-e, i co vɛlɛ le simlacia nɔmnda a le vannda kpow, a kɛ́-kɛ̀ kei o diolan ndan le luɛyɔɔ o cɛi lemasaa ho nin.

³Diom Mɛlɛka dimi-o co hoo ni aa: La tosa dɛnɛ sandaa mì la kela o toɲaa coo. La baŋa vana nda co saangiaa-o vana co ndu saangiaa-o o ba. La pala miallo le, la pala vííyo a vanalanɔ pɔnɔ ndɔ vi-o le, la del nda coo mì la tosal nda lakafa le. La pɛngi vanaa tɛɛmbuu isɔɔ le-a diwvo o fondaa ho.

⁴Te la bii pɛ sɔɔn mun, mɛɛ masaa vanin icali lɔ́ɔ́-lɔ́ɔ̀ o kpɛŋɛ lemasa David-o coo, a vanin keiyo o diola cɛi lemasalan ndan a simlacia ndaa a vannda kpow latulu le luɛyɔɔ a le fulaa o ɲɛla ɲaanannda soa nan-ndan coo a o soa coo.

⁵Kɛ te la yeŋnun sɔɛi ya dimul niaa hee-e le, i mɛnan o diola nilan, sɔɛi fula ya Mɛlɛka o sondo-e co hee ni, cɛi lemasaa ho siŋnunnin bémbélan.›»

⁶Diom Mɛlɛka dimi a cɛi lemasaa Yuda-o co hoo ni aa: ‹A naŋ bɛɛ ya o hɔl maa bundɛlan Kalaad, te kon te maa tul pembon Liban, kɛ i co nɔm mingi lɛŋnde veselɛilen, kobi vannda piow-vo.

⁷I co vanaa tɛɛmbua nɔ ɲɛm tɛɛmbuan o ba-a dimul, mà hun koombiaa sungbuma nɔmma yɔmii sɛɛdran, mà mal man o yin.

⁸Vanaa-mangalaa-isɔaa bɔɔ-bɔɔ a keinin kobio ho ikɛi, mà ɲuunian nda pila tɛɛn aa: ‹Le kɔlɔ yɛɛ kpeekpei Mɛlɛka tosa yɛ dɛnɛ vaa nuaa a kobi bɛndoo ho?›

⁹O kon má mulul nda aa: ‹Le baŋɔɔ vanaa va lenin-nda a baŋ vulan halaa celennda o labɛngunin, má sooluu nda, má tɛɛmbuu kpema va nda tɛɛn nda Mɛlɛka Hala ndaa-o ni.›»

¹⁰Niaa vannda Yuda, la caŋ vana vi-o le, masaa Yosia pɛɛn, mɔnɛi bii niaa le ndu le. Kɛ la caŋ taw le vana co kɔnndan-ndo, masaa Salum pɛɛn! Kani o muungu lɛnin te, o ci lɛnin lɛŋnde ndɔle o velun nin-nden te.

¹¹Diom Mɛlɛka dimi a Salum, masa ndóò muungu o kpɛŋɛ lemasa Yosia fuɲa ndɔ-o coo Yuda, mó kɔannun-ndo co hoo ni aa: «O muungu lɛnin nanu le.

¹²O sɔlanin piɔ́mndo o lɛŋnde nda kɔɛ a ndu o biyɔɔ nin-nden nin, o ci lɛnin lɛŋnden nden te.»

¹³Dɛnɛ palaa co le vana tangul cɛi ndɔ lemasaa a kafalan, mó tengulun cɛila coocoolan o sandii lepɛŋnde nin, mó tundu caanda baalaa o fondo fúúo coo, o yɔngu nda sala ndaa loo!

¹⁴O co dimio aa: ‹I co cɛi bɛndoo baŋɔɔ, mì cɛila leninndan la va fɛkɛi.› A bii pɛ, a soli diola pɔmbɔlan, a kɛɛmiaa cii ndɔɛi a yɔmii sɛɛdre, a yin ndi yinɔɔ siaŋaa.

¹⁵Vɛ̀ɛ̀ a yeema ma cɔm maa masaa n co ni, mà tosa baalaa a yɔm sɛɛdreo haliko ma va teengen? Fuɲa va dioo a kolɔɔ maa caanda. Kɛ o va dɛnɛ sandaa a sakpoyɛi tosaa, ɛɛ nduyɛ, ɲɛ-ɲɛ va kɔlan o kɛndɛ ndu o ba.

