Read Kissi Yeremi 25 Bible Online

Yeremi 25 - Kissi bible

Yeremi 25

¹Vɔsi hiɔɔlundɔ Yehoyakim po Yosia-o va masalen tosaa Yuda-o yɔŋnun vɔsi tase Nebukanɛsar kandu masalen tosaa-o ni. Mí Mɛlɛka soaa o Yeremi lo a vannda Yuda kpede o kɔɔ.

²Mí Yeremi dimul vannda Yuda a haa Yerusalɛm kpow sɔɛi ken aa:

³«Kabi o vɔsi tɔ́ a o yàándɔɔ o masale Yosia po Amon masaa Yuda len háá hau, vɔsilan bidiin a layàá co kon ni, i co niaa sɔɛi Mɛlɛka dimul-la-e tɛɛngullo, i co sondo mei le, kɛ la co tueyɔɔ le.

⁴Mɛlɛka pɛngi a niaa vanaa ndɔa baalaa, vanaa-tɛɛngaa-diom Hala-a vimndo le, kɛ la cɛl le nilan yaŋɔɔ mì la tuei le.

⁵Mó dimul niaa aa: «Vana-vana o niaa tɛɛn mal kela ndɔ vɔɔndo, dɛnɛ vɔɔn o co tosaa-o! O kon la tiwnin ba mi la cal o lɛŋnde ya ke kabi sindɛ fuɲaa niaa mamaa a niaa pila len nin.

⁶Te la yiinun a halaa celen-nda mì la baŋ vulan nda o labɛngunin le nda sooloo le. Te la selnun piɔmnda mì la baŋ vulan nda o labɛngunin le nda sooloo le, i fulanin kɔl a niaa le, i tosalnin niaa dɛnɛ vɔɔn kɛ́-kɛ̀ le.

⁷Kɛ la yeŋ ya lani le, Mɛlɛka dimi lende ni. Mí la tíŋ ya a sɔngɔɔ kangalan le tùú niaa sɛl piɔmnda le dɛnɛ niaa palaa-o.»

⁸Lelan o Mɛlɛka-Nɔ-Kpaayaa-Kpow-vo dimi-o co hoo ni aa: «Le mɛɛ niaa tui ya diom te yɛ,

⁹i co tosa mì vanaa co ba luaŋ-ndo-a kpede a mɔɔsian, mì veelu Nebukanɛsar vana ni baala, o co masaa Babilɔn-ndo. Mì cuu nda, mà hinul lɛŋnden nden a vanaa co lenin-nda, mà hinul vanaa-mangalaa-isɔaa balu vɛlɛ nda-a kpede. I diwnin niaa, niaa ndaa latulu, mì mingi lɛŋnden nden bémbélan le fɛɛn a fɛɛn. Vannda kpinganin nden mà hɔŋ hùíyé a mɔnɛi. Ya Mɛlɛka dimi lende ni.

¹⁰I co vɔkɔ-vɔkɔ lakafo niaa, yoondiaala kɔlkɛndɛla niaalan a condun felengia co nɔlan kilaa sɛnɛi-ya cii, mì ɲumi diom lasunndo o cieon nin a ɲɛ-tengaa fitinaa.

¹¹Lɛŋnden nden kpede le siŋnunnin bémbélan, mì vanaa-mangalaa-isɔɔa ha kpede luɛi masaa Babilɔn o ba bɛngu le vɔsilan belaŋɔmmɛw.

¹²Telen vɔsila belaŋɔmmɛwla lan la cuunin-ndo, i mululunnin masaa Babilɔn a vanaa ndɔa le dɛnnda ndala vɔɔnndan, Mɛlɛka dimi lende ni, i co mɔnɛ soli a lɛŋnde ndalen, mì vannda piow len le lɔ́ɔ́-lɔ́ɔ̀.

¹³I cuunin dɛnnda palaala ya dimi lan kpow o lɛŋnde len coo, la co lasɛvaalan o sɛbɔɔ ho nin-ndan, la Yeremi vana-tɛɛngaa-diom Hala-o dimi le vanaa-mangalaa-isɔɔa kpede lan pɛɛn.

¹⁴Mì Babilɔnnda bɛɛ luɛi o ba masaa kpaayaa bɛngu a o ba vanaa-mangalaa-isɔɔa kpaayaa bɛngu. Mì sala nda mɛɛ dɛnnda ndalan la yɔŋnun yɛ, mɛɛ dɛnnda nda tosa a bala ndalan-ndan la co yɛ.»

¹⁵Kani muaa Mɛlɛka soo o ya lo ni, Hala Israɛlla pɛɛn aa: «Bii taala kólaa co ya hoo o ba o piaa cá a mɔima kɔltuwma nian-ndo, mà koesi vanaa-mangalaa-isɔɔa ya viamnin nɔm o nda lo-a kpow man.

¹⁶A kolnin man mì hɔlla hiŋ nda, mì bollen le hiŋnun nda tuma nda vanin vanvílɛ́iya cɔu a cɔw ya tuisinin nda tɛɛn-ndo-o.»

¹⁷Mí bii taala kólaa kon Mɛlɛka o ba, mí koesi vanaa-mangalaa-isɔɔa Mɛlɛka vem ya kan o nda lo-a kpede.

¹⁸Mí kandu a Yerusalɛm a á kobila va o tàndá Yuda-o nin-ndan, masaa ndaa a simlacia ndaa, le lan mingio bémbélan. Mí vannda va kpingaa a mɔnɛi biyɔɔ, o kon má ca dɛnɛ kon, má va mɛnaa a ndi o kɔɔ mɛɛ o co hau tosanndo yɛ.

