Read Kissi Yeremi 35 Bible Online

Yeremi 35 - Kissi bible

Yeremi 35

¹O telen Yehoyakim po Yosia masaa Yuda va masalen tosaa-o, mí Mɛlɛka soaa o Yeremi lo, mó dimul ndu aa:

²«Komal vanaa fula o polale Rekab len nin-nda, mà soo o nda lo haliko ma cɛl le hunɔɔ o cɛila pɔmbɔla co o Cɛi-Hala-o holnɔnndo lan o pilɛ nin. O kon a ke nda mɔiyan, a kol.

³Mí Yeremi kɔa Yasania po Irmeya-o, po imama Habasinia-o a puapilɛa Yasania-a kɔɔli. Nduyɛ polale Rekab len kpow le va lende ni.

⁴Mó kɔa a nda o Cɛi-Hala-o nin, má kɔ luɛi o cɛi kaandeŋaa Hanan-nda nin. Hanan kon yɛ, vana baala Hala-o o va ni, Yikdaliahou va fuɲa ndɔ ni. O cɛi simlacia ikɛi cɛi Hanan kon va ni, o cɛi Maaseya-o lecoo. Maaseya kon va po Salum va vana-solia-lasálà va hɔlten o dio luɛyaa Cɛi-Hala-o ni.

⁵Mí Yeremi solul nda ɲɛlan la piaa cá-cá a mɔiyan, mó kɛsul vanaa fula kan o polale Rekab len nin-nda káálalan. Mó dimul nda aa: «Má cè mɔiyan! La kol ɲɛ-pɔmbɔ.»

⁶Kɛ má muli aa: «Naa n kol mamɔi le, kani fuɲa naa mamaa Yonadab, po Rekab-o hendul naa tɔŋndo ni aa: ‹La kol mɔiyan lɔ́ɔ́-lɔ́ɔ̀ le, o va niaa pila, o va cuavaa niaa.

⁷O bɛnda vɛlɛ mì la tangul lacɛi le, la tosa vali yondo le, la soli nakɔ n'rɛsɛn te, nakɔ n'rɛsɛn kɛ́-kɛ̀ va le niaa le. Kɛ la calnin o cɛila-kolala-toandaalan bɛngu o palɛi niaa vanin yoomu-e nin kpow, le mɛɛ niaa viaw yoomu taw o lɛŋnde niaa co len mialla nin-nden yɛ.›

⁸Sɔɔn Yonadab fuɲa naa mamaa dimul naa mun-ndon, lecoo naa n co kelaa ni. Lelan n kol mamɔi lɔ́ɔ́-lɔ́ɔ̀ le: laandaa naa, cuavaa naa piaandua a à laandua, vana-vana kol te.

⁹N tengul vɛlɛ lacɛi le luɛyɔɔ lenin te, n nɔ nakɔla n'rɛsɛn te, n tosa vɛlɛ vali yondo le.

¹⁰O cɛila-kolala-toandaalan bɛngu naa n cal ni, mɛɛ nuaa naa n co kelaa o silala Yonadab fuɲa naa mamaa mel naa lan kpow coo ni.

¹¹Kɛ telen Nebukanɛsar masaa Babilɔn del lɛŋnden coo a cɔwvo-o, mí n ca maa o va fisa mí naa n kɔɛ Yeresalɛm, haliko mi n hɛlun vanaa cɔvaa Babilɔnnda a Aramiia. O telen kon mí n kɔ cal Yerusalɛm ciee.»

¹²O kon mí Mɛlɛka soaa o Yeremi lo, mó dimul ndu aa:

¹³«Soo niko o vannda Yuda a o haa Yerusalɛm-ndo, mà dimul nda aa: Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: Vɛ̀ɛ̀ la nɔla sila nuu cɛlɔɔ mì la bii sɔɛi nii le?» Sɔɛi fula Mɛlɛka o sondo-e co ken ni.

¹⁴Mí Yonadab po Rekab-o ndóò kuuna cuavaa ndɔa mɔiyan kolɔɔ. Má bii sɔɛi ken ɲɛkɛndɛi, háá hau a cɛl le mɔiyan kolɔɔ le, kani ndáà yeema le kelaa o diom fuɲa nda mamaa coo. Nduyɛ ya Mɛlɛka, o co lɛhau le ya co sɔɛi o niaa lo le, kɛ la yeŋnun te.

¹⁵O co lɛhau le ya co niaa vanaa nia baalaa, vanaa-tɛɛngaa-diom Hala-a vim-ndo, le niaa kɔlan dimullo aa: ‹Vana-vana mangala kela ndɔ vɔɔndo, mò tosa dɛnɛ kɛndɔɔ. La del halaa celennda kɔɔli le nda sooloo le. O kon la tiwba mi la cal o lɛŋnde ya yɔngu niaa a fuɲaa niaa mamaa len nin.› Kɛ la tui ya diom te.

¹⁶Poaa Yonadab-a caanda, má bii diom fuɲa nda mamaa dimul nda-o, kɛ niaa Yudaa, lepilɛ bɛɛ la yeŋ ya lani le.

¹⁷Lelan, diom Mɛlɛka, Hala-Nɔ-Kpaayaa-Kpow-vo, Hala Israɛlla dimi-o co hoo ni aa: «Niaa vannda Yuda a niaa Yerusalɛmnda, i co niaa dɛnnda palaala ya dimul niaa lan kpow tuisi coo. Kani i soo o niaa lo, kɛ la yeŋnun te, mí veelu niaa, kɛ la cɛl te.»

¹⁸O kon mí Yeremi dimul polale Rekab len aa: «Diom Mɛlɛka-Nɔ-Kpaayaa-Kpow-vo, Hala Israɛlla dimi-o co hoo ni aa: ‹Le tùú niaa bii sɔɛi Yonadab fuɲa niaa mamaa, mí la kela kpafii o tɔŋnda ndɔlan coo-o,

¹⁹Yonadab po Rekab-o folanin vana vanin simndan ya o hɔl-lo lɔ́ɔ́-lɔ́ɔ̀ le.» Diom Mɛlɛka-Nɔ-Kpaayaa-Kpow-vo, Hala Israɛlla dimi-o co kon ni.