Read Kissi Yeremi 26 Bible Online

Yeremi 26 - Kissi bible

Yeremi 26

¹O masale Yehoyakim po Yosia masaa Yuda-o len kandɔnndo, mí sɔɛi Mɛlɛka-e he dimulun Yeremi aa:

²«Sɔɛi ya Mɛlɛka dimi-e co hee ni aa: kɔ sim o bɛ́ɛ̀ Cɛi-Hala-o nin, mà dimul vanaa-vanaa fula o kobila Yuda lan nin, mà hin le kaannden. Kɔ miinguu sɔɔn ya co nɔm dimul le nda tɛɛngullo-on, diomndo pilɛ bɛɛ faŋa lecoo le.

³Bɔɔle mà tuei nɔm diom, mì vana-vana mal kela ndɔ vɔɔndo. O kon, ya bɛɛ i malnin dɛnnda palaala yáà tuu le nda tuisio coo le kela nda vɔɔndo lan.

⁴Má dimul nda aa: Nuaa Mɛlɛka dimi ni aa: ‹La tuei ya diom, la kela o sɔɔn ya pɛɛku niaa-on coo,

⁵mì la cua sɔɔn vanaa nia baalaa balan tan tiɔn, vanaa-tɛɛngaa-diom Hala-a pɛɛn. O co lɛhau le ya co niaa nda vimndo le, kɛ la yeŋ nda lani le.

⁶Te la tui le, i tɛɛmbuunin Cɛi-Hala-o ho mɛɛ ya tɛɛmbuu hoo Silo yɛ. Mì siinguu Yerusalɛm tɔɔmasele mɛnaa vanaa-mangalaa-isɔɔa kpow tɛɛn.›»

⁷Mí vanaa-solia-lasálàá, vanaa-tɛɛngaa-diom Hala-a a vanaa-vanaa va lon a tuɛi Yeremi sɔɔn mun dimio o bɛ́ɛ̀ Cɛi-Hala-o nin.

⁸Telen Yeremi va vanaa kan sɔɔn Mɛlɛka dimul ndu le nda tɛɛngullo-on siowvo dimullo-o, má bii ndu a dimio aa: «A bɛnda ma sɔla piɔ́mndo.

⁹Le yɛɛ n tɔɔndan yɛ dimio aa Mɛlɛka dimul nɔm aa: Cɛi-Hala-o ho co hunɔɔ itambu maa hoo Silo, mì kobio ho hun tambu, mì vannda piow ndu?» O kon mí vanaa va o Cɛi-Hala-o nin-nda sɔɔnguu, má tiila Yeremi.

¹⁰Simlacia tueyɔɔ sɔɛi ken, má mal o cɛi lemasaa, má hel o Cɛi-Hala-o, má kɔ cal o dio sɛnɛi Cɛi-Hala-o.

¹¹Mí vanaa-solia-lasálàá a vanaa-tɛɛngaa-diom Hala-a dimul simlacia a vanaa va lon-nda kpede aa: «Langbanɔɔ ho bɛnda mò sɔla piɔ́mndo le sááléla o dimi a Yerusalɛm-ndan. Niaa pila tuei ndu diom kpedekele.»

¹²Kɛ mí Yeremi dimul simlacia a sɛ́lɔ́ɔ́ kpow aa: «Mɛlɛka vem ya sɔɔn niaa tuei ya dimio a Cɛiyo ho o kɔɔ a á kobio ho o kɔɔ-on ni.

¹³La bɛɛndiaa niko kela niaa a dɛnnda niaalan, mì la yaŋ Mɛlɛka Hala niaa nilan. O kon o tuisi lɛnin dɛnɛ palaa o tuu le niaa tuisio coo-o le.

¹⁴Ya yɛ, i co niaa o ba, la tosa a ya mɛɛ o hɛnan niaa yɛ.

¹⁵Kɛ nduyɛ, te la dii ya pɛ vana tɛɛmbuu isɔɔ loo, niaa, kobio ho a vanaa co lenin-nda kpow sɔɛi ken co va o lebol ni. Kani lekɛ́ndɛi, Mɛlɛka vem ya o niaa lo ni, le niaa sɔɔn mun dimullo mì la tuei mun.»

¹⁶O kon mí simlacia a sɛ́lɔ́ɔ́ kpow a dimul vanaa-solia-lasálàá a vanaa-tɛɛngaa-diom Hala-a aa: «Langbanɔɔ ho bɛnda mò sɔla piɔ́m te, kani Mɛlɛka Hala naa lekɛ́ndɛi vem ndu le naa sɔɔn mun dimullo ni.»

¹⁷Mí kaasonda pum a can, má dimul vannda kpow aa:

¹⁸«O telen Esekia va masalen tosaa Yuda-o, vana-tɛɛngaa-diom Hala-o pum va, diolan Misee, fulaa Moresɛt. Mí ndóò dimul vannda Yuda kpow aa: O Mɛlɛka-Nɔ-Kpaayaa-Kpow-vo dimi-o co hoo ni aa: ‹Siɔn vaanunnin maa iciɛɛ, Yerusalɛm siŋnunnin bémbélan kposon, mì bɔɔla n'yɔɔlan la vil o pembii Cɛi-Hala-o co coo-e coo.›

¹⁹Vɛ̀ɛ̀ diyɔɔ masaa Esekia a vannda Yuda a dii Misee le sɔɛi ken ni? A dii ndu le, kɛ má ke Mɛlɛka bɛɛlen taw, má kindin le ndu hɛnanndo. O kon mí Mɛlɛka mangala yiyan va ndu-o, o tuisi lɛ nda dɛnɛ palaa ndóò kɔngɔlan le nda tuisio coo-o coo le. Kɛ te naa naa n dii pɛ langbanɔɔ ho, mɛɛ n co dɛnɛ palaa bɛndoo tuisin coo.»

²⁰O telen kon, langbanɔ celen va vali tɛɛngaa-diom Hala-o tosaa o diola Mɛlɛka lan, diola ndɔlan Uria, po Semaya fula Kiriat-Yearim ndo. Mó soaa sáálélan a kobio ho a á lɛŋnden nden mɛ̀ɛ́-mɛ̀ɛ́ Yeremi soo nuaa yɛ.

²¹Mí masaa Yehoyakim, vanaa ndɔa cumulaa a simlacua ndɔa kpow a tuɛi sɔɔn mun, mí masaa va nɛilan nuwviaa le ndu diyɔɔ. Uria tueyɔɔ sɔɛi ken, mí siòònde bii ndu, mó ɲaanun, mó kɔannun Esipte.

²²Mí masaa Yohoyakim viam vannda Esipte, Ɛlnatan po Akbɔr-o a vanaa celen.

²³Má kɔ bii ndu Esipte lon, má kɔa a ndu o masaa lo. Mí Yehoyakim dii ndu, mó viaw dialun ndɔn o soon nda kumbu nin vanaa celen nin-ndo nin.

²⁴Kɛ mí Ahikam po Safan-ndo soaa le Yeremi, o cɛl mò del vannda o ba mà dii ndu le.