Read Kissi Yeremi 29 Bible Online

Yeremi 29 - Kissi bible

Yeremi 29

¹Yeremi lo Yerusalɛm, mó sɛval van bɛndua lo o vanaa ndáà kɔɛ o biyɔɔ nin-nda tɛɛn-nda sɛbɔɔ: vanaa-solia-lasálàá, vanaa-tɛɛngaa-diom Hala-a a vanaa tɔ̀a Nebukanɛsar ndóò bii Yerusalɛm, mó kɔa a nda o biyɔɔ nin Babilɔn-nda.

²Telen o sɛva sɛbɛ kon-ndo komal nin masaa Yekonia, kalaa masaa, simlacia, van bɛndua Yuda a haa Yerusalɛm, vanaa caa valta labalan-nda a sumnda kpow ndáà faŋan nin Yerusalɛm.

³Mó yɔngu Eleasa po Safan-ndo nda Kemaria po Hilkiya-o sɛbɛ kalaa. Kani Sedekia masaa Yuda ndóò vem nda Babilɔn o masaa Nebukanɛsar lo ni, o va o sɛvaa o sɛbɛ kalaa nin aa:

⁴«O Mɛlɛka-Nɔ-Kpaayaa-Kpow-vo, Hala Israɛl-lo dimul vanaa-vanaa nda cɛn Yerusalɛm, má kɔa a nda o biyɔɔ nin Babilɔn-ndo co hoo ni aa:

⁵‹La tangul cɛilan mì la luɛi lenin, la soli nakɔlan mì la de kɔmnde ndalen.

⁶La yil laandua mì la velu cuavaa laandua a à piaandua. La cuel poaa niaa laandua mì la kɛsi cuavaa niaa laandua o nɔlan, haliko ma velu cuawva: a piaandua a à laandua. La kui lon taw-taw, la dɔɔnan te.

⁷La kindin mì kobi niaa co nin o biyɔɔ nin-ndo sɔla dɛnɛ kɛndɔɔ. La piɛi Mɛlɛka le ndu, kani o sɔla pɛ dɛnɛ kɛndɔɔ, niaa bɛɛ la sɔla ndu.›»

⁸O Mɛlɛka-Nɔ-Kpaayaa-Kpow-vo, Hala Israɛl-lo dimi-o co hoo ni aa: «La cɛl mì vanaa-tɛɛngaa-diom Hala-a co niaa tɛɛn-nda, vanaa dimi siɔdii lacio-a hiŋ niaa hɔlla le. La lúɛì lɔma niaa co sɔllo-an yii le.

⁹Kani còòlan fúú nda co niaa dimullo ni aa ya vem nda ni. I vim nda le.» Sɔɛi fula Mɛlɛka o sondo-e co ken ni.

¹⁰O Mɛlɛka dimi-o co hoo ni aa: «La cii dɔ́ɔ́ pɛ vɔsila belaŋɔmmɛwlan Babilɔn o ba bɛngu, i cannin mì soo le niaa, o kon mì peelu kpema yáà yiilu niaa le niaa mingio Yerusalɛm-ndo.»

¹¹Sɔɛi fula Mɛlɛka o sondo-e co hee ni aa: «Ya i sina tuula ya nɔ le niaa lan, tuula dɛnɛ kɛndɛ lan, o co tuula dɛnɛ vɔɔn te. Kani i yeema siɔdii niaa kɛndɔɔ, mì la nɔ kɔlkɛsiaa.

¹²La veelunin ya mì la piɛi ya, mì tuei niaa diom.

¹³La nuwvianin ya mì la saalun ya, te la nuwviaa ya pɛ a kɔlta niaalan kpede.»

¹⁴O Mɛlɛka-Nɔ-Kpaayaa-Kpow-vo dimi-o co hoo ni aa: «I tosanin mì la saalun ya, mì mingi niaa o niaa lo. I co niaa nuwviaa o lɛŋii kɛ́-kɛ̀ a o fondala kɛ́-kɛ̀ yaa tow niaa, mì mingi niaa o niaa lo nanu, nɛɛ niaa va paandu mí yaa niaa o biyɔɔ nin-nda.» Sɔɛi fula Mɛlɛka o sondo-e co ken ni.

¹⁵Hee kpow niaa cɔmndo kani la co yiyanndo maa Babilɔn Mɛlɛka soli vanaa-tɛɛngaa-diom Hala-a le niaa ni.

¹⁶O Mɛlɛka dimi le masa co icali o kpɛŋɛ-lamasa David-o coo, a le vanaa co icali o kobio ho nin-nda, puapilɛa niaa kue latulu a niaa o biyɔɔ nin te-a o.

¹⁷O Mɛlɛka-Nɔ-Kpaayaa-Kpow-vo dimi-o co hoo ni aa: ‹I co nda kuel a cɔwvo a á yima fofolan, mì kuel nda vɛlɛ a nàà n'kɔnyaa. Mì mingi nda maa voosun siovɛi, n vana nɔla dioo loon, le tambii bɛndui n tambu-e.