¹⁹O kon kɔɔli, vanaa-mangalaa-isɔɔa tɔ̀a: Faraɔnnɔɔ, o co masaa Esipte-o, simlacia ndɔa, vanaa ndɔa baalaa a vanaa co o lɛŋnde ndɔlen nin-nda kpow,

²⁰kɔ bii niko a vanaa yɛ́-yɛ́a co o lɛŋnde Esipte len nin-nda, masaa co o lɛŋnde Ut len nin-nda, masaa Filistia co Askelɔn, Kaasa, Ekrɔn a Asdɔd-a,

²¹Edɔmnda, Moabua a Amɔnnda,

²²masaa kɛ́-kɛ̀ co Tir, Sidɔn, a masaa co o mɛmma ihɛllan leeloo-a.

²³Vanaa co Dedan-nda, haa Tema, haa Bus, a vanaa-vanaa sendin kangbalan,

²⁴masaa Arabii a vanaa súúla yɛ́-yɛ́a co o lɛŋnde veselɛilen nin-nda,

²⁵masaa kɛ́-kɛ̀ co Simri, Elam a Mɛdea,

²⁶masaa kɛ́-kɛ̀ co a ba luaŋ-ndo, a va macɛlu-a a masaa co lándan-nda. Masɛi kɛ́-kɛ̀ co o ceendo coo vellaa-velle, i co o lɛŋnden coo-e kpow pɛɛn. O mɛɛlulan, mí masaa Sesak kol niko.

²⁷Mí Mɛlɛka dimul-la le nda dimullo aa: «Mɛlɛka-Nɔ-Kpaayaa-Kpow-vo, Hala Israɛl-lo dimi aa: «La kol mì ma bii niaa, mì la kuisi man. La deli lɛŋ a man mì la bumba le cɔnɔnndo telen niaa canin vanvílɛ́iya cɛɛlɔnndo o mɔɛi cɔwve bɛngu-o.»

²⁸Mó dimi vɛlɛ aa: «Te vannda pum kɛɛ pɛ le nɔm taala kon biyɔɔ o ba le kolɔɔ, a dimul nda aa: ‹Mɛlɛka-Nɔ-Kpaayaa-Kpow-vo dimi maa la kɛɛ, la cɛl, kolɔɔ niaa co lenin ni.›

²⁹Kani o kobi co le ya-o coo ya co kandɔɔ dɛnɛ palaa tuisio ni. Vɛ̀ɛ̀ niaa niaa looku yɛnin hiɔlɔn? I biinin niaa maa vanaa tɛɛmbuu isɔɔ le-a le. Kɛ i veelunin mɔɛi cɔwve, mì i hinul vanndacieea o ceendo coo kpede.» Sɔɛi fula Mɛlɛka-Nɔ-Kpaayaa-Kpow-vo o sondo-e co ken ni.

³⁰Mí Mɛlɛka dimul-la vɛlɛ aa: «Nɔm Yeremi yɛ, tɛɛngul nda sɔɔn mun kpow, mà dimul nda aa: ‹Mɛlɛka co a hiilɛi coocoo, o co diomndo solio o calta ndɔla diandaalan nin, o co a hiilɛi a vanaa ndɔa. O co deŋio maa vanaa pesi rɛsɛnndon le mɔiyan solio-a. O co piasiaa a vanaa co o lɛŋnden coo-a.

³¹Vana lo lɛŋnde mɛɛlu mà tuei ndu diom. Mɛlɛka co kɔɔsɔɔ nda vanaa-mangalaa-isɔɔa. O veelu vanndacieea kpow o cɛi ndɔ kɔɔsɔɔ nin, o tosanin mì vanaa vɔɔnda kpede a vi o mɔɛi cɔwve bɛngu.› Sɔɛi fula Mɛlɛka o sondo-e co ken ni.»

³²Mɛlɛka-Nɔ-Kpaayaa-Kpow-vo dimi aa: «Dɛnɛ palaa cannin o lɛŋnden nden mò taŋ o lɛŋnden lepilɛlen, mò tala-tala, hoeyii piɔɔ bɛnduei cannin o lɛŋnden mɛɛlulan.»

³³Paale len, cɔn o lɛŋnden kpengei kɔ bii o lɛŋnden mɛɛlulan, vanaa vunin-nda sɔlanin caŋ te, a sɔlanin cɔwviaa le, a sɔlanin kumbɔɔ le, lende nda lonin a malaa ni, mà sɛ o lɛŋnden coo.

³⁴La koŋul, niaa simlacia, la mɛli yeelan! La pimbul lɛŋ, niaa vanaa mandaa n'cɔlua. Kani telen nda co niaa bololan kili, mì la saŋnun-ndo tiiya hoo ni. La delnin mì la cuinun maa hɛngɛi báà kala.

³⁵Nɛɛ viannaŋaa co lɛ le vanaa mandaa n'cɔlua le! Nɛɛ hialaŋaa co lɛ le simlacia cɔlua le!

³⁶I co nda tueyɔɔ koŋullo, cɛɛŋɔn simlacia n'cɔlua del-la o lani, kani Mɛlɛka cii diola cɔlua laasiaa.

³⁷Vɔlɛla sɔkɔ-sɔkɔlan la mei kpili a kɔltuw bɛndu Mɛlɛka-o.

³⁸Lɛŋnde ndalen le piow calta ndɔlan mɛɛ yàlàá piaw bɔɔ ndɔɔ nuaa yɛ, kani le siŋnun lɛŋnde dɛnɛ palaalen a mɔnɛ cɔwvo soli a len-ndo a á kɔltuw bɛndu Mɛlɛka-o.