Read Kissi Yeremi 39 Bible Online

Yeremi 39 - Kissi bible

Yeremi 39

¹Vɔsi Sedekia suili vɔsilan laŋɔmahiɔɔlu o masalen coo Yuda-o, o paangii tɔ́ndɔɛi nin, mí Nebukanɛsar masaa Babilɔn hun a vanaa ndɔa cɔwva kpede. Má tiila Yerusalɛm.

²O vɔsi tɔ́ a ò pilɛndɔ Sedekia va o masalen-ndo, paangii hiɔɔlundɔɛi va malɔ leŋɔmahiɔɔlu, má buli tɛɛngei o kpaki kobio.

³Mí simlacia masaa Babilɔn kpow: Nɛrkal-Sarɛsɛr, Samkar-Nebu, Sarsekim bolle vanaa nda tɛnda bosio-a, Nɛrkal-Sarɛsɛr simlacinɔ kaasoŋaa kɔlkalua, a simlacia tɔ̀a masaa Babilɔn-nda kpow a luɛi, má kɔ cal o dio va tɛɛn-ndo.

⁴Sedekia masaa Yuda nda vanaa ndɔa cɔwva cɔu dɔ́ɔ́ nda, má ɲaanun, má kei o nakɔ lemasaa, a o dio co o kpakila tiɔnndan tɛɛn-ndo, má bii nɛi kɔɛ o bóllo Yurdɛn-ndo.

⁵Kɛ mí vanaa cɔvaa Babilɔn-nda ɲaanun nda kɔɔli, má bendal Sedekia o dɛngbɔɔ Yeriko nin. Má bii ndu, má kɔa a ndu Ribla o Nebukanɛsar masaa Babilɔn-ndo, mó kialu ndu iyama.

⁶Mí masaa Babilɔn diw poaa Sedekia-a fuɲa nda o hɔl Ribla, mó diw vɛlɛ simlacia Yuda kpow.

⁷O kon mó pesi Sedekia hɔltan, mó yii ndu a yɔlɔn, má kɔa a ndu Babilɔn.

⁸Mí Babilɔn-nda loam cɛi masaa a cɛila vannda. Má komba kpaki va Yerusalɛm balɔɔ-o.

⁹Mí Nebusaradan simlacinɔ kpalilaa cumulaa bii vanaa ndáà lo icali o kobio nin-nda, vanaa ndáà yɔngun masaa Babilɔn-nda a vanaa-vanaa ndáà caa baalala labalan. Mó kɔa a nda o biyɔɔ nin Babilɔn.

¹⁰Kɛ mó mɛi vanaa bala fondoa pum o tàndá Yuda-o nin, vanaa ndáà nɔ ɲɛ-ɲɛ le-a pɛɛn, o kon mó ke nda nakɔla n'rɛsɛnnda a yondolan.

¹¹Le Yeremi, mí Nebukanɛsar masaa Babilɔn dimul Nebusaradan bolle kpalilla aa:

¹²«Kɔ hun a ndu, mà handu ndu hɔlten coo. Tosal ndu dɛnɛ vɔɔn te. Kɛ ɲɛ-ɲɛ o dimul nɔm pɛ a tosal ndu lende.»

¹³O kon mí Nebusaradan bolle kpalilla, Nebusasban bolle buɛyaa masaa, Nɛrkal-Sarɛsɛr simlacinɔ vanaa cɔwva a vanaa lebolaa masaa Babilɔn-nda kpow,

¹⁴a viam vannda Yeremi kɔɔli nɛɛ o va o bɛ́ɛ̀ cɛi kaasoo nin-nda, má sɔaa ndu Kedalia po Ahikam-ndo, po imama Safan-ndo o ba, le kɔlan a ndu o ndu lo. Mó kɔ va lon nda vannda latulu.

¹⁵Telen Yeremi va kon o bɛ́ɛ̀ cɛi kaasoo-o, mí Mɛlɛka soaa o ndu lo, mó dimul ndu aa:

¹⁶«Kɔ soo o Ebɛd-Melɛk Etiopiinɔ lo, mà dimul ndu aa: Mɛlɛka-Nɔ-Kpaayaa-Kpow-vo, Hala Israɛlla dimi aa: ‹I co dɛnnda yáà dimi le tosaa lan peelu vannda Yerusalɛm coo le nda saangiaa, o venin dɛnɛ kɛndɛ le nda le. Paale len, i tosannin nɔm o hɔl.

¹⁷Kɛ paale len, i baŋanin nɔm. A delnin vana siòòŋii ndɔɛi co nɔm-ndo o ba le. Diom Mɛlɛka dimi-o co kon ni.

¹⁸A toɲa, i ciindiaanin nɔm, a delnin o mɔɛi cɔw bɛngu le. A lonin yoomu, o n sɔlanin-ndo vanin kon ni, le tùú n tiindan ya-o.›» Sɔɛi fula Mɛlɛka o sondo-e co ken ni.