¹⁸I toalnin nda kɔɔli a cɔwvo, yima fofolan, mì tol nda vɛlɛ kɔɔli a nàà n'kɔnyaa. I co mɔnɛ soli a nda, mì siòòŋii bɛnduei bii masɛi co o ceendo coo-e kpow. O lɛŋii kɛ́-kɛ̀ ya toawnin nda nin, nda vanin tɔɔmasele vannda vanin cuaa le mɛnaa a le sɔɛi vɔɔn-vɔɔnde, te kon te sɔɛi lasiɛmbuei pum tuuvo ni.

¹⁹Kani a yeŋnun sɔɔn nun te. Nduyɛ, o co lɛhau le ya co nda vanaa nia baalaa, vanaa-tɛɛngaa-diom Hala-a vimndo le, kɛ a yeŋnun te.» Sɔɛi fula Mɛlɛka o sondo-e co ken ni.

²⁰Kɛ niaa niaa, la tuei sɔɛi Mɛlɛka-e, niaa kɛ́-kɛ̀ ya fula Yerusalɛm mì la va Babilɔn nanu o biyɔɔ nin.

²¹O Mɛlɛka-Nɔ-Kpaayaa-Kpow-vo, Hala Israɛl-lo dimi a Akab po Kolaya-o, a Sedekia po Maaseya-o, a co kan niaa còòlan tɛɛngullo o diola nilan-nda-o co hoo ni: «I mal nda Nebukanɛsar masaa Babilɔn o ba, o lɔanin nda mà vi niaa o hɔl.»

²²Vanaa kɛ́-kɛ̀ nda bii Yuda, má kɔa a nda o biyɔɔ nin Babilɔn, a vanin diola vanaa ŋiɔŋaa kan piɔlɔɔ le mɛnanndo aa: «Màá Mɛlɛka tosal nɔm mɛɛ o tosa a Sedekia a á Akab yɛ, vanaa masaa Babilɔn tuɛi o yin-nda pɛɛn!»

²³Mààla nda co tosaa o lɛŋnde Israɛl-ten nin-ndan la co lan ni: a co suundaa a laandaa caanda, mà va còòlan dimio a ya o sondo. Nduyɛ, i vim nda le. I sina ken kpow, i co lesei.» Sɔɛi fula Mɛlɛka o sondo-e co ken ni.

²⁴Mí Mɛlɛka dimul Yeremi le Semaya fula Nehelam-ndo dimullo aa:

²⁵«O Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹A yɔŋ vanaa co Yerusalɛm-nda kpow sɛbɛlan o diola nilan: Sofoni vana-solia-lasálàá po Maaseya-o a vanaa-solia-lasálàá, o co o sɛvaa o sɛbɛla lan nin aa:

²⁶Mɛlɛka siinguu nɔm vana-solia-lasálàá o fonda Yehoyada vana-solia-lasálàá-o ni, haliko ma nɔ hɔlten o Cɛi-Hala-o coo le vanaa siingun nda pila vanaa-tɛɛngaa-diom Hala-a. A saalun nda pɛ, a baa nda yɔlɔn, a vow nda cilinndon o labolo.›

²⁷Le yɛɛ nɛ niko a dimi ɲɛ-ɲɛ a Yeremi fula Anatɔt-o le? Kani o co dimio aa vana-tɛɛngaa-diom Hala-o o co ni.

²⁸Ɲɔɔ viw vɔ bɛɛ le, mó sɛval naa n co Babilɔn nanu-a sɛbɔɔ, mó dimi lenin aa: «La tangul cɛilan mì la luɛi lenin. La soli nakɔlan mì la de kɔmnde ndalen.»

²⁹Mí Sofoni dimi sɛbɛ kon Yeremi vana-tɛɛngaa-diom Hala-o o hɔl.

³⁰O kon mí diom Mɛlɛka-o dimulun Yeremi aa:

³¹«Yɔŋ vanaa co o biyɔɔ nin-nda yoongoo aa o Mɛlɛka dimi a Semaya fula Nehelam-ndo co hoo ni: o co niaa siɔdii lacio dimullo, kɛ i vim ndu le, mò va niaa còòlan peiyo,

³²ɲɛ Mɛlɛka dimi-o co hoo ni aa: ‹I co Semaya fula Nehelam-ndo a cuavaa ndɔa imamaa kuel, vanndo pilɛ bɛɛ lonin icali o yungu ndɔɔ nin, mò ce dɛnɛ kɛndɛ ya tosalnin vanaa nia-o le›. Sɔɛi fula Mɛlɛka o sondo-e co ken ni. Kani ndu tosa ni mì vanaa niaa simul-la, Mɛlɛka dimi lende ni.›»