¹⁶O va sɔɛi le vanaa bala fondoa a le vanaa ikɔɔa, mí ɲɛ-ɲɛ va kɔlan o kɛndɛ. Vana kela pɛ lende, mɛɛ ndu cɔm maa o sina ya. Sɔɛi fula ya Mɛlɛka o sondo-e co ken ni.

¹⁷Kɛ nɔm yɛ, tɔnɔ nɔmndo daama n nɔ hɔlten coo ni. A co vanaa tɛɛmbuu isɔɔ le-a diwvo, mà va delɔɔcoo a kafalan tosaa.»

¹⁸Sɔɛi Mɛlɛka dimi a Yehoyakim po Yosia va masaa Yuda-o o kɔɔ-e co hee ni aa: «Lɔ́ɔ́ o vunin-ndo, vana ceŋnin caŋ biisi le. Vana diminin aa: ‹Taanin puapilɛ nuu te kon te, taanin yeman-ndo› le. Vana ceŋnin ndu coo aa: ‹Taanin vana ni bɛndoo te kon te, taanin masa nuu› le.

¹⁹A kumbunin ndu maa sofɛlɛ. A nannin kɔɔle ndɔlen mà kɔ viow len o kobio kɔɔli polon.»

²⁰Nɔm Yerusalɛm, hel o pembon Liban bollen mà yonda. Tosa mì vannda tuei nɔm diom o buubuuon Basan coo. Lo o pembon Abarim coo mà yonda, kani vanaa ndáà yeema nɔm-nda kpede a cuu pesipesi.

²¹Telen n ve a buulan kɛ́-kɛ̀ loo, mí soaa o nɔm ndo, kɛ má mulul-la aa o co kpeku nɔm te. Lende n co tosaa kabi o cuaambɔyɛi nɔmnde nin ni, a yeŋ ya lani le few.

²²Hoeiye co simlacia nɔmnda kpede kɔndɔɔ. A kɔanin a sámáá nɔmnda o biyɔɔ nin, siɛmbulan la biinin nɔm mà kiolu vai le dɛnnda vɔɔnnda n tosa lan.

²³A connun icali yili o ba nɔmndo coo Liban, má tangul vɛɛnnde nɔmnden o yɔmii sɛɛdrei tullo. Kɛ a ŋɔnganin telen ɲɛ nɛyaa voolunin nɔm-ndo, telen n vanin sangaa maa vanalanɔ co violɔɔ-o.»

²⁴Ya Mɛlɛka i co yoomu! Sɔɛi fula ya o sondo-e co hee ni aa: «Hali Konia po Yokim masaa Yuda-o ndóò va bɛɛ kelɛi sui lemasɛi vana vownun o ba kɛndɔɔ-e, i va ndi solin o isu.

²⁵I mal nɔm yaamɔaa nɔmnda o ba, vanaa n nɔ siòòŋii ndɛi-ya, Nebukanɛsar masaa Babilɔn a vanaa ndɔa cɔwva pɛɛn.

²⁶I toawnin nɔm niaa kala nɔm, o lɛŋnde niaa vilun nin te len nin. Lon niaa vunin ni.

²⁷La yeemanin taw-taw le muungoo, kɛ la tiwnin ba le.»

²⁸Vannda co dimio aa: «Mò va maa kpɛɛnɛi piɔlɛyii vana soli lɛ kpeku lei a ɲɛ nɛŋi lɛ mako loo Konia co ni? Le yɛɛ nɛ nda tow yɛ ndu a cuavaa ndɔa o lɛŋnde nda sina le len nin?»

²⁹Lɛŋnde nilen, niaa vanaa co o lɛŋnde nilen nin-nda, la tuei-yɔ ɲɛ Mɛlɛka dimi-o.

³⁰O Mɛlɛka dimi-o co hoo ni aa: «La sɛva po kon maa o nɔ hɔ́ɔ́ le, vana sangan fúú o ceen ndɔɔ nin-ndo. Vana pilɛ bɛɛ fulanin o yungu ndɔɔ nin, mò koma cal o kpɛŋɛ lemasa David-o nin te, o kɛ́-kɛ̀ tosanin masalen o tàndá Yuda-o coo le.»